ƁI NGI HIN GAR MUDUMBUŊ NAŊ 16 - Bible en langue guiziga

¹ A cam ti akoti ngi Buymisemuŋ tuwa ng'ar guɗuk, Davit miɗiya hĩˀĩ vurˀe tuwa, a ɗuvaka taˀ a wuzla. A dirba nah, Davit a gi mikuli mizlam zlam wãˀ da Buymisemuŋ waɗ mikuli ngi luuma zuy a mbuŋ Buymisemuŋ.

² A dirba Davit mikiɗa mi ngi gi mikuli mizlam zlam wãˀ ati mikuli ngi luuma zuy tuwa na, a ɗuwula mi da mizli ti slimiɗ ngi Bumbulvuŋ.

³ A dirba nah ma na, a wunka taŋ gwat ngi zum: diga mbur zil, diga ngwasa, mbur gar a lum ɗaf fiteɗ fiteɗ, makali ngi dibinoji, waɗ makala ngi gudubun muˀulo.

Levihey mizlam dimis ngi hunuma Bumbulvuŋ

⁴ Mizli Levihey magam slra, cah asi taŋ, Davit a cifa taŋ a mbuŋ akoti ngi Bumbulvuŋ, ngi gi muguzlum ngi wuluk ar Bumbulvuŋ, ngi hunumaŋ, ngi ga dudok da Bumbulvuŋ Buymisemuŋ ngi Israyel.

⁵ Buy ɓi i Asaf, yo Zakari kwana i gawla naŋ. Ti Yaziyel, Semiramot, Yehiyel, Matitiya, Eliyap, Benaya, Obet-Edom waɗ Yehiyele, a kiɗam nga taŋ i gujuvur waɗ garaya, na Asaf a kiɗ nga naŋ i jãwjãw ti gidaŋ.

⁶ Benaya ati Yaziyel, masayaya, ara fam zara mbak le ta, a mbuŋ akoti ngi jumoˀay ngi Buymisemuŋ.

⁷ Davit muvula slra da Asaf ati Levi mekelemey na, tapasa i sar mudumbuŋ aruŋ.

⁸ Dimis taŋ mizlaka anihĩ: Gaka sise da Bumbulvuŋ, zilaka slimiɗ naŋ ti gidaŋ. Bugaka gwat mezle naŋhay a wuzla mizli.

⁹ Hunumakaŋ ti dimisi, kiɗakaŋ gwat ngi gi dunguroy. Cekene naŋhay naŋ miga taŋ gar na, maka hiri ngi ɓa ɓi taŋ a muŋ.

¹⁰ Jijaham ti slimiɗ nga naŋ Buymisemuŋ, kum masipam Bumbulvuŋ na, mumulom!

¹¹ Supaka Bumbulvuŋ, ɓa ki lumam gidaŋ naŋ, sipaka mbak le ta, ɓa ki puraka hiri naŋ.

¹² Wulkam keŋ ar cekene naŋhay, naŋ miga taŋ, ar gwat migam ɗaˀ tahay, ar ɓi naŋ mujuwa ti mi ngi balam naŋ,

¹³ kum gawla naŋhay, dideˀ ngi Israyeley, kum ziri ngi Zakopoy, naŋ muwunukum,

¹⁴ Bumbulvuŋ Buymisemuŋ ndra i naŋ miwa duniya keɗeɗe.

¹⁵ Wulukam keŋŋe ngi set ar jumoˀay naŋ, a ɓa mingiɓi naŋ vur dideˀ dideˀ durmuku.

¹⁶ I jumoˀay naŋ ati Abraham. A mahiri naŋ ti hudum da Izak.

¹⁷ A tiri di ɓi micica avu Zakopo, i jumoˀay ngi set da Israyele.

¹⁸ Ti naŋ miɓi: «I vuluw ruwuy Kanaˀan, i mi ngi kum na!»

¹⁹ Na ɓa dideˀ ndraˀahaya taŋ haɗa ta, a slufam slaf slafa si, taŋ i moholoyoy njireˀ kini asi ruwuyo.

²⁰ A slikiɗam a wuzka sukwi aka aka, a ruwuy ngi buy aka aka.

²¹ Amma ko Buymisemuŋ anta pula mbur a ɗuva taŋ sar a duba sar ta. a ga bonoy da buy madiɗahay asi taŋ.

²² A ɓi: «Mizli muwunaˀ ɗuwoy na, ki jaka haŋ avu taŋ ta, ki gaka malambaˀ da mijiviɗ ɗuwoyo ta»

²³ Duniya keɗeɗe, hunumaka Buymisemuŋ ti dimisi! Tilam mi ti ɓi ngi laha vu naŋ, vur hine vur hine.

