Gníoṁarṫa 2 - An Bíobla Naoṁṫa 1817 (Bedell)

Caibidil II A nam na cingcise, tainic an Spiorad Naoṁ a rioċt teangṫa sgoiltiġe, ar na heasbalaiḃ.

¹ Agus an tan ṫáinig lá na Cingcíse go hiomlan, do ḃádar uile dáontoil ar áonḃall.

² Agus ṫáinig torann ó neaṁ go hobann mar do ṫiocfaḋ séideaḋ ġáoiṫe ro aintréun, agus do lion sé an tiġ uile mar a raḃadarsan na suiḋe.

³ Agus do taisbéanaḋ ḋóiḃ teangṫa sgoiltiġe mar ṫeine, noċ do ṡuiḋ air gaċ áon dióḃ.

⁴ Agus do ḃádar uile ar na liónaḋ don Spiorad Náoṁ, agus do ṫosuiġeadar laḃairt lé teangṫuiḃ eile, do réir mar ṫug an Spiorad laḃairt ḋóiḃ.

⁵ Agus do ḃádar na gcoṁnuiḋ a Niarusalém Iúduiḋe, dáoine díaḋa, do gaċ uile ċeinéul dá ḃfuil fáoi neaṁ.

⁶ Agus a ndul don tásgso amaċ, do ċruinniġ an coiṁṫionól, agus do ḃádar buáiḋearṫa, do ḃríġ go gcúaluiḋ gaċ áon aca iádsan ag laḃairt ann a dteanguiḋ féin.

⁷ Agus do ġáḃ úaṫḃás, agus iongantas iád uile, ag ráḋ ré ċéile, Féuċ, a né naċ Gaililéeanuiġ íadso uile laḃras?

⁸ Agus cionnas do ċluinn sinne gaċ áon aguinn a ṫeanguiḋ féin an a rugaḋ sinn?

⁹ Parti, agus Médi, agus Elamíti, agus na dáoine áitiġeas a Mesopotámia, agus a Níudéa, agus a Gcappadócia, a Bpontus, agus ann sa Násia,

¹⁰ A Ḃṗrígia, agus a Bpamṗília, ann sa Négipt, agus a ranntuiḃ Libia timċeall Ċiréne, agus coigcrióċṫa na Róṁa, agus Iúduiḋe agus Proseliti.

¹¹ Luċd Ċréta agus Arábia, do ċluinmíd iád ag laḃairt ann ar dteangṫuiḃ féin oibreaċa mórḋálaċa De.

¹² Agus do ġaḃ úaṫḃás, agus aṁaras iád úile, ag ráḋ gaċ fear ré a ċéile, Créd is ciáll dó so?

¹³ Agus a duḃradar dáoine eile ag fonoṁad, Is lán dfíon ṁilis atáid síad so.

¹⁴ Aċd ar seasaṁ do Ṗeadar a ḃfoċair a naóin easbuil dég, dárdaiġ sé a ġúṫ, agus do laḃair sé ríu, A ṗobail Iúdaiḋe, agus a luċd áitiġe Iarusalém uile, bíoḋ a ḋeiṁin só agaiḃ, agus éisdiġ rém ḃríaṫruiḃ:

¹⁵ Oír ní ḃfuilid siad so aír misge, mar ṁeastaóise, an tan naċ ḃfuil sé aċd an treas uáir don lá.

¹⁶ Aċd a sé so an ní a duḃraḋ tré san ḃfáiḋ Ióel,

¹⁷ Agus tíocfuiġ ċum críċe ann sna laéṫiḃ déiġeanaċa (a deir Día,) dóirtfiḋ mé dom Spiorad féin air gaċ uile ḟeóil: agus do ḋéunuid ḃur mic agus ḃur ninġeana fáiḋeadóireaċd, agus do ċífid ḃur nógánaiġ taisbéunta, agus ḃur seandáoine aislingṫe:

¹⁸ Agus fós doirtfiḋ mé dom Spiorad féin ar mo ṡearḃḟoġantuiḋiḃ agus air mo ḃanóglaċuiḃ ann sna laéṫiḃsin; agus do ḋeanuid faiḋeadoireaċd:

¹⁹ Agus foillseoċuiḋ mé iongantuis ar neaṁ ṡúas, agus comarṫaiḋe ar a dtalaṁ ṡíos; fuil, agus teine, agus gal deatuiġe:

²⁰ Iompóċar an ġrían a ndorċadas, agus an ġealaċ a ḃfuil, suil ṫiocfas ab lá mór oirḋeirc sin an Tiġearna:

²¹ Agus tiocfuiḋ ċum críċe, giḋ bé ġuíḋfeas ainm an Tiġearna sláineoċṫair é.

²² Eísdiġ na bríaṫrasa, a ċlann Israél; Iósa Nasarrḋá, duine dearḃṫa ó Ḋía eadruiḃsi maille lé cúṁaċduiḃ agus lé miórḃailiḃ agus le coṁarṫaiḋiḃ; noċ do rinne Día ṫrídsean eadruiḃse, mar is aiṫne ḋiḃ féin:

²³ An fearso, ar mbeiṫ ar na ṫoirḃirt tré ċoṁairle ċinte agus tré réiṁḟeaċuin Dé, do ġaḃ siḃse, agus ar na ċéasaḋ lé laṁaiḃ droċḋáoine do ṁarḃaḃair é:

²⁴ Noċ do ṫóg Día súas, íar sgáoileaḋ ḋoilġis an ḃáis: ar a naḋḃar nar ḃéidir don ḃás a ċungḃáil.

