Genesis 35 - An Bíobla Naoṁṫa 1817 (Bedell)

Caibidil XXXV. Táinic Jacob go Betel. 16 Fuair Ráċel bás ar an tsliġe re breiṫ Ḃeniamin. 28 Deúg agus daḋlaiceaḋ Isaac.

¹ Agus a duḃairt Día ré Iácob, Eiriġ, imṫiġ súas go Bétel agus coṁnuiġ ann sin: agus déun altóir ann do Ḋía noċ do ḟoillsiġ é féin duit a nuáir do ṫeiṫ tú ó laṫair do ḋearḃraṫar Esau.

² Ann sin a duḃairt Iacob ré na ṁuinntir, agus ré a raiḃ na ḟoċair uile, Cuiriḋ uáiḃ na deé coiṁiġṫeaċa atá eadruiḃ, agus bíġí glan, agus aṫruiġiḋ ḃur néudniġe:

³ Agus éirġeam agus teannum súas go Bétel, agus do ḋéana misi altóir ann do Ḋía, noċ do ḟreagair mé a nam mo ċrúaḋóige, agus do ḃi liom ann gaċ sliġe ar ġaḃus.

⁴ Agus tugadur do Iácob a raiḃ do ḋéeiḃ coiṁiġṫeaċa ann a láṁuiḃ, agus a raiḃ dfainniḃ-cluas na gcluasuiḃ; agus do ḟoluiġ Iácob íad faói an daruiġ noċ do ḃí laiṁ ré Seċem.

⁵ Agus do ġluáiseadur; agus do ḃí eagla Dé ar na caiṫreaċuiḃ do ḃí gaċa táoḃ ḋioḃ, agus níor leanadar síad clann Iácob.

⁶ Mar sin ṫainíc Iácob go Lus, noċ atá a ttír Ċánaan, eaḋon Bétel, é féin agus a raiḃ aige uile.

⁷ Agus do rinne altóir ann, agus do ġoir El-Bétel do náit: do ċionn gurob ann do ṫaisbéin Día é féin dó, a nuair do ṫeiṫ sé ó laṫair a ḋearḃraṫar.

⁸ Aċ fuáir Debora banaltra Rebecah bás, agus do haḋlaiceaḋ í táoḃ ṡíos do Ḃétel faói ḋaruiġ: agus do goireaḋ Allonbaċut dainm ḋe.

⁹ Agus do ṫaisbéin Día a rís é féin do Iácob, a nuáir ṫáinic sé amaċ as Páda-Aram, agus do ḃeannuiġ sé é.

¹⁰ Agus a duḃairt Día ris, Iácob as ainm ḋuitsi; ni goirfiġear feasda Iácob ḋíot, aċ Israel ḃus ainm ḋuit: agus do ġoir sé Israel dainm ḋe.

¹¹ Agus a duḃairt Día ris, Is misi Día uile ċuṁaċdaċ: bí siolṁar agus foírlíon; tiocfuiḋ cineaḋ agus morán do ċiniḋeaċuiḃ uáid, agus tiocfaid ríġṫe amaċ ód ḟorḋronnuiḃ;

¹² Agus an dúṫaiḋ tug misi do Abraham, agus do Isaac, do ḃéura mé ḋuitsi í, agus dot ṡíol ad ḋiáiġ do ḃéura mé an dúṫaiġ sin.

¹³ Agus do ċuáiḋ Día úaḋ súas sa náit a raiḃ ag caint ris.

¹⁴ Agus do tóg Iácob piléir sa náit a raiḃ ag caint ris, eaḋon pileir cloiċe, agus do ḋóirt ofrail diġe air, agus do ḋóirt ola air.

¹⁵ Agus tug Iácob Bétel dainm ar a náit a raiḃ Día ag caint ris.

¹⁶ Agus do aistriġeadur ó Ḃétel; agus ní raiḃ aċ sliġe ġearr ag teaċd go Heṗrat: agus do ġaḃ teinnios cloinne Ráċel, agus fuáir sí saoṫar docaṁlaċ.

¹⁷ Agus tárla a nuair do ḃí sí ann a sáoṫar éigeantaċ, go nduḃairt an ḃean ċunganta ría, Ná bíoḋ eagla ort; biáiḋ an macsa agad mar an gcéadná.

¹⁸ Agus tárla, a nuáir do ḃí a hanam ag dul aiste, (óir fuáir sí bás) gur goir sí Benoni dainm ḋe: aċ tug a aṫair Beniamin dainm air.

¹⁹ Agus fuáir Ráċel bás, agus do haḋluiceḋ í ar a tsliġe a ngaḃṫaoi go Héṗrat, noċ re raiḋtior Bétlehem.

²⁰ Agus do ċuir Iácob Piléir ar a huáiġe: sé sin Piléir uáiġe Ráċel gus a niuġ.

²¹ Agus do aistriġ Israel, agus do leaṫnuiġ a ṗubuil táoḃ ṫall do ṫor Edar.

²² Agus tárla, a nuáir do ḃí Israel ná ċoṁnuiġe sa duṫaiġ sin, go ndeaċuiḋ Reuben, agus gur luiġ re Bilhah leannán aṫar: agus do ċúaluiḋ Israel sin. A nois clann Iácob bá ḋá ḟear ḋéag iad.

²³ Mic Léah Reuben céidġin Iácob, Símeon, agus Léḃi, agus Iúdah agus Issaċar, agus Sebulun.

²⁴ Mic Ráċel; Ióseṗ, agus Beniamin.

²⁵ Mic Ḃilhah, cuṁal Ráċel; Dan agus Naṗtali.

²⁶ Agus mic Silpah, cuṁal Léah; Gad agus Assur. Asíad so mic Iácob, noċ do rugaḋ ḋó a Bpádan-Aram.

²⁷ Agus táinic Iácob go nuige a aṫair Isaac go Mamre go caṫruiġ Arbah, (eaḋon Hébron) áit ar ċoṁnuiḋ Abraham agus Isaac.

²⁸ Agus dob íad láeṫe Isaac céud agus ceiṫre fiċid blíaḋan.

²⁹ Agus do ṫiomun Isáac a spiorad suas, agus fúair bás, agus do cruinniġeaḋ ċum a ḋaóine é, ar mbeiṫ foirfe lán dáois dó: agus do aḋlaiceadur a ċlann Esau agus Iácob é.