Eseċiel 30 - An Bíobla Naoṁṫa 1817 (Bedell)

Caibidil XXX. Neartuiġṫear láṁ Ḃabilon do ḃriseaḋ neart na Hégipte, agus a luċt cuidiġe.

¹ Ṫainic bríaṫar an TIĠEARNA ċugam a rís, ag ráḋ,

² A ṁic an duine tairrġir agus abair, Is marso a deir an Tiġearna DIA; Núalluiġsi, A ṁairg don lá!

³ Oír is fogus an lá, eaḋon atá lá an TIĠEARNA a ccoṁḟogus, lá néullaċ; buḋ í sin uáir na ngeinteaḋ.

⁴ Agus tiucfuiḋ an cloiḋeaṁ air a Négipt, agus biáiḋ pían ṁór san Netíopia, an tan ṫuitfid na mairḃ san Négipt, agus ḃéaruid léo a hiomadaṁlaċt, agus ḃristiġear síos a bunáite.

⁵ Agus tuitfiḋ a Netíopia, agus Líbia, agus Lídia, agus an pobal cumaisce uile, agus Ċub, agus daóine ṫíre an ċunnarṫa, léosan leis an ccloiḋioṁ.

⁶ Is marso a deir an TIĠEARNA; Tuitfiḋ fos an drong ċongṁus súas an Négipt; tiucfuiḋ úaḃar a cuṁaċt a núas; tiutfid síad innte leis an ccloiḋeaṁ ó ṫor Siene, a deir an Tiġearna DIA.

⁷ Agus béid síad áonránaċ a lár na ttíorṫann atá uáigneaċ, agus biáiḋ a caiṫreaċa a meaḋon na ccaiṫreaċ atá ná ḃfásaċ.

⁸ Agus aiṫeonuid gur misi an TIĠEARNA, an tan ċuirfios mé téine san Négipt, agus a nuáir scriosfuiġear a huile luċt cuidiġṫe.

⁹ Annsa ló sin raċaid teaċta uáimsi amaċ a longaiḃ do ċur eagla air na Hetiópiḃ, neiṁċurumaċ, agus tiucfa pian ṁór orra, aṁail a ló na Hégipte: óir, féuċ, atá sé ag teaċt.

¹⁰ Is marso a deir an Tiġearna DIA; Do ḃéara mé air iomadaṁlaċd na Hégipte cosg le láiṁ Nebuċadressar ríġ na Babiloine.

¹¹ E féin agus a ḋaóine maille ris, béarṫar an drong is úaṫḃásuiġe do ná cineaḋaċaiḃ, do scrios na tíre: agus taireonguid a ccloiḋṁṫe a naġaiḋ na Hégipte, agus líonfuiḋ an talaṁ do ṁarḃuiḃ.

¹² Agus do ḋéana misi a naiḃne tirm, agus reacfad an fearann a láiṁ na cciontaċ: agus do ḋéana mé an tír na fásaċ, agus gaċ a ḃfuil ann, lé láiṁ na ccoiṁṫiġeaċ: misi an TIĠEARNA do laḃair é.

¹³ Is marso a deir an Tiġearna DIA; Scriosfa mé fós na hioḋail, agus do ḃéara mé air a níoṁáiġiḃ cosg amaċ as Noṗ; agus ní ḃiáiḋ feasda prionnsa air ṫalaṁ na Hégipte: agus cuirfiḋ mé eagla a ccríċ na Hégipte.

¹⁴ Agus do ḋéana mé Patros uáigneaċ, agus cuirfe mé teine ann Soan, agus do ḃéara mé breaṫa ann No.

¹⁵ Agus dóirtfiḋ mé mo ḋioġaltas ar Sin, neart na Hégipte; agus géarrfa mé amaċ iomadaṁlaċt No.

¹⁶ Agus cuirfe mé teine san Negipt: do ġéaḃa Sin pían mór, agus sgaóilfíġear No ó ċéile, agus biáiḋ donus air Noṗ go laéṫeaṁuil.

¹⁷ Tuitfid daóine óga Aḃen agus Ṗibeset leis an ccloiḋeaṁ: agus raċfuid na caiṫreaċaso a mbraiġdionas.

¹⁸ Dorċoċṫar fós an lá ann Tehaṗnehes, an tan ḃrisfios mé annsin cungalaċ na Hégipte: agus stadfas poimp a neirt innte: ar a sonsa, foileoċa néull í, agus raċfuid a hinġeana a mbraiġdionas.

¹⁹ Marso do ḋéana mé breiṫeaṁnuis annsa Négipt: agus aiṫeonuid gur mé an TIĠEARNA.

²⁰ ¶ Agus tárla san náonṁaḋ blíaḋain déag, annsa ċéid ṁí, annsa seaċtṁaḋ lá don ṁi, go ttáinic focal an TIĠEARNA ċugam, ag ráḋ.

²¹ A ṁic an duine, Do ḃrís mé láṁ Ṗárao ríġ na Hégipte; agus, féuċ, ní ceangoltar súas í dá leiġios, do ċur creasa uirre dá ceangal, dá déanaṁ láidir do ċongṁáil an ċloiḋiṁ.

²² Uimesin is marso a deir an Tiġearna DIA; Féuċ, atáim a naġaiḋ Ṗárao ríġ na Hégipte, agus brisfiḋ mé a ruiġṫeaċ, noċ do ḃí laidir, agus do briseaḋ; agus do ḃéara mé air an ccloiḋeaṁ tuitim as a láiṁ.

²³ Agus scaóilfiḋ mé na Hégiptiġ a measc na ccineaḋaċ, agus cráoḃscaóilfiḋ mé íad ar feaḋ na ttíorṫann.

²⁴ Agus neirṫeoċa mé láṁa ríġ na Babilóine, agus cuirfe mé mo ċloiḋioṁ iona láiṁsion: aċt brisfiḋ mé ruiġṫeaċ Ṗárao, agus do ḋéanuiḋ sé osnaḋ da laṫair lé hosnaḋuiḃ marḃṫuiġ duine ċneaḋuiġ.

²⁵ Aċt neirteoċa mé ruiġṫeaċ ríġ na Babilóine, agus tuitfid láṁa Ṗárao síos; agus aiṫeonuid gur misi an TIĠEARNA; an tan ċuirfios mé mo ċloiḋeaṁ a láiṁ ríġ na Babilóine, agus sinfiḋ sé amaċ é ar ċríċ na Hégipte.

²⁶ Agus díoṫsgaóilfiḋ mé na Hégiptiġ a measc na ccineaḋaċ, agus scabfa mé íad a measc na ttíorṫann; agus aiṫeonuid gur mé an TIĠEARNA.