DANIYEL 1 - Bible en langue guiziga

Daniyel ati cil naŋhay a Babiloŋ

¹ Ti Zoˀakiŋ, buy Zuda mazum buy ngi vi mimakir naŋ na, Nabukodonozor, buy madiɗa ngi Babiloŋ a sawa, a tiɓa Zeruzaleme.

² Bumbulvuŋ a vula Zoˀakiŋ asi haŋ ngi Nabukodonozor. Joˀ Nabukodonozor a hil cah avu gazlanga ngir hay ngi Buymisemuŋ. A ji mizli ng'ar dangay ngi Babiloŋ, yo a pa gwat mitiɓa ar vurumo ng'ar hay ngi kuli naŋhay, ar hay ngi pi zlili.

³ A ɓa Asepenas, madiɗa ngi mizli naŋhay, ɓa a wini gawlahay cah ar tizer ngi buyoy waɗ a wuzla ziri ngi mizli madiɗahay.

⁴ A wuzla ziri gawla taŋhay manja hereweɗ ko neˀ. Deŋ taŋ naŋ kuy, taŋ ti sinmijileŋ, a sinam haɗa, yo taŋ ti sin ngi gi gwata ma. Taŋ, a sa gam a hay ngi buy. A sa dubunaka taŋ mingiɓi ati toho gwat ngi mizli Babiloŋhoy.

⁵ Buy a juwa le, ɓa vur hin gar na, a vulaka taŋ gwat ngi zum ati gwat ngi si kaɓa nga naŋ buy vuna, yo a dubunaka taŋ gwat ngi gi hã vi makir. A dirba nah, a sa gam slra ngi buy.

⁶ A wuzla taŋ, dideˀ ngi Zudahay ada cah, i ti Daniyel, Hananiya, Mikayel waɗ Azariya.

⁷ Madiɗa ngi migi slra ngi mamay buyo, a ca taŋ slimiɗ mekelemey. Daniyele, a zila Beltasar, Hananiya, a zila Sadrak, Mikayele, a zila Mesak waɗ Azariya, a zila Habet-Nego.

⁸ Daniyel a juwa le a mevel naŋ, ɓa a zum gwat malla a si gwat misi kaɓa ngi buy na ta, vur naŋ masa ci ar dili. A cufuɗa madiɗa ngi migi slraˀahaya, ɓa a tikaŋ ˀay ngi zuma gwata ta, vur naŋ masa ci ar dili ti gwat ngi zumo.

⁹ Buymisemuŋ a ga mezle da Daniyele, ɓa madiɗa ngi migi slrahay a tiɓa cufuɗ naŋ.

¹⁰ Madiɗa ngi migi slrahay a ɓa Daniyele: «Muɗuviy ɓi ngi gwat ngi zum ati gwat ngi si kum, ya mavulukum di na, i buy vuna ti haŋ naŋ. Zluwun ara giy vur naŋ masa lumuw zah zah a wuzla cil ɗikeye. Asi vur zih ɗik na, a sa bukiy hirnga ti maslalam.»

¹¹ Akẽh na, mbur mekelem ada. Madiɗa ngi migi slrahay a vulaŋ Daniyel, Hananiya, Mikayel, waɗ Azariya, asi haŋ naŋ. Daniyel a ɓaŋ:

¹² «Ambuh takwa! Inga titila hã hin kuruˀ, ki vulam ndra ngi zumo, i lar kalafay ati yam tewle.

¹³ A dirba nah, kisa pura dumvu ndra ati ngi mizli mazumam kaɓa buyo, joˀ kisa gi ti ndra weˀe avu ka masa pura vuna.»

¹⁴ Mbur tuwa a tiɓa ɓi nah, a titila ngi hin kuruˀo so.

¹⁵ A dirba hin mukuruˀo, a puraka na, hiri taŋ celelle, yo taŋ ɓiɓir ɓiɓir fineˀ mizli mazumam kaɓa buy tuwa.

¹⁶ Mbur mijigin taŋ a pula gwat ngi zum ati mbaazla mavulaka taŋ di zleˀe tuwa, a vula taŋ lar kalafay.

¹⁷ Gawla mumufaɗ tayna tuwa, Buymisemuŋ a vula taŋ sin ngi gi gwat ati sin ar mingiɓi waɗ ar sinmijileŋ. Daniyele, a sla wala ngi gwat gar, gwat mupura ti kleŋ ati musuwuno gu.

¹⁸ Ar kiɗa mi ngi hin ngi Nabukodonozor, buy madiɗa misla, ɓa a bigakaŋ gawlahay tuwa na, madiɗa ngi migi slrahay a raŋ taŋ.

¹⁹ Buy a kiɗam slir ati taŋ. A wuzla taŋ gar na, a lum misi kaɓa ti Daniyel, Hananiya, Mikayel waɗ Azariya na ta. Vurˀe, taŋ a ndiram a mbuŋ buyo.

²⁰ Da buy a cufuɗa taŋ le ar ɓi ngi sinmijileŋ, yo ar ɓi ngi lesl wanaka gar kwana, gawla tayna, a slaka wala naŋ, is kuruˀ, fineˀ misi cucukoy ati muɓula musuɗukoy misi asi ruwuy naŋ ma zum buyo anga.

²¹ Joˀ Daniyel a gi slra ngi buyo hã ar vi mudumbuŋ ngi Kiriyus mazum buy.