DANIYEL 9 - Bible en langue guiziga

Dira dibiɗ ngi Daniyel

¹ Dariyus mangal ngi Zerses, muy ngi Medihey, micifi buy ngi ruwuy Babiloŋ na, ara zum buy ngi vi mudumbuŋ naŋ.

² Ar vi mudumbuŋ naŋ ngi zumabuy ngi Dariyus na, ya Daniyele, i ra pur ɗerewoloy, i luuma Bumbulvuŋ misla vi kukur tarnaˀ da walahay Zeruzalem masa ndir i diŋ, naŋ miɓa da mijiviɗ Zeremi na, a wuɗ a gi muduba.

³ I mbiɗi hiri ng'avu Bumbulvuŋ Buymisemuŋ, ɓa i diraŋ dibiɗ, i tumbuloŋ, ti gi dalyam, i ki zana ngi vagay waɗ kor kor fucu avu vu.

⁴ I ra dir dibiɗ da Bumbulvuŋ Buymisemuŋ ɗu, i njikaŋ mungra ɗuwoyo, i ɓaŋ: «Aw Bumbulvuŋ ɗu! Ka ki Buymisemuŋ madiɗaŋ, yo magi zluwun da mbur. Mizli mawuɗam ɓimuɗuva ɗikey, yo majaka taŋ a hirnga na, ki ndir ti jumoˀay waɗ ka teŋteŋ avu taŋ.

⁵ I gam mungra le, i gam gwat malambaˀ le. I gam moˀore le, i slikiɗam ɓi le, yo i mbuɗam duba le avu ɓimuɗuva ati ɓi miɗaˀ le ɗikeye.

⁶ Gawla ɗik mijiviɗey miɓaka ɓi ti slimiɗ ɗik da buy ndrahay, yarma ndrahay, dideˀ ndrahay, ati mizli ngisi ruwuy gar na, i cinaka taŋ di ta.

⁷ Naka Bumbulvuŋ, ka jeŋŋe! Ndra Zudahay ati ngi Zeruzalemey, Israyeley gar, migweˀ gweˀ ati mikileŋ kileŋhey, misi asi ruwuy gar, ka muɓula taŋ asi gwat malambaˀ taŋ mugukuw di na, i roko ti mesem a hirnga ndra.

⁸ Bumbulvuŋ, ndra ati buy ndrahay, yarma ndrahay, dideˀ ndrahay na, mesem a hirnga ndra, asi i gam mungra le avu ka.

⁹ Amma Bumbulvuŋ Buymisemuŋ ndra, i slikiɗam ɓi le avu ka, pura ndra ircece, pula mungra ndraˀahaya.

¹⁰ Ti ka miɓa ndra ti balam gawla ɗik mijiviɗey, ɓa i gam kaɓa ka mudubuna ndra di na, ndr'i cunukuw mi ta Bumbulvuŋ Buymisemuŋ ndra.

¹¹ Israyeley gar a ngilaka ɓimujuwa ɗike, yo a mbiɗam duba manja a cunukuw mi. Vurˀe nis ati hazi mutoho ar ɓimujuwa ngi gawla ɗik Moyis na, a mbiɗam le nga hirnga ndra, asi i zluɓam ɓi le avu ka.

¹² Mingiɓi Buymisemuŋ miɓa zleˀe da ndra ati da buy miwi lihey muwam ndra na, a ga le wãˀ muduba. Ki so ndra ti mendere madiɗa, ko a gi ɗaˀ asi ruwuyo kaɓa magi ani a Zeruzalem na ta.

¹³ Mendere tayna gar a gam ar ndra, kaɓa mutoho ar ɓimujuwa ngi Moyis. Amma i pulaka gwat malambaˀ ndraˀahaya ta, i jikam slimiɗ asi ɓi mikaslsla ɗike, ɓa i tuslukuw mevel da ka Bumbulvuŋ Buymisemuŋ ndra ta.

¹⁴ Vurˀe Bumbulvuŋ, ki ga ɓa mendere hana a so ng'ar ndra gbaˀa si. Asi ka Bumbulvuŋ Buymisemuŋ ndra, ka jeŋŋe ar gwat ngi gi ɗik gar. Amma ko i cinukuw mi ta.

¹⁵ Na wurenna, Bumbulvuŋ Buymisemuŋ ndra, ka mubo ti sukwi ɗik ti ruwuy Ezipte ti gidaŋ ɗik na, slimiɗ ɗik a zil le ti di nah, kaɓa naŋ mazil dana ani na, amma ndr'i gam mungra le, i ziriɗaka mi ɗike le.

