ƁI NGI HIN GAR MUDUMBUŊ NAŊ 20 - Bible en langue guiziga

Zoˀap mitiɓa walahay Raba

¹ Ngi vi mekelem, hirak ti buyoy maram ng'ar vurum kaɓa hõyyõ na, Zoˀap aru ti sojeheya, ara musukuɗoko hirwuy ngi Amoŋhoyo tur. A cam nga Raba ruwuy hirnga, na Davite naŋ a cifi a Zeruzalem. Zoˀap a tiɓa Raba, a musukuɗo tur.

² Davit a muɗa loppol ngi ɓiri tapasl tapasl misi a hirnga kuli taŋ Milkom, a tutumaka na, a gi gwat ngi kilo kukur makire, yo ɗugur mupuɗaw ada law ava ma. A caka nga hirnga Davit. A hilam gwatay ar vurum hana haɗa.

³ Davit a ɓulo mizli ngi digahaya ɓak ɓak, a vula taŋ slra mitakˀay: ngi cira dum, ngi ciɗa ɗuguroy waɗ ngi hizigiɗa dumoy. Davit a gi ti walahay ngi Amoŋhoyo cek kahana. A dirba nah, a mam ati soje naŋhaya nga Zeruzalem a muŋ.

Israyeley migam vurum ati Filistihey

⁴ A dirba nah ma na, Israyeley a gam vurum ati Filistihey a Gezer ma. Ar vurum nah, Siɓkay ngi ruwuy Husa, a kiɗa Sipay dideˀ ngi Refayaya vagay, joˀ Filistihey a hinam hirnga a mbuŋ taŋ.

⁵ Kiɗavu mekelem a gi ati Filistiheye ma, Elanaŋ mangal ngi Yaˀir, a kiɗa Lami vagay, Lami i sukum ngi Goliyat mbur Gat, misi dum ngi ziwit naŋ ɓiɓir ɓiɓir ka munduɓuk ngi caka tuwa.

⁶ A gam vurum mekelem a Gata ma, mbur soje suburo ada, muzuŋ haŋ ati muzuŋ saraya merkeɗ merkeɗ, a jum kukur cuw nga mufaɗ. Naŋ i dideˀ ngi Harafa vuna ya.

⁷ A zla zi Israyeleye, dar Yonataŋ mangal ngi Sama, sukum ngi Davit ngi jamba, a kiɗa vagay.

⁸ Soje Filisti tayna, i dideˀ ngi Harafahay, mbur Gat. A ndilam asi haŋ ngi Davit ati soje naŋhaya.