DANIYEL 4 - Bible en langue guiziga

¹ Ya Nabukodonozoro, i ro zleˀe a hay ɗu, hiri ra ciri ar mugum ɗu.

² Ngi duvuɗo, musuwun a giy, yo a giy zluwun haɗi. Ya mutup ar li hin ɗu na, gwat ya mupura ar musuwun tuwa, ara giy gigisl.

³ Yi ɓa mizli, a soko ti misi sinmijileŋ ngi Babiloŋhoyo cek ng'avi ya, ɓa a ɓikiy mbiɗeˀvra ngi musuwun ɗu na.

⁴ Dar misi cucukoy, muɓula musuɗukoy, mizli Babiloŋhoy waɗ mipi daˀasay a ndiloko. Yi ɓa ɓi ngi musuwun ɗu a mbuŋ taŋ, amma ko a ɓikiy mbiɗeˀvra naŋ ta.

⁵ A dirba nah wãˀ na, Daniyel a cawa. A zilaka Beltasar ma, kaɓa kuli ɗuwoy muwuɗam. Sin ngi kuli mezleheye, ada ar naŋ. Yi ɓaŋ ɓi ngi musuwun ɗu so:

⁶ ‹Beltasar, madiɗa ngi mupura daˀasay, yi si na le, sin ngi kuli mezlehey ada ar ka, yo gwat mufuna wuluk ngi mbur wanaka gar na, anta zumuw hirnga ta. Ɓiy ɓi ngi gwat ya mupura ti kleŋ na, yo ɓiy mbiɗeˀvra naŋ ma.

⁷ Ti ya mutup ar li hin ɗu na, gwat ya mupura ti kleŋ ani: widis a bo kaˀ a wuzla ruwuy, a gil jek haɗa.

⁸ Widis tuwa a tiri madiɗa, yo naŋ gidaŋ ma. Gil naŋ sesẽŋ ar birngiŋ muŋ, yo a pur sesẽŋ a ruwuy mira kiɗo mi.

⁹ Kalaf naŋhaya teken teken, yo a yi doɓoɓ doɓoɓo, mizli gar a lumam, a zumam. Gwat misãmi ngi ɓuhoy, a hinam aseˀe, ɗiyiwoy a ɗiyam hay taŋhay ar mihaŋ naŋhay, gwat misi titiri gar a lum mi nga naŋ ngi zumo.

¹⁰ I ro tup ar li hin ɗu. I pur mbur ti kleŋ, mbur miɗeŋ ɗeŋ hiri, i mbur mipal, ara po sar ti muŋ.

¹¹ A widi ti gidaŋ a ɓi: ‹Mbizlaka widise, yo bukoko mihaŋ naŋhay avra! Curoko kalaf naŋhaya, zliɗaka yi naŋhay avra! Anja gwat misahmihey a bam ti seˀe avra, yo anja ɗiyuwoy a slikiɗam tir mihaŋ naŋhay avra!

¹² Amma dirngbizliŋ naŋ ati dimbasl naŋhay, a sa ndiram a ruwuy. Juwaka vah vah ti celelu ngi ɓiri ho gar waɗ ngi ɓiri gaza a wuzla giziŋ ngi ɓuhoy! Anja a ndir yorororo ti wulngar, a sa zum giziŋ a ruwuy kaɓa gwat misahmihey.

¹³ Wuluk naŋ, a sa mbiɗaka, a sa tiri i wuluk ngi mbur titira mata, a sa vulakaŋ wuluk ngi gwat misahmi. Joˀ a sa ndir kanah hã vi tarnaˀ.

¹⁴ Gwat nah a cuh kahana, asi i mbur miɗeŋ ɗeŋ hiri ɓi micica ɓi naŋ. Ɓi nah a cuh kahana, asi i modro ngi Buymisemuŋ Mimadiɗa wãˀ miɓa ɓi naŋ, ɓa mizli misi ti siifahay a sinaka, Buymisemuŋ Mimadiɗa wãˀa, i madiɗa ar zumabuy ngi mizli titiraˀahaya, a vula zuma buyo da mbur naŋ muwuɗ le gar, yo mbur mihina hirnga miwãˀ ngi si mizli, a slikiɗaŋ.›

¹⁵ Ya buy madiɗa Nabukodonozoro, musuwun migiy na, kahana so. Ka so na Beltasar, ɓiy mbiɗeˀvra naŋ. Misi sinmijileŋhey gar ngir li zumabuy ɗu anta njikikiy di gu ta. Amma ka, ki njikiy di gu, asi sin ngi kuli mezleheye, naŋ da ar ka.»

Daniel mimbiɗa pulaˀvra ngi musuwun ngi buyo

¹⁶ Akẽh na, Daniyel mazilaka Beltasara, a jijik kirkir kwaɗay, a zliɗaŋ wuluko. Dar buy a ɓaŋ: «Beltasar, anja musuvun ɗu a giruw ta!» Beltasar a mbiɗaŋ di: «Kumani, anja ɓi ngi musuwun hana a gi vur mesene ɗikey, yo mbiɗeˀvra naŋ kwana, naŋ vur mizli ka mazlir ti taŋ ta!

¹⁷ Widis ka mupura, a gi madiɗa, yo gidaŋ ma, gil naŋ sesẽŋ ar birngiŋ, yo a pur sesẽŋ asi ruwuy kurzluˀ,

¹⁸ kalaf naŋhaya kuy teˀ, yo a yi doɓoɓ doɓoɓ, mizli gar a zumam, gwat misahmi ngi ɓuhoy taŋ aseˀe, ɗiyiwoy a ɗiyam hay taŋhay ar mihaŋ naŋhay na,

¹⁹ nah na gar, i ka vuna kumani! Asi ki tiri le ki madiɗa, yo ka gidaŋ, madiɗa ɗik a sik le, a ndil le sesẽŋ a muŋ, zumabuy ɗik a ndil le sesẽŋ asi ruwuy mira kiɗo mi.