²⁴ Tilam mi ti dudok naŋ a wuzla sukwi ngi mizli, tilam mi ti gwat mezle naŋhay a wuzla mizli gar.

²⁵ Asi Bumbulvuŋ naŋ madiɗaŋ, a ndila le ɓa a hunumakaŋ, a gi zluwun, yo a funa kuliheye le gar:

²⁶ kuli ngi mizli gar na, i ngatara lambaˀ. Na Bumbulvuŋ a ga muŋ le.

²⁷ Li ara wucuɗ, li njahha a mbuŋ naŋ. Gidaŋ ati cira hiri, taŋ ar li naŋ misi ara.

²⁸ Mizli ngi si ruwuyoy gar, soko ɗuvaka hirnga da Bumbulvuŋ, tilam mi ti dudok naŋ ati gidaŋ naŋ.

²⁹ Soko, tilam mi ti dudok naŋ, soko ti gwat ngi vul kumoyo nga mbuŋ naŋ. Da Bumbulvuŋ ara biga vu naŋ naŋ i Buymisemuŋ na, hurukom huruk huruk a mbuŋ naŋ.

³⁰ Mizli ngi si ruwuy keɗeɗe, jijikam a mbuŋ naŋ. Hirwuy a ro gidaŋ gidaŋ, yo, naŋ anta wus ta.

³¹ Anja muŋ a mumul, anja ruwuy a zluzluɓ! Ɓam a wuzla sukwi ngi mizli na, «Bumbulvuŋ i buy madiɗaŋ!»

³² Anja mubuliy a hurum jom ati gwat ngi raˀahay gar. Anja li ɓuhoy gar, a gam muguzlum jom ti gwat ngi raˀahay gar.

³³ Anja widis mingiriɗey a jam salalay a mbuŋ Bumbulvuŋ so, asi ara sawa ngi wa ruwuy.

³⁴ Hunumaka Bumbulvuŋ, asi naŋ mezleŋ, wuɗa vu naŋ a ndir ngi sete.

³⁵ Ɓam na: «Buymisemuŋ milih ndra, laha ndra, loho ndra tisi haŋ ngi mulakay, cikila ndra hirnga ar leˀe. Dar i sa tilam mi ti slimiɗ ngi ɗik Buymisemuŋ, ɓa i jijaham ti hunum ɗike.»

³⁶ Sise ngi ɗik Bumbulvuŋ Buymisemuŋ ngi Israyel, gakaŋ sise ar pas gar ngi caˀa! Sukwi Israyel gar a tiɓa: ‹Amin! Yo hunumaka Bumbulvuŋ!›

³⁷ Davit a pla Asaf ati sukum naŋ Levihey a ciki akoti ngi jumoˀay ngi Bumbulvuŋ, ɓa a gaka slra taŋ mbak le ta, kaɓa mupulaka taŋ jiviɗ naŋ, ɓa a gaka vur hin gar.

³⁸ Ɓa ngi jigina mizlingreŋ na, Davit a zuɓ Obet-Edom ati muy naŋhay kukur merkeɗ nga dangafaɗ, waɗ Obet-Edom mangal ngi Yedutun ati Hosa.

³⁹ Slra ngir guɗuk ngi Bumbulvuŋ misi ar li miɗingir ngi Gabaˀoŋ na, Davit a vula da masay Sadok, yo a vula da sukum naŋ masayay ma,

⁴⁰ ɓa a gam mikuli mizlam zlam wãˀ da Bumbulvuŋ mbak le ta, prik pastaˀ ar li gi mikuli, yo slra ngir ɓimujuwa Bumbulvuŋ muvula taŋ toh toh da Israyeley na, ɓa a kiɗaka mi naŋ wãˀa.

⁴¹ Ti Heman ati Yedutuno, t'ada asi taŋ, waɗ mizli muwunaˀ mekelemey mindirama, a zilaka taŋ ti slimiɗ taŋ ti slimiɗ taŋ nga hunuma Bumbulvuŋ. Asi wuɗa vu naŋ a ndir ngi sete.

⁴² Heman ati Yedutuno, slra nga taŋ i fi zara ati kiɗa jãwjãw mahurumom ti gidaŋ, waɗ gwat ngi dungur mekelemey mazlam dimis ngi hunuma Buymisemuŋ asi taŋ. Ziri ngi Yedutunoyo taŋ a jiginam mizlingreŋ.

⁴³ A dirba nah, mizli gar a ram ngi hay taŋhay, joˀ Davite kwana, a mi nga pura mizli ngi hay naŋhaya ya.