AMOS 4 - Bible en langue guiziga

¹ Kum madiya sla ngi Basaŋhay, kum majiginam a muwã Samari, ki ra zumaka gwat ngi mizli migeˀ irceceheye, ki ra guzuvuraka misi murgahaya, ki ɓaka zil kumoyo: «so ti gwat ngi si, sukum di.»

² Bumbulvuŋ a hudum le ti slimiɗ nga naŋ mipal na, a ɓi: «Ani hin ara ndilawa avu kumo, tapasa a sa jukum ti ngalumoy ka kilif, yo a sa jaka ziri ngi kwacay kumoyo ngik ngik ti ziwit misi slimiɗey.

³ Ki sa bam tir mifiliw ngi walahaya, mbur gar a sa kil, dibiɗ dir a mbuŋ naŋ, kisa kilam kini ngir ti Hermoŋ. I ya Bumbulvuŋ maɓi.

Sipi jiviɗ ngatara lambaˀ

⁴ A ram nga Betel, mbiɗam hirnga avu ya a diga, mbiɗam hirnga makaw mbeˀ mbeˀ avu ya a Gilgala, prik prik na, gaka mikuli kumoyo yo ar hin mimakir naŋ na, vulaka mukuruˀ ngi gwat kumoyo.

⁵ Mikuli ti gwat ngi zum manja is ara na, wuraka ngi hunuma Buymisemuŋ, tilam mi ti ɓi vula gwat ngi mongoyo da mizli gar, asi gwat kum mawuɗama i nah so takwa Israyeley. I ya Bumbulvuŋ Buymisemuŋ maɓi.

Ɗaˀɗaˀ le kwana, i ngataraŋ

⁶ Ar walahay madiɗa kumoy gar, miga ɓa gwat ngi ci nga kwala anta na, i ya, yo a hay kumoy gar ma na, miga ɓa milef rum anta kwana i ya. Amma gar ti nah na, ki moko ng'avi ya ta. I ya Bumbulvuŋ maɓi.

⁷ Miga ɓa vuŋ a cici, naɓa a ndir kiya makir ɓa sifi a gi na, i ya vuna si, i ga vuŋ ar walahay mekeleme, yo ar walahay numuŋ i ga ta, guva mekelemey a lumam vuŋ le, amma numuŋhoy ara muˀulom.

⁸ Mizli ngir walahay cuw malla makir, a ram ng'asi yam ar walahay mekeleme manja a kiɗa taŋ madalyama. Gar ti nah kwana, ki moko ng'avi ya ta na si. I ya Bumbulvuŋ maɓi.

⁹ I go jijihey wal wal da daw ngir guva kumoyo, a muˀulom, a zãˀãm. Gwat ngir jarne kumoy ati gudubun kumoy, ˀuruf kumoy waɗ tutumbur kumoyo, birnjeɗek a zuma taŋ le pay. Gar ti nah kwana, ki moko ng'avi ya ta na si. I ya Bumbulvuŋ maɓi.

¹⁰ I slino jiji mozorbono a wuzla kumo kaɓa migi zleˀe a Ezipte na, i kiɗa gawla kumoyo le vagay vagay ti maslalam, yo i tiɓa pilis kumoyo le, yo zĩˀĩ ngi vagay ngi mizli misi ar walahay guɗuk kumo, aru sesẽŋ a hutuŋ kum. Gar ti nah kwana, ki moko ng'avi ya ta na si. I ya Bumbulvuŋ maɓi.

¹¹ I mbiɗa gwataya le pulaˀ pulaˀ gar a hay kumo, kaɓa migi zleˀe a Sodom waɗ a Gomor na. Kum zleˀe kaɓa misliŋ vu muɗuɗoko di le tir vu. Gar ti nah kwana, ki soko ng'avi ya ta na si. I ya Bumbulvuŋ maɓi.

¹² Vurˀe, gwat ya mawuɗ i guw di na, kisa pura ti hiri ɗik so Israyel. Naŋ kine, ka misina i sa gi ti kakanah na, juw vu nga ji hirnga ti Buymisemuŋ ɗike so Israyel.

¹³ Pura Mbur miga muwãhaya n'ani, miga himiɗi, gwat, naŋ maga gar na, a njika da mizli, a tiri ti luvuŋ njahha, maru di gi ar li ɗigar ngi si ruwuyoy, a zilaka Bumbulvuŋ, Buymisemuŋ misi gidaŋ wãˀ.