AMOS 6 - Bible en langue guiziga

Cifi setete migisiŋ ta

¹ Mizli muroko setette a Siyoŋ, yo moroko pulam vu a muwã Samari na, kay, taŋ ar bonoy. A waka kaɓa taŋ i mizli madiɗa ngi wuzla sukwi ngi mizli, joˀ Israyeley ara ram ng'avu kum.

² «Inga a ram nga Kalne ɓa ki puraka ɗi, bam ti kẽh nga Hamat, walahay madiɗa, yo pam sar nga Gat, hirwuy Filisti. Ki waka na, hirwuy kumo a funaka tayna le kwa? Yo hirwuy taŋ i madiɗa fineˀ hirwuy kumo kwa?»

³ Ki wuɗam girjaha hin ngi bonoyo le nga mbuŋ zleˀe, dambalaka ki kuruhoko di i hin ngi gi moˀore jak.

⁴ Ki roko tutup ar arngawo miɗiyahay ti sliŋ ngi begene, ginasl ginasl ar gwat ngi hin kumoy, ngi humbuɗa useˀ ngi zlengerekey, waɗ ngi ziri sla muwunahay ti wini ar gezleŋ.

⁵ Ki roko zlam dimis ngi gujuvur, ˀay kaˀ a muŋ, ki boko ti gwat ngi kiɗ ngi dunguroy, kaɓa Daviti.

⁶ Ki sam mbaazla ti sikiɗ mikitimbiˀ kitimbiˀi, mal mimezlehey pay pay avu vu. Amma mendere muluma sukwi ngi Zozef na, ko ki likaka neˀ le ta.

⁷ Vurˀe, wurenna a sa jam dumbuŋ a wuzla mizli masa jaka taŋ na i kum, joˀ kisa kiɗam mi so, kum masafayahay.

Masa ngizlaka walahay Samari

⁸ Bumbulvuŋ a hudum ti slimiɗ naŋ tehhe muŋ, a ɓi: Huhumo vu ngi Israyeley na, anta giy kuyta wãˀ, hay taŋ mezleheye, i pura taŋ hiris le, i sa vula walahay Samari taˀ gar asi haŋ ngi mesene taŋhay. «I ya Bumbulvuŋ, Buymisemuŋ misi gidaŋ wãˀ maɓi.

⁹ Da mizli a ndiram le kuruˀ ar hay purla na, a sa micam.

¹⁰ Akẽh na, da muy ngi mizli mumucahaya muso le hila vagay taŋhaya nga dik na, a sa ɓa mbur misi a hur haya: «Mbur mekelem ada ati ka akẽh aruŋ makwa?» na, mbur ngi hur hay tuwa a sa mbiɗaŋ di: «Ĩˀĩˀ, ko mbur loŋ anta aka ta!» Muy ngi mizli vagayay tuwa a sa ɓaŋ: «Taˀa mi!» Anja ki zila slimiɗ ngi Bumbulvuŋ mata!

¹¹ Naŋ kanah, da Bumbulvuŋ miɓi le ɗaˀ na, hay madiɗahay a mbizlam, ko hay meciɗek kwana, a cir puɗak.

Luma bugawla sar cuw kwana i ngatara

¹² Pilisey a kilam a muwã kwa? Ada a huvam ti slahay a muwã kwa? Na gi gwat mikaslsla, yo gi gwat mijeŋŋe na, ki tiram di ɓi miɗalak ka muwuŋ vur mike?

¹³ Ki mumulom asi kum mulumam bugawla a Lodebar na, i walahay mupuɗaw ta ma kini, joˀ ki ɓam: Ndra mitiɓaka walahay Kornayim, walahay migidaŋ na, ti gidaŋ ndra ta kwa?»

¹⁴ Kum Israyeley, ani i wuɗ i pa mi da sukwi mekelem, ɓa ara guzuvurukum, zle a Lebo-Hama, hã sesẽŋ a mizaw Araba. I ya Bumbulvuŋ misi gidaŋ wãˀ maɓi.