Seanraite 25 - An Bíobla Naoṁṫa 1817 (Bedell)

Caibidil XXV. Oifig ríġ. 8 Is inṡeaċanta crioncán, &c.

¹ Is íad so mar an gcéadna seanráite Ṡoluiṁ, noċ do aiṫscríoḃ muinntir Heseciah ríġ Iúdah.

² Isí glóir Dé ní do ċeilt: aċt isé onoir na ríoġ cúis do spíonaḋ amaċ.

³ Atá an flaiṫeaṁnus air áirde, an talaṁ ar ḋoiṁne, agus croiḋe an ríġ doscrúdtaiġ.

⁴ Bain an salċar as a nairgiod, agus tiocfuiḋ sóiṫeaċ amaċ don ċéard.

⁵ Beir leaċd an droċduine ó ḟiaḋnuise an ríġ, agus daingneoċṫar a ċaṫaóir a ḃfíreantaċt.

⁶ Ná cuir ṫú féin amaċ a laṫair an ríġ, agus ná seas a náit ḋaóine móra:

⁷ Oír is féarr ḋuit a ráḋ riot, Tárr a níos annso; ná do ċur ní is isle as coinne an ṗrionnsa noċ do ċonncadar do ṡúile.

⁸ Ná himṫiġ amaċ go hobann do ċríoncán, deagla naċ mbíoḋ a ḟios agad cred do ḋéantá ann a ḋeireaḋ, tar éis do ċoṁarsa dot ċur ċum náire.

⁹ Aiḋnis do ċúis red ċoṁarsain; agus ná foillsiġ seicréid do neaċ oile:

¹⁰ Deagla go ccuirfeaḋ an té do ċluinfeaḋ ṫú naire ort, agus naċ ḃfillfeaḋ do ṁíoċlú.

¹¹ Is cosṁuil focal laḃarṫar go hiomċuḃaiḋ ré húḃlaiḃ óir a bpictíuruiḃ airgid.

¹² Aṁuil clúasḟáinne óir, agus aṁuil córuġaḋ dór ġlan, marsin ḃíos an taiṫḃioraċ glic ar ċlúais uṁail.

¹³ Mar ḃíos fúaċt an tsneaċta a náimsir a nfoġṁair, marsin ḃíos an teaċtaire díleas don druing ċuirios úaḋ é: óir aiṫḃéoġuiḋ sé anam a ṁaiġistir.

¹⁴ Giḋ bé ṁaóiḋios é féin ar son tioḋlaiceaḋ fallsa is cosṁuil é ré néulluiḃ agus ré gaóiṫ gan ḟearṫuinn.

¹⁵ Le hiomċar fada cláoċluiġṫior prionnsa, agus brisiġ teanga ḃog an cnáiṁ.

¹⁶ An ḃfuáir tú mil? iṫ an ṁéid is lór ḋuit di, deagla go mbeiṫeá líonta ḋe, agus go sceiṫfeá í.

¹⁷ Connaiṁ do ċos ó ṫiġ do ċoṁarsan; deagla go mbeiṫ sé cuirṫe ḋíot, agus go ḃfúaṫoċaḋ sé ṫú.

¹⁸ An te do ní fiaḋnuise ḃréige a naġaiḋ a ċoṁarsan is farca, cloiḋeaṁ, agus soiġíod rinneaċ é.

¹⁹ Is cosṁuil dóiġ a nduine neiṁḋílios a naimsir na buáiḋearṫa re fíacail ḃriste, agus re cois léonta.

²⁰ Aṁuil an té ṫógḃas leis éadaċ a naimsir ḋoininne, agus aṁuil ḃinéagra ar nitre, marsin don té ċánas fuinn do ċroiḋe ḋúḃaċ.

²¹ Má ḃíonn do náṁaid ocraċ, taḃair arán dó re iṫe; agus má ḃíonn tart air, taḃair uisge ḋó ré a ól:

²² Oír crúaċfuiḋ tú sméaróide teineaḋ air a ċionn, agus cúiteoċuiḋ an TIĠEARNA sin riot.

²³ Cuiriḋ an ġáoṫ ṫúaiġ a nfearṫuinn ar ccúl: marsin do ní an ġnúis ḟeargaċ an teanga iṫiomráiḋteaċ.

²⁴ Is féarr áitreaḃ a ccoirnéul do ṁullaċ an tiġe, ná a ḃfoċair mná géire agus a ttiġ ḟairsing.

²⁵ Mar uisgeaḋa fúara do nanam ṫartṁar, is marsin ḃíd scéula maiṫe as tír imċéin.

²⁶ Is aṁuil do ṫobar ḃuáiḋearṫa, agus dfúarán truáilliġṫe, duine ionnruic ag tuitim síos a laṫair an ċiontoiġ.

²⁷ Ní maiṫ mórán meala diṫe: marsin ní glóir do ḋaoine a nglóir fein do spíonaḋ.

²⁸ An té ag naċ bí ríaġuil ós cionn a spioruide féin is cosṁuil é re caiṫruiḋ ḃriste síos, gan ḃallaḋa.