AMOS 7 - Bible en langue guiziga

Amos mupurgwat ti kleŋ sar mudumbuŋ naŋ: jaray

¹ Bumbulvuŋ, Buymisemuŋ ɗu, gwat naŋ mibigiy di anihĩ: Keɗ na, ara go jaray, naɓa hirak ti giziŋ mazla ɗiɗi ti ɗiɗi aruŋ, a dirba mislaka giziŋ mudumbuŋ naŋ le ngi murbuc da buyo.

² Jaray tuwa a zuma giziŋ ngi si ruwuyo le tirneˀ wãˀ? Akẽh na, yi ɓi: «Bumbulvuŋ, Buymisemuŋ ɗu, ambuh takwa, pula mungra ngi mizli ɗikeye. Da kanah ta na, mizli ngi Zakopoy a sa ngiram mbri mbrike? Ani i sukwi meciɗek wãˀ mayse.»

³ Dar Bumbulvuŋ a mbiɗa wuluko, a ɓi: «Anta sa gi kanah mata.»

Amos mupur gwat ti kleŋ sar mucuw naŋ: Vu

⁴ Bumbulvuŋ, Buymisemuŋ ɗu, gwat naŋ mibigiy di anihĩ: Keɗ na, Bumbulvuŋ, Buymisemuŋ ɗu ara til mi ti ɓi ngi gi kiita ti vu, yo vu vuna a zuma yam mijileŋ ngi si ruwuyo gar, waɗ ara zuma hirwuyo ma.

⁵ Joˀ yi ɓi: Bumbulvuŋ, Buymisemuŋ ɗu, ambuh takwa, pula ɓi nah si. Mizli ngi Zakopoy a sa ngiram mbri mbrike? Ani i sukwi meciɗek wãˀ mayse!»

⁶ Akẽh na, Bumbulvuŋ a mbiɗa wuluko, a ɓi: «Anta sa gi kanah mata.»

Amos mupur gwat ti kleŋ sar mimakir naŋ: zeweɗ ti ɓiri ava ngi wi gil ngi dalam cir cir

⁷ Bumbulvuŋ, gwat naŋ mibigiy di anihĩ: Keɗ na, Bumbulvuŋ deŋ ar mohol miwa gil nah le cir cir, waɗ zeweɗ ti ɓiri ava ngi wi gil ngi dalamakaw a haŋ.

⁸ Bumbulvuŋ a ɓiy: «Amos, ka mapur na i mike?» I mbiɗaŋ di: «I zeweɗ ti ɓiri ngi wi gil ngi dalam cir cir.» Bumbulvuŋ ɗu a ɓiy: «Pura, y'ani i wa Israyel mizli ɗuwoy na ti zeweɗ ti ɓiri ava ngi wi gil ngi dalam cir cire, zle dana na, y'anta sa pula mungra taŋ teˀ mata.

⁹ Ti ya masa slikiɗ badam, maslalam kaw a haŋ ng'ar mizli ngi hay Zeroboˀamay na, i sa waha li miɗingir ɗingir ngi gi mikuli ngi mizli ngi Izakay na, kiɓac kiɓac, yo hay muvuku vu taŋ ngi Israyeley na, musukuɗ musukuɗ.

Amasiya masay muɓula Amos ti Betel

¹⁰ Amasiya, masay a Betele, a slin ng'avi Zeroboˀam, buy Israyele, ɓa a ɓakaŋ na: «Amos ara gi gidiɓi ar ka, ɓa a putukusuw tir zumabuy ɗik a Israyele. Mizli anta ɓusaka ɓi naŋ na mata. Asi Amos vuna a ɓi na:

¹¹ A sa kiɗaka Zeroboˀama ti maslalam, yo a sa jaka Israyeleye cek, a ram taŋ kileŋ avu hirwuy taŋ.»

¹² Akẽh na, Amasiya a ɓa Amoso na: «Ka mbur mupura daˀasa, cuh baɗ aka, kil nga ruwuy Zuda. Zum ɗaf ɗik, yo ga slra ɗik ngi mijiviɗ a diga zuy ɓula!

¹³ Amma a Betel aka na, ki mahiri ngi ga slra ɗik ngi mijiviɗ na mata, asi aka i hay ngi buy, yo i hay ngi Bumbulvuŋ ma!»

¹⁴ Amos a mbiɗa da Amasiya: «Yi mijiviɗ ta, yo yi mangal ngi mijiviɗ ta ma. Yi mijigina slahay zleˀe, yo i pi yam da bazlawaray.

¹⁵ amma Bumbulvuŋ a zuɓo ya baɗ asi gineweye, a ɓiy: Aru! Njika ɓi ngi mbuŋ da Israyel, mizli ɗuwoy.

¹⁶ Wurenna, cine mingiɓi ngi Bumbulvuŋ maɓuw di: Ani ka ki ɓiy na: Ki njik ɓi ngi mbuŋ da Israyeleye ta, yo ki ɓi mi kwiliŋ kwiliŋ da mizli ngi Izakaya ta kini!

¹⁷ Vurˀe, Bumbulvuŋ a ɓi ani: ‹Ngwas ɗike, a sa tiri sulome ar walahaya, a sa kiɗaka ziri ɗik mizile ati mongosohoyo vagay vagay ti maslalam. A sa waka hirwuy ɗike ti zeweɗ weˀ weˀ, wunak wunak da mizli, ka kisa ra muc ar hirwuy mihirya le ti dili, yo a sa jaka Israyeleye, a ram taŋ kileŋ avu hirwuy taŋ.»