ƁI NGI HIN GAR MUDUMBUŊ NAŊ 21 - Bible en langue guiziga

Davit miɓi ɓa a slufaka Israyeley

¹ Ngi pas numuŋ ada na, Satan a wuɗ a ga malambaˀ da Israyeleye, a pa mi da Davite ɓa a slufa Israyeleye.

² Davit a ɓa Zoˀap ati buy ngi soje mekelemeye: «A ram, slufaka Israyeleye zle a Beˀer-Seba hã sesẽŋ a Daŋ. A dirba nah, ki sikiy ti mingiɓi naŋ, ɓa i si na da mizli taŋ kiteka na.»

³ Zoˀap a mbiɗa da buyo: «Kumani, anja Bumbulvuŋ a ska Israyeleye makaw skata. Taŋ dana i gawla ɗikey cek si. Naka mawaɗ sluf taŋ, ɓa ki si na da taŋ kiteka na ngi mi maka? Ki wuɗ ki ci ti taŋ ar mungra vur mike?»

⁴ Amma mingiɓi ngi buy tuwa, i tikaˀay avu Zoˀapa. A zuɓa jiviɗ, a guno Israyele kurzluˀ gar, a mo nga Zeruzaleme muŋ.

⁵ Dar Zoˀapa, a ɓa ɓi ngi taˀ ngi mizli muslufahay tuwa da Davite, a ɓaŋ: mizli Israyeley gar mikiɗa vu ti maslalam gu na, taŋ miliyoŋ pal ti durmuk skata. Mizli Yudahay, mikiɗa vu ti maslalamay gu, taŋ mizli durmuk skat skat mufaɗ ti kukur tarnaˀ.

⁶ Zoˀapa, a slufa sukwi ngi Levi ati ngi Benjameŋ a wuzla taŋ ta, asi mingiɓi ngi buyo, a ja mevel le haɗa da Zoˀapa.

Buymisemuŋ mukuta Davit asi malambaˀ naŋ

⁷ Gwat Davit miga na, Buymisemuŋ a pura kuy ta, a kuta Israyeley ti bonoy.

⁸ Dar Davit a ɓa Buymisemuŋ na: «I gi mungra madiɗa le. Amma wurenna, ambuh puliy mungra ɗu takwa, asi i gi na kaɓa mibirngaŋ!»

⁹ Gat mbur mupur ngi Davite, Bumbulvuŋ a ɓaŋ ani:

¹⁰ «Aru ng'avi Davit, ara ɓaŋ na: Bumbulvuŋ a ɓuw ani: bonoyoy ani makir, zuɓ pal asi taŋ, ɓa i gaŋ»

¹¹ «Gat aru ng'avi Davite, a ɓaŋ so na: «Bumbulvuŋ a ɓuw ani: ki wuɗ wanaka?»

¹² May angi vi makir kwa? Malla hĩhĩy angi kiya makir, mesene ɗikey a sa kuɗuku ti maslalam. Malla angi hin makir, Bumbulvuŋ a sa kiɗa ruwuy kumo ti maslalam. A sa slino ti modro naŋ mingizla vu, a so ti jiji mangizl vu sunok sunok asi ruwuy Israyel gar. Wurenne wuluk so, mbiɗiy di, ɓa yi ra ɓa da mbur mislino ya.»

¹³ Davit a ɓa Gata na: «Didak a muɗiy le haɗa. Zuwen ya madiɗ asi haŋ ngi Bumbulvuŋ, a funa ya madiɗ asi haŋ ngi mizli na le, asi Bumbulvuŋ a pur ircece haɗi!»

¹⁴ Bumbulvuŋ a slino jiji mangizl vu sunok sunok nga ruwuy Israyele, a kiɗ mizli durmuk kukur tarnaˀ asi ruwuy Israyele.

¹⁵ Buymisemuŋ a slina modro naŋ ɓa ara ngizla mizli a Zeruzaleme. Ti modro mangizla mizli tuwa na, Bumbulvuŋ a pura, a gaŋ kuy a mevele mata. A ɓa modro mingizla vu: «Muk muduba, muɗa haŋ ɗike!» Naɓa modro ngi Bumbulvuŋ naŋ deŋ gweˀ zleˀe avu məlaŋ ngi Ornaŋ mbur Zebusi.