²⁰ A dirba naŋ, buy a pur mbur miɗeŋ ɗeŋ hiri, i mbur mipal mapo sar ti muŋ, ara ɓi: ‹Mbuzlaka widise, yo bukoko meɗ meɗ avra! Amma dirngbizliŋ naŋ ati dimbasl naŋhaya, pulaka taŋ a ruwuyo, juwaka vah vah ti celelu ngi ɓiri ho gar waɗ ngi ɓiri gaza a wuzlakalafay a ɓuh! Anja a ndir yorororo ar wulngar, a sa zum giziŋ a ruwuy kaɓa gwat misahmihey hã vi tarnaˀ.›

²¹ Kumani, hana i mbiɗeˀvra ngi musuwun ɗike so. I Buymisemuŋ Mimadiɗa mujuwa a mevele vur ka buy madiɗa ɗu:

²² a sa ɓulukuw ti wuzla mizli avra, kisa cifi ati gwat misahmihey a ɓuh. Ki sa zum giziŋ kaɓa sla, yo kisa ndir yorororo ar wulngar. Ki sa ndir kanah vi tarnaˀ, hãka misa tiɓa le kuy kuy, Buymisemuŋ Mimadiɗa wãˀa, i madiɗa ar zumabuy ngi mizli titiraˀahaya, yo a vula da mbur naŋ muwuɗ le gar.

²³ Yo mana, a ɓam ɓa a pulaka dirngbizliŋ ngi widis ati dimbasl naŋhaya a ruwuy. Ti ka misa tiɓa le, Buymuŋ i madiɗa angi gwatay gar si na, a sa vulukuw zuma buyo a muŋ.

²⁴ Vurˀe so na kumani ɗu! Anja ki tiɓa kuti ɗu ani! Mbiɗa hirnga ngi mungra ɗikeye ti gi jeŋŋe, yo malambaˀ ɗikeye, ti pura ircece da misi murgahay! Asinta, a sa pulukuw ki cifi setette neˀ ava kwani.»

Musuwun ngi buy tuwa ara gi gisiŋ muduba

²⁵ Gwatay miɓaka taŋ gar da buy madiɗa Nabukodonozoro, ara gam muduba.

²⁶ Naŋ kine, vi pal a dirba nah na, Nabukodonozor ara liˀi ar gbale ngi mugum nga naŋ buy a Babiloŋ.

²⁷ Buy a zla, a ɓi: «Puraka, hana i Babiloŋ, walahay madiɗa, ya mindira ti gidaŋ ɗu, kaɓa mamay ngi buy. Hana a biga le ya gidaŋ, yo yi buy misi dudoko.»

²⁸ Buy a tika mingiɓi t'aruŋ si na, ˀay a bo kaˀ ti muŋ, a ɓi: «Aw buy Nabukodonozor ɗu, a ɓukuw a tiɓaka zuma buyo le avu ka.

²⁹ A sa ɓulukuw ti wuzla mizli avra, kisa cifi ati gwat misahmihey a ɓuh. Ki sa zum giziŋ kaɓa sla. Ki sa ndir kanah vi tarnaˀ, hãka misa tiɓa le kuy kuy, Buymisemuŋ Mimadiɗa wãˀa, i madiɗa ar zumabuy ngi mizli titiraˀahaya, yo a vula da mbur naŋ muwuɗ le gar.»

³⁰ Angi ler nah na vuna sina, gwat miɓaka ɓi naŋ tuwa, ara gi avu buy Nabukodonozoro si: a ɓulakaŋ ti wuzla mizli avra. A ra zum giziŋ kaɓa sla, yo a ndir yorororo ar wulngar. Himac ngi hirnga naŋ, a gil kaɓa zlara ngi kurom, yo zleneke, a gil kaɓa ngi ɗiyuw.

Nabukodonozor mumbul

³¹ Nabukodonozor a ɓi: «Ar kiɗa mi ngi vi tarnaˀ na, ya Nabukodonozoro, i zuɓa hiri paɗ nga muŋ na, wuluk ɗu a mawa a muŋ. I ga sise da Buymisemuŋ Mimadiɗa wãˀa, yo i hunumaŋ, i ga dudok da misi ti siifa ngi sete. Zuma buy nga naŋ, i zumabuy ngi sete, yo zumabuy nga naŋ, naŋ vur dideˀ vur dideˀ.

³² Avi naŋ na, mizli ngi si ruwuy gar i gwat mupuɗaw ta: ko vur vurum ngi muŋhoy, ko vur mizli ngi ruwuyoy kwana, a ga gwata avu wuɗ nga naŋ. Ko mbur loŋ matikaŋ gu anta, yo mambiɗaŋ hirnga ar gwat ngi gi naŋ gu, anta.

³³ Ar nah vuna sina, wuluk ɗu a mawa kweŋ, ɓi ngi dudok ngi zumabuy ɗu, madiɗa ɗu ati kuy ɗu ara moko, yo mikuti ɗuwoy, ati mizli ngi ciki ɗuwoyo, ara wuɗam ya ng'avi taŋ a muŋ. Joˀ i cifi ar zumabuy ɗu a muŋ, i lum madiɗa fineˀ misi zleˀe.

³⁴ Wurenna, ya Nabukodonozoro, i ra hunuma Buymuŋ, i ra jaŋ salalay, waɗ i ra gaŋ dudok. Asi gwat ngi gi naŋ, naŋ kasl kasl, jiviɗ naŋ, naŋ jeŋŋe, yo mizli mahuhumom vu na, a mataŋ nga ruwuyo gu.»