AMOS 8 - Bible en langue guiziga

Amos mupur gwat ti kleŋ sar mumufaɗ naŋ: kiɗgil ti yi ngi widis

¹ Bumbulvuŋ Buymisemuŋ, gwat naŋ mibigiy di, ya mupura na, «I kiɗgil ti yi ngi widis minahaŋ.»

² A ɓiy: «Amos ka mapur na i mike?» Yi mbiɗaŋ di: «I kiɗgil ti yi ngi widis minahaŋ. Bumbulvuŋ a ɓiy: «Israyel, mizli ɗuwoyo, hin taŋ a ndila le muduba, y'anta sa pula mungra taŋ na teˀ mata.

³ Tapasa, dimis mazlaka a hay buyo, a sa tiri dimis ngi vagay, vagay ngi mizli a sa gi haɗa, ko a maka gar na, li a sa gi siriw.» I Bumbulvuŋ Buymisemuŋ ɗu maɓi.»

May gwat ngi migi terehey a so ti mendere

⁴ Kum mizli maslikiɗam fõh fõh ng'ar misi murgahay, yo kum mawuɗam ngizla mizli muluɓ luɓ ngi si ruwuyoy na, cinam:

⁵ Kumo ki ɓam ay ngar ngar: «Anja muguzlum ngi kiya weɗeɗ hana a cuh kutum so, ɓa i hiɗikaka daw ndrahay avra. Anja hin ngi Sabat a kiɗ mi kutum so, ɓa i wunaka mi ngi dirgwaɗ ndraˀahaya. I sa zuɓam agwada miweˀe weˀe ngi wi gwata, i sa giɗaka cikili naŋ, waɗ i sa ngirɗaka kilo, ɓa gwat a ji kilo ta.

⁶ Ɓa i hiɗikam mizli misi viyahay ti dala, ko tarak sar pal tekeɗe na, a hiɗik misi murga hiɗak takwa? Yo ko sef kwana, i sa hiɗikaka avra!»

⁷ Bumbulvuŋ a hudum, asi huhumo vu ngi mizli ngi Zakopoyo, a ɓi: «Y'anta puyuk hirnga ti gwat ngi gi taŋ na ta ndiɗaˀ.

⁸ Naŋ kine, hirwuy a sa jijik vurˀe, yo mizli ngi raˀahay gar, a sa tuwam vagay. Hirwuyo cek a sa slikiɗ hogokko kaɓa mizaw, waɗ a sa mbizli kip nga ruwuy kaɓa mizaw Ezipte.

⁹ Ar hin nah, i sa ga ɓa pas a diɗ ti wuzla papas si, yo duvuɗ a sa ji ti papasa. I Bumbulvuŋ, Buymisemuŋ ɗu maɓi.

¹⁰ Muguzlum kumoyo, i sa tiri taŋ tuwuy ngi vagay, yo dimisi kumoyo gar, i sa tiri taŋ tuwuy mikaɗam kaɗam. Mizli gar a sa juwam zana ngi vagay hirlak hirlak a virzi, yo a sa hijaka hirngahaya kurzluˀ kurzluˀ cek, i sa tiri ti tuwuy kumoyo kaɓa matuwam vagay ngi mangal kirmalay, Gwat tayna gar, kiɗa mi taŋ a sa bam vu ati hin ngi bonoy mukuy ta naŋ wãˀa.

¹¹ Ani hin ara ndilawa, tapasa i sa go may asi ruwuyo i may ngi ɗaf malla ngi madalyam ta, amma i may ngi cine mingiɓi nga ya Bumbulvuŋ. I Bumbulvuŋ, Buymisemuŋ ɗu maɓi.

¹² Mizli a sa ram digi kiŋkiŋ ti ka kiŋkiŋ ti ka, tir vay muŋ hã ng'asi pas ngi miprik, ngir ti sipa mingiɓi ngi Bumbulvuŋ, amma ko anta sa lumaka ta!

¹³ Tapasa, ziri diili mimezlehey, waɗ gawlahay aruŋ na, madalyam a sa kiɗa taŋ.

¹⁴ Mizli mahudumom ti kuli ngi Samarihey, maɓam: «Hadam ti kuli ɗik misi ti siifa, mazilaka Daŋ!» na, yo «Hadam ti Misi Gidaŋ ngi Berseba» na, a sa ndilam simtraˀ simtraˀ ngi wãˀ, anta purtaˀ le mata!