ƁI NGI HIN GAR MUDUMBUŊ NAŊ 28 - Bible en langue guiziga

Davit mibiga Salomoŋ ɓa ci ar li naŋ.

¹ Buy Davit a cikila buy ngi Israyeleye gar a Zeruzaleme: buy ngi sukwihey, buy ngi sojehey mingac ngac magam slra ngi buy, buyoy muwam soje durmuk durmuk ati skat skatay, buy miji zlili naŋhay, miwi ginewey misi a ɓuh ati miwi ziri naŋhay, mizli munguɗohoy, mizli miwirwirey ati mupuɗaw puɗaway gar.

² Buy Davit a slikiɗ deŋ, a ɓa taŋ na: «Sukum ɗuwoy ati mizli ɗuwoy, cinaka mingiɓi ɗu ɗi. Ndira hay ngi ki akoti ngi jumoˀay ngi Bumbulvuŋ waɗ li ɗuva sar ngi Buymisemuŋ ndra na, wuluk naŋ naŋ da a mevel ɗu, yo i juw vu le ɓa i ndiraŋ.

³ Amma Buymisemuŋ a ɓiy na: Masa ndiriy hay da ya i ka ta, asi ka ki mbur ngi vurum, yo ki pi pumbus le.

⁴ Bumbulvuŋ Buymisemuŋ ngi Israyel, a winiy le a wuzla muy ɗuwoyo, ɓa i cifi buy ngi Israyel ngi sete. Zleˀe na, a wini ngi buyo i Zuda. A dirba nah, ar sukwi ngi Zuda, a wini i hay ngi baha, yo a wuzla ziri ngi bahahaya, a hiyĩ le ɓa yi zum buy ar Israyel keɗeɗe gar.

⁵ A wuzla ziri mizile ɗuwoy mihaɗi, Bumbulvuŋ muvuliy taŋ na, ngi cifi ar janga ngi a naŋm, ngi zumabuy ar Israyel na, a wini di i Salomoŋ.

⁶ A dirba nah, Bumbulvuŋ a ɓiy: Masa ndiriy hay jom ti wazlaray naŋhay i mangal ɗik Salomoŋ, asi yi wunaŋ le, ɓa a tiri mangal ɗu, yo ya kwana, yi sa tiri cine.

⁷ Da ara ciniy mi, aro teŋteŋ avu ɓimuɗuva ɗuwoy ati ɓimujuwa ɗuwoy, kaɓa dana ani na, gidaŋ ngi zumabuy naŋ a sa ndir ngi sete.

⁸ Na wurenna a mbuŋ Israyele gar, a mbuŋ kus ngi mizli ngi Bumbulvuŋhoy, yo a mbuŋ Buymisemuŋ ndra na, dubunaka ɓimuɗuva ngi Bumbulvuŋ Buymisemuŋ kumo, yo jaka a hirnga, ɓa ki lumaka hirwuy mezle hana, joˀ kisa pulaka a ndir da ziri kumoy wãˀ ngi set a dirba kumo.

⁹ Na ka, mangal ɗu Salomoŋ, dubuna si na bunuko, gi gawla naŋ ti mevel purla, yo ti membezleŋ ngi vu miwirwir. Asi Bumbulvuŋ ara ci a kwacay mizli gar, yo a sla wala ngi wuluk ngi mizli le gar. Da ki ra sipaŋ na, a sa buguw vu ɓa ki lumaŋ. Amma da ki pulaŋ le fuk na, a sa huzuguw a avra ngi sete.

¹⁰ Pura wurenna, Bumbulvuŋ a wunuˀw le ɓa ki ndiraŋ hay, ɓa a tiri li nga naŋ, cici zlak, yo gi slra.»

Ɗerewol mutohoko hay ngi Buymisemuŋ toh toh araŋ, Davit a vula da mangal naŋ ɓa a sa ndira kanah

¹¹ Hay ngi Buymisemuŋ mutoho toh toh ngi ndir na, Davit a vula ɗerewol nah da mangal naŋ Salomoŋ, ɓa a ndira jom ti jawleeru naŋ, hayay, hay ngi pi gwatay, hay vay muŋhoy, hay ngi huroˀohoy, waɗ hay ngi akoti ngi Buymisemuŋ.

¹² A vulaŋ ɗerewol naŋ mutoho toh toh, naŋ muro ti wuluk ngi gi naŋ ngi gi naŋ a wazlaray ngi hay ngi Bumbulvuŋ gar, hayay ngi ndir gun gun a ciki wazlaray, hayay ngi cikila zlili ar hay ngi Buymisemuŋ waɗ gwat muvula taŋ le da Buymisemuŋ.

¹³ Dar a vulaŋ slimiɗ ngi masayay ati levihey, mingica taŋ le ngac ngac, slrahay ngi gi ar hay ngi Buymisemuŋ waɗ gwat ngi gi slrahay ar hay ngi Buymisemuŋ.

¹⁴ A bigaŋ wi ɓiri tapasl tapasl vur gwat ngi slraˀahaya tiɗeˀe, ɓa a pa taŋ ti naŋ, yo a bigaŋ wi ɓiri bara vur gwat ngi slraˀahaya tiɗeˀe, ɓa a pa taŋ ti naŋ.

¹⁵ Yo a waŋ dudok ngi li ɗuva lampe ati lampehey mipaka taŋ ti ɓiri tapasl tapasla, waɗ li ɗuva lampe ati lampehey mipaka taŋ ti ɓiri bara, vur slra taŋ vur slra taŋ.

¹⁶ Tabul ngi ɓiri tapasl tapasl ngi pi ɗaf ngi vul da Buymisemuŋ ati tabul ngi ɓiri bara, a waŋ dudok taŋhaya tiɗeˀe.

¹⁷ A waŋ dudok ngi kuyer ngi zliga useˀey, dudok ngi kop ngi kuca lihey, gongoŋ ngi ɓiri tapasl tapasl pal naŋ, kisa ngi ɓiri tapasl tapasl ati ngi ɓiri gaza, vur slra taŋ vur slra taŋ.

¹⁸ A waŋ dudok ngi ɓiri tapasl tapasl pal naŋ, ɓa ngi ɗiya li gi mikuli ti urdi. A vulaŋ ɗerewol misi mota ngi vurum toh toh ara, ɓa a ɗiya kanah, waɗ ngi kerubeŋhey misi zlara njar njar sirit hirnga ngi akoti ngi jumoˀay ngi Bumbulvuŋ.

¹⁹ Dar Davit a ɓi: «Gwat tayna cek, t'ada angi ɗerewol Bumbulvuŋ muvuliy di na, ɗerewol nana, a bo ti gwat ngi ɗiyiheye le pislek pislek wãˀ».

²⁰ Joˀ Davit a ɓa mangal naŋ Salomoŋ na: «Mangal ɗu, tum vu tum, yo cici zlak! Zla slra, ki zluwun ta, ki jijik ta! Asi Bumbulvuŋ Buymisemuŋ ɗu na, naŋ da ati ka. N'anta a sa puluw fuk ta, hã avu kiɗa mi ngi slra ngi hay ngi Bumbulvuŋ wãˀ.

²¹ Masayay ati levihey, mingica taŋ le ngac ngac ngi gi slrahay gar ngir hay ngi Buymisemuŋ, t'ani joa ciki ɗike ni. Vur slrahay gar na, mizli misi mevel mezlehey, misinaka slrahay le, buyoy ati mizli gar t'ada vur ka»