ƁI NGI HIN GAR MUDUMBUŊ NAŊ 23 - Bible en langue guiziga

Davit mucufa Levihey ti ngay taŋ ti ngay taŋ.

¹ Davit a zum ɗaf le, a gi gal le kucup wãˀ. A ca mangal naŋ Salomoŋ i buymadiɗa ngi Israyel.

² Dar a cikila buy ngi Israyeley gar, masayay waɗ Levihey.

³ Levi misi vi kukur makir malla mufunaka le na, a slufaka taŋ purla purla gar. A gam jom gar na, mizli mizilehey durmuk kukur makir nga dangafaɗa.

⁴ Davit a wini asi taŋ mizli durmuk kukur cuw nga mufaɗ ngi jigina slra ngi ndira hay ngi Bumbulvuŋ. Mizli durmuk merkeɗ ngi toho gwatay waɗ ngi gi kiita.

⁵ Mizli durmuk mufaɗ ngi jigina mizlingreŋ, yo durmuk mufaɗ ngi hunuma Bumbulvuŋ ti gwat ngi dunguroy, Davit miɗiya taŋ hĩˀĩ.

⁶ Davit a ngica Leviheye, vur dideˀ vur dideˀ, ngi Gersoŋhoy, ngi Kehatay waɗ ngi Merarihey.

⁷ Ziri mizile ngi Gersoŋhoy i ti Ladan ati Simey.

⁸ Ziri mizile ngi Ladanaya makir: modogomo i Yehiyel, a dirba naŋ i Zetam ati Zowel.

⁹ Ziri mizile ngi Zetamaya makir: i ti Selomit, Haziyel waɗ Haraŋ micifi buy a wuzla muy ngi Ladanay.

¹⁰ Ziri mizile ngi Simeyeye mufaɗ, i ti Yahat, Ziza, Yewus waɗ Beriya.

¹¹ Modogomo i Yahat, Ziza i mijingaˀ naŋ. Amma Yewus ati Beriya a yam ziri mizilehey haɗi ta, a vulaka slimiɗe jom arleˀe, ɓa a gaka slra kaɓa hay purla.

¹² Ziri mizile ngi Kehataya taŋ mufaɗ, i ti Amram, Isar, Hebroŋ waɗ Uziyel.

¹³ Ziri mizile ngi Amramay i ti Aroŋ ati Moyis. A gwahaka Aroŋ ati ziri naŋhaya gwah pal ngi wãˀ, ngi gi slra ngir li mipal wãˀ. A wuram urdi a mbuŋ Bumbulvuŋ, a gakaŋ slra, yo a ɗuwulaka mi da mizli ti slimiɗ ngi Bumbulvuŋ.

¹⁴ Moyis i mbur ngi Buymisemuŋ, a slufaka ziri naŋhaya le a wuzla sukwi ngi Levi.

¹⁵ Ziri mizile ngi Moyisey i ti: Gersom ati Eliyezer.

¹⁶ Mangal mizile ngi Gersom Sebuyel madogom naŋ.

¹⁷ Mangal ngi Eliyezere, naŋ kpesl purla, i Rehabiya, a yi mekelem mata, amma Rehabiya a yi haɗi.

¹⁸ Mangal ngi Isara kpesl purla, i Selomit.

¹⁹ Ziri mizile ngi Hebroŋhoyo, modogom i Yeriya, mijingaˀ naŋ i Amariya, mimakir taŋ i Yaziyel, yo mumufaɗ taŋ i Yekamam.

²⁰ Ziri mizile ngi Uziyeleye, modogom i Mika, mijingaˀ naŋ i Isiya.

²¹ Ziri mizile ngi Merarihey i ti: Mali ati Musi. Mali a yi mizilehey cuw, i ti Elazar ati Kis.

²² Elazar a muc manja mizile, a pul mongosohoy halla, i sukum taŋhay, ziri ngi jamba taŋ Kis muɗuvaka taŋ.

²³ Musi a yi ziri mizilehey makir, i ti: Mali, Eder waɗ Yeremot.

²⁴ Ziri ngi Levihey i taŋ so, i buyoy a wuzla muy taŋhaya. A slufaka taŋ purla purla, a tohoko taŋ ng'ar ɗerewol ngi zila slimiɗe. Slra taŋ i slra ngir hay ngi Bumbulvuŋ, a zlaka zle ti vi kukur cuw hã nga mbuŋ.

²⁵ Naŋ kine, Davit a ɓi zleˀe na: «Bumbulvuŋ Buymisemuŋ ngi Israyele, a vula zuy le da sukwi naŋ, naŋ vuna a sa ndir ngi caˀa a Zeruzaleme.

²⁶ Yo mana, Levihey, anta sa jijiraka guɗuk ati gwat ngi slraˀahaya ti jijir mata.»

²⁷ Amma ar mingiɓi Davit miɓa ngi dirba na, toho slimiɗ ngi Levihey ar ɗerewolo, a zli ti vi kukur cuw hã nga mbuŋ.

²⁸ A gam slra ar hay ngi Bumbulvuŋ, a wazlarayay, ar viŋhey, a bunaka gwat muvula le da Buymisemuŋ gar waɗ slra ngi gi ar hay ngi Buymisemuŋ ma.

²⁹ A kam slimiɗ ar ɗaf muvula le da Buymisemuŋ, hapa mukuɗ kuɗ ngi vul da Buymisemuŋ, tambali manja ˀis a ra, maɗaf mutuso, maɗaf milahaɗaŋ, yo a kam slimiɗ ar gwat ngi wi dudok ngi gwatay ati jek ngi gwatay.

³⁰ T'ada weˀ vu, prik pastaˀ ngi hunuma Bumbulvuŋ, yo ngi jaŋ salalay.

³¹ Da ara gam mikuli mizlam zlam da Bumbulvuŋ, ar hin ngi sabat, hin ngi kiya muslo le, waɗ ar hin ngi muguzlumoy na, a hunumakaŋ, yo a jakaŋ salalaya ma, slaf slaf kaslsla ar hin naŋ mislaka taŋ di, ɓa a gaka ngi set a mbuŋ Bumbulvuŋ.

³² Asa jiginaka guɗuk waɗ hay ngi Buymisemuŋ, yo a sa gaka slra ngir hay ngi Bumbulvuŋ jom ati sukum taŋ ziri ngi Aroŋhoy.