¹⁶ Bumbulvuŋ, ka maga gwata jeŋŋe na, anja mevel ɗik ati himaˀ ɗik, a mbiɗi duba avu Zeruzalem, walahay ɗik, muwã ɗik mipal na. Asi vur mungra ndrahay ati malambaˀ ngi dideˀ ndrahay na, sukwi mugun hirnga ndra gar, ara zaka Zeruzalem ati mizli ɗikeye.

¹⁷ Aw Buymisemuŋ ndra, wurenna so na, cine diradibiɗ ati tumbul ngi gawla ɗik na. Go mihiri ɗike njahha ng'ar hay ɗik muwaha na, ɓa mizli a sunukuw ki Bumbulvuŋ.

¹⁸ Aw Buymisemuŋ ɗu, jiko slimiɗ, yo cin. Wuna hiri ɓa ki pura gwat muwahahay ati walahay ngi zila slimiɗ ɗik ara na. Ndra matumbulukuw na, anta vur gwat ngi gi ndra mijeŋŋe ta, amma vur ka mapur ircece haɗa na.

¹⁹ Bumbulvuŋ ɗu, cine ndra di! Bumbulvuŋ ɗu, pula mungra ndraˀahaya. Bumbulvuŋ ɗu, jiko slimiɗe, yo ga gwat nah, ki mur ta. Aw Buymisemuŋ ɗu, slimiɗ ɗik mazil ar walahay ɗik, yo a wuzla mizli ɗikey vur ka vuna.»

Njika ɓi ngi gwat masa gi ar hin wal wal kukur tarnaˀ

²⁰ I ra ɓi ɓi zleˀe aruŋ, i ra dir dibiɗ, i ra njika malambaˀ ɗuwoy ati ngi Israyel mizli ɗuwoy, i ra tumbulo Bumbulvuŋ Buymisemuŋ ɗu vur ɓi ngi muwã mipal nga naŋ Buymisemuŋ ɗu.

²¹ Ti ya madir dibiɗ kanah na, Gabriyel, mbur ya mupura ti kleŋ tuwa, a slikiɗo faw kutum ng'avi ya, ar ler ngi vula gwat ngi mikuli ngi pastaˀa.

²² A dubuniy gwat, a ɓiy: «Daniyel, wurenna yi so ɓa i vuluw lesle.

²³ Ti ka mizla tumbulo Bumbulvuŋ na, mingiɓi a bo le ti vaŋ, yi so na ngi ɓuw di. Asi Buymisemuŋ a hĩyuw le haɗa. Sla wala ngi ɓi hana ati gwat ka mupura ti kleŋ na!

²⁴ A ɗuvam vihey le tarnaˀ tarnaˀ makaw kukur tarnaˀ, vur mizli ɗikey ati walahay ka misi ara na, ɓa ngi kiɗa mi ngi moˀore ati mungra, ɓa ngi pula mungra, ngi so ti gi jeŋŋe ngi sete. Ɓa pura gwat ti kleŋ ati ɓi ngi mijiviɗey a gam muduba, yo ɓa a pam mal ngi vula li mihĩˀĩ da Buymisemuŋ a muŋ.

²⁵ Sina sin le, yo sla wala nah, mingiɓi mubo ɓa mizli mijahay a moko, yo waɗ ngi ndira walahay Zeruzalem hiri naŋ a muŋ, ɓa hã buy mipaŋ mal ngi vula slra a bo na, naɓa vihey ada tarnaˀ tarnaˀ makaw tarnaˀ. Ar vihey tarnaˀ tarnaˀ makaw kukur merkeɗ ngaˀ cuw na, a sa ndiraka walahay ati mohol naŋhaya a muŋ, amma a sa gi i hin mutuwaˀ.

²⁶ A dirba vi tarnaˀ tarnaˀ makaw kukur merkeɗ ngaˀ cuw na, mbur mipaŋ mal ngi vulaŋ slra, a sa kiɗam pal vagay, amma ko mbur pal masa cik vu aseˀe anta. Walahay ati hay ngi Buymisemuŋ na, mizli ngi buyoy misi tumbuŋ, a sa wahaka taŋ. Mizli ngi buy tayna vuna, i himaˀ ngi Buymisemuŋ masa kiɗa taŋ, yo hã avu kiɗa mi ngi vurum kwana, ɓi micica ngi ngizla vu ada.

²⁷ Ar vi mitarnaˀ ngi dirbahay na, a sa tika ˀay ngi jumoˀay da zigiduw, yo angi reta ngi vi tarnaˀ na kwana, a sa kiɗa mi ngi mikuli ati gwat ngi vulo. Mingizla mizli a sa sawa, a sa ga gwat mukuy ta naŋhaya kutum, hã ɓi micica tuwa, a mbiɗi nga hirnga naŋ a muŋ.»