Ɗerewol TIT 2 - Bible en langue guiziga

Dubun mijeŋŋe

¹ Amma ka, dubuna gwat da mizli kasl kasl kaɓa dubun mijeŋŋe da mizli.

² Anja ki ɓa midigilahaya, ɓa a wam ti mbaazla ta, i mizli mindilaka le, a cifam ti lesl mezleŋ, a ndiram ar tiɓi mijeŋŋe, a wuɗam vu, a ɓusam ɓi.

³ Ngwas madangwasaya kwana, kanah ya, ɓa taŋ ɓa a cifam ti jiviɗ macira hiri da Buymisemuŋ. Anja a gam mbaɗa ta, a gam beke ngi mbaazla ta, anja a vulam kuti mezle,

⁴ ɓa a sirkaka ngwas ziriy ziriy aruŋ na, ɓa a wuɗaka zil taŋhay ati ziri taŋhaya.

⁵ A gam wuya ta, a cam ar dili ta, a jaka hay taŋhaya kuy kuy, a gam mezle, a cinaka mi da zil taŋhaya, ɓa ko mizli a zaka ɓi ngi Buymisemuŋ ta.

⁶ Vula gidaŋ da gawlahaya, ɓa a ndiram ti lesl

⁷ ar gwat gar. Ka vuna, gi gwat mezle ɓa mizli a sipaka sar ɗik aya. Dubuna gwata da mizli cirre kaɓa mbur mindila le.

⁸ Ɓi ɓi mijeŋŋe, ɓa a lumam ɓi ngi ngila mi ara ta, ɓa mbur mazlir ti ndra ta na, a lum ɓi malambaˀ a hirnga ndra ta, yo ɓa a pi mesem.

⁹ Anja bekehey a hinam hirnga a mbuŋ buy taŋhay ar gwat gar. Anja a tuwuɗaka mi taŋ ta, ɓa buy taŋhay a hĩyãka taŋ.

¹⁰ Yo anja ko a huloko taŋ gwat neˀ ta, anja a bigaka teŋteŋ taŋ ndrehhe wãˀ jaka. Ɓa kanah na, mizli a sa ɗuvaka hirnga da dubuna ɓi ngi Milih ndra Buymisemuŋ.

¹¹ Asi Buymisemuŋ a njika gimezle naŋ le, miviɗi viɗi ngi laha vu naŋ ar gimezle nah vuna.

¹² Gi mezle naŋ nah, ara dubuna ndra sipa jiviɗi, yo ɓa i pulaka may gwat ngi duniya hana, ɓa i gam gwat weˀe, jeŋŋe, yo ɓa i sipaka jiviɗ ngi Buymisemuŋ ar hin misi wurenna,

¹³ ti kutuko hin ngi wuya, ndra minjah hiri vurˀe na, yo waɗ dudok ngi Madiɗa ndra Buymisemuŋ ati ngi Milih ndra Yesu Kristu masa bugo vu na.

¹⁴ Kristu a vula hirnga naŋ le ti haŋ naŋ vur ndra, ɓa ngi mbuɗo hirnga ndra tir gi gwat lambaˀ gar, yo ɓa a buna ndra celelle da naŋ, ndra mihirdam hirdam ngi gi gwat mezlehey na.

¹⁵ Sey ki ɓi kahana, ki vula gidaŋ da mizli, yo ki mbiɗa taŋ hirnga ti gidaŋ, kaɓa mbur madiɗa. Anja ki pula mbur a hirsuw ta.