²⁵ Oír a deir Dáiḃi na ṫimċeallsan, Do ċunnairc mé an Tiġearna am ḟíaḋnuisi do ġnáṫ, óir atá sé ar mo láiṁ ḋeis, ionnus naċ ccorróċṫáoi mé:

²⁶ Ar a ṡon so do ḃí mo ċroiḋe go súḃaċ, agus do rinne mo ṫeanga lúaṫġáire; agus na ċeann sin suaiṁneóċuiḋ mfeóil a ndóṫċas:

²⁷ Ar a naḋḃar naċ ḃfúigfe tú manam a nifearn, agus ní ḟuileónga tú do Aón Náoṁṫa féin truáilliḋeaċd dfaicsin.

²⁸ Dfoillsiġ tú ḋaṁsa sliġṫe na beaṫa; líonfuiḋ tú mé do ġairdeaċus léd ġnúis féin.

²⁹ A ḟeara agus a ḃraiṫreaċa, is éidir leamsa laḃairt go dána riḃ a dtimċeall an ṗatriárc Daiḃí, go ḃfuil sé tair éis ḃáis agus ar na aḋlacaḋ, agus atá a ṫúama eadruinne gus an lá a niu.

³⁰ Ar a naḋḃarsin ar mbeiṫ na ḟáiḋ ḋó, agus a ḟios aige go dtug Día móid ḋó maille lé mionnuiḃ, go dtóigfeaḋ sé Críosd súas, do ṡíol a leasruiġsion, do réir na féola, agus go ccuirfeaḋ sé na ṡuíḋe ann a ċaṫáoirsean é;

³¹ Ar na réuṁḟaicsin dó do laḃair sé a dtimċeall eiséirġe Ċríosd, naċ ḃfúigfiṫi a anam a nifearn, agus naċ ḃfaicfeaḋ a ċolann trúailleaḋ.

³² Do ṫóg Día an Tiosaso súas, agus atámáoidne uile an ḃfíaḋnuisiḃ air.

³³ Ar a naḋḃarsin ar na ḃreiṫ súas lé láiṁ ḋeis Dé, agus ar ḃfaġáil an Spioraid Náoiṁ do reir ġeallaṁna a Naṫar, do ḋóirt sé amaċ an nísi, do ċíṫísi a nois agus do ċluintí.

³⁴ Oír ní ḋeaċuiḋ Dáiḃi súas air neaṁ: giḋeaḋ a deir sé, A duḃairt an Tiġearna rém Ṫiġearnasa, Suíḋ ar mo láiṁ ḋeis,

³⁵ Nó go gcuire mé do náṁaid na sdól fád ċosuiḃ.

³⁶ Uime sin bíoḋ a ḟios go dearḃṫa ag tiġ Israél uile, go ndearnuiḋ Día Tiġearna agus Críosd, do Níosasa do ċroċaḃairsi.

³⁷ Agus ar na ċloinsin so ḋóiḃ, do goineaḋ ann a gcroiḋe íad, agus a duḃradar ré Peadar agus ris an gcuid eile do na heasbaluiḃ, A ḟeara agus a ḃráiṫreaċa, créud do ḋéunam?

³⁸ Agus do ḟreagair Peadar iád, Déanuiḋ aiṫriġe, agus baisdear gaċ áonduine agaiḃ a nainm Iósa Críosd ċum maiṫeaṁnuis na bpeacaḋ, agus géuḃṫáoi ċugaiḃ tioḋlacaḋ a Spioruid Naoiṁ.

³⁹ Oír is dáoiḃsi do rinneaḋ an geallaḋ, agus dá ḃar gcloinn, agus dá gaċ nduine a ccían, eaḋon gaċ áon ġoirfeas ar Dtiġearna Día.

⁴⁰ Agus do ġuiḋ sé agus do ṫeaguisg sé íad ré morán eile do ḃríaṫruiḃ, ag ráḋ, Coiṁéaduiḋ siḃ féin on droċġeinealaċsa.

⁴¹ Ann sin na dáoine do ġaḃ ċuca a ḃríaṫra go toileaṁail do baisdeaḋ íad: agus do cuireaḋ léo an lásin a dtimċeall ṫrí míle anam.

⁴² Agus do ċoṁnuiḋeadar go daingion a dteagasg na neasbal agus ann a ccumann a mbriseaḋ aráin, agus a nurnuiġiḃ.

⁴³ Agus do ġaḃ eagla gaċ uile anam: agus do rinneaḋ mórán do ṁíorḃuiliḃ agus do ċoṁarṫuiḃ leis na heasbaluiḃ.

⁴⁴ Agus na huile ḋáoine do ċreid do ḃádar a ḃfoċair a ċéile, agus do ḃádar na huile neiṫe coitċeann aca;

⁴⁵ Agus do reacadar a ḃfineaċas agus a máoin, agus do roinneadar íad ar gaċ áon, fá leiṫ do réir a ríaċdanuis.

⁴⁶ Agus ag fanṁuin, gaċ láoi déantoil ann sa teampoll, agus ag briseaḋ aráin ó ṫiġ go tiġ, do ċaiṫdís bíaḋ maille lé gáirdeaċas agus lé simpliḋeaċd ċroiḋe,

⁴⁷ Ag molaḋ Dé, agus ag faġáil ceana ón ṗobal uile. Agus do ċuir an Tiġearna leis a neagluis gaċ láoi, an dream do sláinéoċṫáoi.