AMOS 9 - Bible en langue guiziga

Amos mupur gwat ti kleŋ sar muzlum naŋ

¹ I pura Bumbulvuŋ ɗu deŋ ar li gi mikuli, a ɓi na: Kiɗa mecepek ngi hirnga ɓamtalay misi ar hay ngi Buymisemuŋ na, ɓa a jijika sivirzi ngi haya gar. Ngila taŋ ngurof ngurof nga hirnga mizli gar, mizli mindiramay le na, i sa kiɗa taŋ ti maslalam, ko mbur masa lih anta, ko masa ndir ti siifa loŋ anta.

² Da ko a cam le ng'ar li ngi mizli mumucahay kwana, i sa ra ɗiɗo taŋ, da ko a jiɗam ng'ar birngiŋ ma, i sa po taŋ sar na si.

³ Ko da ara ɗumom ar mesengel ngi muwã Karmel kwana, i sa supo taŋ, i jo taŋ. Da ko a waka kaɓa a sumuɗom le avu ya ng'asi virzi ngi mubuliy kwana, i sa ɓakaw ɗaˀ si na, a humbuɗa taŋ a diga.

⁴ Da ko a jaka taŋ le, a roko ram sek a mbuŋ mesene taŋhay kwana, i sa ɓi ɗaˀ, a kiɗaka taŋ vagay vagay ti maslalam. I sa ɗuva hiri ɗu taˀ ar taŋ, ngi mezle ta ɓula, amma ngi malambaˀa.»

⁵ Bumbulvuŋ Buymisemuŋ misi gidaŋ waˀa, a wusa hirwuyo le duk na, hirwuy a jijik, joˀ mizli ngi raˀahay gar a tuwam tuwuy ngi vagay. Hirwuyo a slikiɗ hogokko cek kaɓa mizaw mazuɓu, yo a mi kip nga ruwuy kaɓa mizaw Ezipte.

⁶ Mbur mandira viŋ naŋhay a muŋ, waɗ masirta hirwuyo ti naŋ kaɓa viŋ, yo mahila yam ngir mubuliye, a pa tisl da hirwuyo na, slimiɗ naŋ Bumbulvuŋ.

Bumbulvuŋ miga kiita da mizli muzluɓam ɓi le

⁷ «Israyeley, kum avu ya kaɓa Etiyopihey ta kwa? Kum Israyeleye, i bo ti kum le tisi ruwuy Ezipte, yo Filistiheye, ti Kaftor, waɗ Siriheye ti Kir na, ki sinaka ta kwa?» I ya Bumbulvuŋ maɓi.

⁸ Ani Bumbulvuŋ, Buymisemuŋ ɗu, a ro hiri taˀ ar zumabuy ngi Israyel muzluɓ ɓi. A ɓi: I wuɗ i ngizlakap wãˀ asi ruwuyo. Amma, y'anta ngizla hay ngi Zakopo kap wãˀ ta ɓula. I ya Bumbulvuŋ maɓi.

⁹ Naŋ kanah, ani i ra ɓi ɗaˀ: A wuzla sukwihey gar na, i wuɗ i dingila Israyeleye, kaɓa madingilam daw ti sikiɗi. Ko zuŋ ɗugur masa diɗ pal a ruwuy anta.

¹⁰ Mizli muzluɓa ɓihey a wuzla mizli ɗuwoy gar na, a sa kiɗa taŋ vagay vagay ti maslalam, asi taŋ a ɓam na: «Gwat ngi mendere nah anta sa gumboˀo ndra ta, anta sa duko ndra ta!»

A dirba mendere migi le, Buymisemuŋ a ja haŋ ngi mizli naŋhay a muŋ

¹¹ Buymisemuŋ a ɓi: mazlaɓ ngi Davit mijangawwa na, i sa slikiɗa hiri naŋ a muŋ, i sa disla li munjoŋ njoŋ naŋhaya, i sa ndir hayay ar diŋheye, i sa slikiɗa hiri ngi walahayaka nga naŋ misi zleˀe a muŋ.

¹² Akẽh na, hirwuy Edom mindir waɗ ngi sukwi mekelemey gar, misi slimiɗ ɗu mazil ar taŋ gar na, dar Israyeley a sa tiɓaka da taŋ. I ya Bumbulvuŋ maɓi, i ga cummo.»

¹³ «Hin ara ndilawa, tapasa, a huvam ani, a gam sifi ngi gwat ani, sifi ngi ɗuco yi ngi gudubun ani, hin zligi ani. Tapasa, yam ngi zinga ngi gudubun a sa ɓul a muwãhaya gar, yo ar li mingir ɗingirey gar na, a sa ɓul col col. I ya Bumbulvuŋ maɓi.

¹⁴ Israyel, mizli ɗuwoyo zuwul taŋ na, i mbiɗa ɓi nah: walahayay muwahaka taŋ zleˀe na, a sa ndiraka hiri taŋ a muŋ, ɓa a cifam ar taŋ, a sa hirvam gudubunoy, ɓa a gam di mbaazla a sakaŋ, a sa gam jarne, ɓa a zumaka yi ngi gwat ngi raˀahaya.

¹⁵ I sa cufa taŋ joˀ kuy kuy ar hirwuy taŋ, anta sa ɓulaka taŋ tisi ruwuy taŋ mata, hirwuy ya muvula taŋ di na. I ya Bumbulvuŋ, Buymisemuŋ ɗik maɓi.»