Ieremiah 42 - An Bíobla Naoṁṫa 1817 (Bedell)

Caibidil XLII. Cealg Iohanan do iarr fios ó Ḋía, go gu raiḃ ar aire dul don Egipt anaġuíḋ ċoṁairle Dé.

¹ Ann sin ṫangadar caiptíne uile na slóġ, a ḃfogus, agus Iohanan ṁac Careah agus Iesaniah ṁac Hosaiah, agus an pobal uile ó ḃeag go mór,

² Agus a dúḃradar ris an ḃfáiġ Ieremiah, Guiḋmid ṫú, tuiteaḋ ar ngearán ad laṫair, agus guiḋ air ar son ċum an TIĠEARNA do Ḋía, eaḋon ar son a nfuiġillsi uile; (óir níor fágḃaḋ aguinn aċd beagán do ṁórán, mar do ċíd do ṡúile sinn:)

³ Ċor go ttaisbeanfá an TIĠEARNA do Ḋía ḋúinn an tsliġe iona ḃféadfam siuḃal, agus an ní ḟéadfam do ḋéanaṁ.

⁴ Ann sin a dúḃairt Ieremiah an fáiġ riú, Do ċúala mé siḃ; féuċ, guiḋfiḋ mé ċum an TIĠEARNA ḃur Ndía do réir ḃur mbríaṫar; agus tiucfuiḋ a ccríċ, giḋ bé ar biṫ ni ḟreagorus an TIĠEARNA ḋíḃsi, go ḃfoillseoċa mé ḋíḃ é; ní ċoinneoċad aóinní ar ccúl uáiḃ.

⁵ Ann sin a dúḃradar ré Ieremiah, Bíoḋ an TIĠEARNA na ḟíaḋuin ḟírinniġ ḋíriġ eaḋruinn, muna ndearnam do réir na nuile neiṫe ar son a ccuirfiḋ an TIĠEARNA do Ḋía ċuguinn ṫú.

⁶ Mas maiṫ, nó mas olc é, uṁleoċam do ġlór an TIĠEARNA ar Ndía, ċum a ccuirmíd ṫusa; ċor go mbeiṫior go maiṫ aguinn, an tan uiṁleoċam do ġúṫ an TIĠEARNA ar Ndía.

⁷ ¶ Agus tárla déis ḋeiċ lá, go ttáinic bríaṫar an TIĠEARNA go Ieremiah.

⁸ Ann sinn do ġoir sé Iohanan ṁac Careah, agus uile ċaiptíne na slóġ noċ do ḃí iona ḟoċair, agus an pobal uile ó ḃeag go mór,

⁹ Agus a dúḃairt sé ríu, Is marso a deir an TIĠEARNA, Día Israel, ċum ar ċuireaḃair misi dfoillsiuġaḋ ḃur ngearráin dó;

¹⁰ Má ḟantaói a ccoṁnuiḋe annsa tírse, annsin cuirfiḋ misi súas siḃ, agus ní ṡraóilfe mé síos siḃ, agus plainndeoċa mé siḃ, agus ní ṫairreonga mé a níos siḃ: óir is aiṫreaċ liom an tolc do rinne mé oruiḃ.

¹¹ Ná bíoḋ eagla ríġ na Babílóine oruiḃ, re a ḃfuil eagla aguiḃ; ná hímeagluiġe roiṁe, a deir an TIĠEARNA: óir atáimsi liḃ dá ḃur sáoraḋ, agus dá ḃur ttárṫáil as a láiṁ.

¹² Agus taisbéanfa mé grása ḋíḃ, ċor go mbía truáiġe aigesion díḃ, agus go ttuga sé oruiḃ filleaḋ dá ḃur ndúṫaiġ féin.

¹³ Aċt má dearṫaói, Ní ċoiṁneoċam annsa tírsi, agus gan úṁluġaḋ do ġúṫ an TIĠEARNA ḃur Ndía,

¹⁴ Ġa ráḋ, Ní heaḋ; aċt raċam go críċ na Hégipte, mar naċ ḃfaicfiom cogaḋ ar biṫ, agus naċ ccluinfiom fuáim an stuic, agus naċ ḃfuiġiom ocras aráin; agus coiṁneoċam annsin:

¹⁵ Agus anois uimesin eistiġ focal an TIĠEARNA siḃsi a ḟuiġioll Iúdah, Is marso a deir TIĠEARNA na slóġ, Día Israel; Má ċurṫaóise ḃur naiġṫe go hiomlán ar ḋul don Négipt, agus imṫeaċt agus dul do ċoṁnuiġe ann;

¹⁶ Annsin tiucfuiḋ a ccríċ, an cloiḋeaṁ, roiṁe a raiḃ ḃur neagla, go mbéara sé oruiḃ a ttír na Hégipte; agus an ġorta, re a ḃfuil eagla oruiḃ, go leanfuiḋ sé go lúaṫ siḃ don Négipt; agus éugfuiḋe ann sin.

¹⁷ Marsin ḃías ag a nuile ḋuine ċuirfios a aġaíḋ ar ḋul ar ċúairt don Négipt; éugfuid leis an ccloiḋeaṁ, leis an ngorta, agus leis a bpláiġ: agus ní ṁairfiḋ áonduine aca agus ní raċaiḋ as ó nolc do ḃéara misi orra.

¹⁸ Oír is marso a deir TIĠEARNA na slóġ, Día Israel; Mar do ḋóirteaḋ mfearg agus mo ċorruiġ amaċ ar áitreaḃaċaiḃ Ierusalem; is marsin doirtfiġear mfearg amaċ oruiḃsi, an tan raċtaoi don Négipt: agus beiṫi mar ṁalluġaḋ, agus mar úaṫḃas, agus mar ṁallaċt, agus mar ṁasla; agus ní ḟaicfiḋe a náitsi ní sa ṁó.

¹⁹ ¶ A dúḃairt an TIĠEARNA dá ḃur ttáoḃ, a ḟuiġioll Iúdah; Ná héirgiḋe don Negipt: bíoḋ a ḟios aguiḃ go deiṁin gur ċoṁairliġ misi siḃ a niuġ.

²⁰ Oír do léigeaḃair oruiḃ ann ḃur ccroiḋṫiḃ, a nuáir do ċuireaḃair misi ċum an TIĠEARNA ḃur Ndía, ġa ráḋ, Guiḋ air ar soinne ċum an TIĠEARNA ar Ndía; agus do réir a nuile ní déaras an TIĠEARNA ar Ndía, mairsin innis dúinn, agus do ḋéanamne é.

²¹ Agus anois dfoillsiġ mé ḋíḃ é a niuġ; aċt níor úṁluiġeaḃair do ġúṫ an TIĠEARNA ḃur Ndía, nó daóinní ar son ar ċuir sé misi ċugaiḃ.

²² Anois uimesin bíoḋ a ḟios aguiḃ go dearḃṫa go néugfuiḋe leis an ccloiḋeaṁ, leis an ngorta, agus leis an bpláiġ, ansa náit ar mían liḃ dul agus coṁnuiġe do ḋéanaṁ ann.