¹⁶ Davit a zuɓa hiri, keɗ na, modro ngi Bumbulvuŋ deŋ ar wala ngi ruwuy ati muŋ, maslalam naŋ mumuɗa kaw a haŋ, pak ng'ar Zeruzalem. Davit ati mizli micawwahaya, taŋ ti zana ngi vagay a vu vu, a hurkom huruk huruk a ruwuy.

¹⁷ Davit a ɓa Buymisemuŋ na: «Miɓi ɓa a slufaka mizli i ya takwa? Migi mungra, yo muzluɓ ɓi i ya. Amma mizli migeˀ ircece hanayna a gam mike? Bumbulvuŋ Buymisemuŋ ɗu, anja ki kuti di ya ati hay ɗu si, amma ki slino ti bonoy nga hirnga mizli ɗikeye ta.»

Davit mindira li gi mikuli da Buymisemuŋ

¹⁸ Modro ngi Bumbulvuŋ a ɓa Gata: «A ra ɓa Davite na: ɓa aru ng'ar məlaŋ ngi Ornaŋ mbur Zebusi, ɓa ara juw li gi mikuli da ya Bumbulvuŋ a diga.»

¹⁹ Dar Davit aru kaɓa Gat miɓaŋ di ti slimiɗ ngi Bumbulvuŋ tuwa.

²⁰ Naɓa Ornaŋ ara ɗug daw zleˀe, a mbiɗa hiri pulaˀ, keɗ na, modro ngi Buymisemuŋ deŋ, yo ziri naŋ mizilehey mumufaɗ misi a cikeˀe, a ɗumom le.

²¹ Davit a so ng'avi Ornaŋ tuwa, Ornaŋ a ɗuva hiri taˀ na, Davit deŋ, Davit a bi tir məlaŋ tuwa ng'avra, a huruk huruk a mbuŋ Davite.

²² Akẽh na, Davit a ɓa Ornaŋ na: «Vuliy məlaŋ ɗik na, ɓa i ndira li gi mikuli da Bumbulvuŋ ara. Inga vuliy di, i hiɗika ti cikili naŋ kaslsla, ɓa doflo midiɗo vu kpis ar mizli na, a kiɗ mi muduba.»

²³ Ornaŋ a ɓa Davite: «Tuɓa da ka, anja ka kumani ɗu buyo, a gi di kaɓa ka muwuɗu. Pura ɗi, i vuluw slahay ani ngi gi mikuli mizlam zlama, mota ngi slahay ani, bul vu ti dum nah, yo alkamari n'ani, gi di sedege ngi gwat ngi migama, i vuluw gwataya gar si.»

²⁴ Amma buy Davit a ɓa Ornaŋ tuwa: «Kanah ta! yi wuɗ i hiɗika ti cikili naŋ kaslsla. Gwat ɗik mana, i tiɓa da Bumbulvuŋ, i gi di mikuli mizlam zlam misi cikili naŋ a giriy neˀ ta na, a gi ta.»

²⁵ Dar Davit a vula suloy ngi ɓiri tapasl tapasl skat skat merkeɗ ngi hiɗika məlaŋ tuwa.

²⁶ Davit a ndira li gi mikuli da Bumbulvuŋ ara, a gi mikuli mizlam zlam waɗ mikuli ngi luuma zuy a diga.

²⁷ Akẽh so na, Bumbulvuŋ a ɓa modro naŋ, ɓa a ca maslalam naŋ ng'ar hay a muŋ.

²⁸ Davit a pura na, ar məlaŋ ngi Ornaŋ mbur Zebusi tuwa, Bumbulvuŋ a cine tuwuy naŋ le, dar a gi mikuli a diga bulaw le ta.

²⁹ Ti di nana, naɓa hay Moyis miɗiya da Bumbulvuŋ na, naŋ a wuzlaɓuh, yo li gi mikuli mizlam zlama kwana, naŋ ar li miɗingir ngi Gabaˀoŋ.

³⁰ Amma Davite, naŋ anta ru nga pura Buymisemuŋ a diga gu ta, asi modro ngi Bumbulvuŋ, a gaŋ zluwun le haɗi ti maslalama.