ƁI NGI HIN GAR MUDUMBUŊ NAŊ 19 - Bible en langue guiziga

Amoŋhoy mipaka mesem da mizli madiɗa ngi slra ngi Davitey

¹ A dirba nah, Nahas buy madiɗa ngi Amoŋhoy a mucu, joˀ mangal naŋ a cifi buy ar li naŋ.

² Davit a ɓi so na: «I sa ga mezle da Hanun mangal ngi Nahasa, asi cine a giy di le zleˀe kanah ya.» Davit a slin gawla naŋhay, ɓa ara tikinakaŋ ar li tuwa cine. Dar gawla naŋhay tuwa, a ndilam a hirwuy ngi Amoŋhoy.

³ Amma yarma ngi Amoŋhoy a ɓaka Hanuno: «Davit mislino gawla naŋhay na, i ngi tikinuw ar li tuwa bunuk tew kwa? I ngi pura li, ngi pi mi da mizli, ɓa a sa tiɓaka ruwuyo ta kwa?»

⁴ Akẽh na, Hanun a ja gawla ngi Davitey tuwa, a hija taŋ mazlamaya, a buko taŋ zanahaya hiɗiyaŋ hiɗiyaŋ hã a virzi, dar a ɓula taŋ.

⁵ A ra ɓaka ɓi ngi gwat migi avu gawlahay tuwa da Davite, dar Davit a slino mizli nga ji ti taŋ hirngaŋ, asi a roko ti mesem. Davit a ɓi ɓa a ɓaka taŋ: «Cifam a Zeriko akẽh, sey da mazlamay a puso le kwaɗay, ɓa kisa soko»

Davit migam vurum ati Amoŋhoy waɗ Sirihey

⁶ Hanun ati Amoŋhoy a puraka na, a zluɓam ɓi le haɗa avu Davite, a slinam ti suloy ton kukur makir da mizli Aramay misi ar wala ngi mizaway mucuw waɗ da Aramay misi a Maˀaka ngi Soba, ɓa a vulaka taŋ mota ngi vurumoy ati misi pilisey

⁷ A wuɗam ngavi soje taŋhaya, mota ngi vurumoy durmuk kukur makir ti cuw, yo a wurkaka slra ngi buy Maˀaka ati soje naŋhaya. Taŋ a soko, a pam ar vay Medeba, yo Amoŋhoyo, taŋ muboko tir walahay taŋhaya na, a kusom hirnga nga kiɗa vu.

⁸ Davit micina cin si na, a slina Zoˀap ati soje gambaraˀahaya cek.

⁹ Mizli Amoŋhoy, ara cinjaham a mizlingreŋ ngi walahay taŋ hirnga, ɓa ngi kiɗa vu. Buy madiɗa muso nga jini taŋ tuwa, taŋ a cinjaham pal taŋ a ɓuh.

¹⁰ Zoˀap a pura keɗ keɗ na, kiɗa vu naŋ ti dirba tumbuŋ. A wini soje mezle mezle a wuzla Israyeleye, a cinjaha taŋ a puɗak angi Siriheye.

¹¹ Dar a pula is ngi soje mekelemeye da sukum naŋ Abisay, yo a cinjaha soje tayna a puɗak angi Amoŋhoy.

¹² Zoˀap a ɓa sukum naŋ na: «Da mizli Aramay a funikiy le ti gidaŋ na, ki kilo widi ɗo, yo da Amoŋhoy a funukuw ka le ti gidaŋ ya kwana, yi kilo widi ɗike ya.

¹³ Tum vu tum, gukum wirwir ar li kiɗu vu, vur sukwi ndra waɗ vur walahay ngi Buymisemuŋ ndrahay. Yo anja Bumbulvuŋ a ga ka naŋ muwuɗu.»

¹⁴ Dar Zoˀap ati soje naŋhaya, a girjaham nga kiɗa vu ati Aramaya. Taŋ a zlaka kil a mbuŋ taŋ.

¹⁵ Amoŋhoy mupuraka Aramay ara kilam na, taŋ kwana, a zlaka kil a mbuŋ Abisay sukum ngi Zoˀap tuwa ya, a mam ng'ar walahay a muŋ. Dar Zoˀap kwana, a mi nga Zeruzalem.

¹⁶ Aramay a puraka na, Israyeley a kiɗaka taŋ le. A slinam ngavi cil taŋ Aramay misi ti dubazawa. Sofak buy ngi soje ngi Hadadezerey, naŋ ɓaˀ a mbuŋ.

¹⁷ A faka ɓi naŋ da Davite, Davit a cikila soje ngi Israyeleye cek, a tuwuɗaka mizaw Zirdeŋ, taˀdibiɗ ng'ar taŋ, a cinjaham cinjah cinjah a mbuŋ taŋ. Davit a cinjaha mizli naŋhaya cinjahha a mbuŋ Aramaya. Dar Aramay a zlaka kiɗa vu.

¹⁸ Amma Aramay a zlaka kil a mbuŋ Israyele, yo Davit a kiɗ asi taŋ, mizli misi mota ngi vurumoy durmuk tarnaˀ, waɗ mizli misi saraya durmuk kukur mufaɗ. A kiɗa Sofak buy ngi sojeheye le ma.

¹⁹ Gawla ngi Hadadezerey mupuraka Israyeley a kiɗaka taŋ le tuwa na, dar a jumom ngavi Davit, a tiram gawla naŋhay. Diga ti nana, mizli Aramay anta ngumam kila widi ngi Amoŋhoyo mata.