U-Eksodasi 9 - iBhayibhili Elingcwele 1978

Inhlupheko yesihlanu: Isifo sezifuyo

¹ INkosi yasisithi kuMose: Yana kuFaro uthi kuye: INkosi, uNkulunkulu wamaHeberu, ithi: Vumela abantu bami ukuba bahambe ukuyangikhonza.

² Ngoba uba usala ukuba bahambe, ulokhu usababambile,

³ isandla seNkosi sizakwehlela laphezu kwemfuyo yakho esegangeni, laphezu kwamabhiza labobabhemi, lamakamela, lenkomo lezimvu, siletha isifo esinzima kakhulu.

⁴ Kodwa iNkosi izakwenza umahluko phakathi kwenkomo zabakoIsrayeli lezamaGibithe; kakuyikufa lutho kukho konke okwabakoIsrayeli.

⁵ INkosi yamisa isikhathi esithile, yathi: Kusasa iNkosi izakwenza lokhu elizweni.

⁶ INkosi yakwenzake lokho kusasa kwakhona; zonke izifuyo zamaGibithe zafa; kodwa kakufanga lesisodwa ezifuyweni zabakoIsrayeli.

⁷ UFaro wabuza, watshelwa ukuba kakufanga lesisodwa ezifuyweni zabakoIsrayeli. Kodwa inhliziyo kaFaro yajinga iba lukhuni, kazabavumela abantu ukuba bahambe.

Inhlupheko yesithupha: Amathumba

⁸ INkosi yasisithi kuboMose loAroni: Caphunani umlotha weziko, uMose awuphosele phezulu phambi kukaFaro.

⁹ Uzakuba luthuli phezu kwelizwe lonke laseGibithe, uphenduke ube ngamathumba azaphihlika abe yizilonda ebantwini lasezinkomeni kulo lonke ilizwe laseGibithe.

¹⁰ Basebewuthatha umlotha weziko, bema phambi kukaFaro; uMose wawuphosela phezulu, waba ngamathumba aphihlika aba yizilonda ebantwini lasezinkomeni.

¹¹ Izangoma zahluleka ukuma phambi kukaMose ngenxa yamathumba; ngoba amathumba amila izangoma lawo wonke amaGibithe.

¹² Kodwa iNkosi yayenza yaba lukhuni inhliziyo kaFaro, kazabalalela, njengokutsho kweNkosi.

Inhlupheko yesikhombisa: Isiqhotho

¹³ INkosi yasisithi kuMose: Vuka ekuseni, ume phambi kukaFaro uthi kuye: INkosi uNkulunkulu wamaHeberu ithi: Vumela abantu bami ukuba bahambe bayengikhonza.

¹⁴ Ngoba khathesi ngizakuthuma zonke inhlupheko zami kuwe lasencekwini zakho lasebantwini bakho, ukuba wazi ukuthi kakho onjengami kuwo wonke umhlaba.

¹⁵ Uba bengiselule isandla sami ukukutshaya labantu bakho ngesifo, ubuzakuchitheka emhlabeni.

¹⁶ Kodwa ngikusilisile ukuba ngikutshengise amandla ami lokuba ibizo lami litshunyayelwe emhlabeni wonke.

¹⁷ Usazikhukhumeza phambi kwabantu bami, ungabavumeli ukuba bahambe na?

¹⁸ Kusasa ngalesisikhathi ngizakunisa isiqhotho esikhulu, esingazanga sibonwe eGibithe selokhu lamiswayo kuze kube khathesi.

¹⁹ Ngakhoke hamba masinyane, ubuthele esibayeni zonke inkomo zakho lemfuyo yakho yonke esegangeni, ngoba bonke abantu lazo zonke inkomo okufunyanwa egangeni kungabuthwanga kuzakutshaywa yisiqhotho, kufe.

²⁰ Ngakho yileyo laleyonceku kaFaro elesabayo ilizwi leNkosi yangenisa ngokuphangisa izisebenzi zayo lenkomo zayo ezindlini;

²¹ kodwa yileyo laleyo engananzanga ilizwi leNkosi yayekela izisebenzi zayo lenkomo zayo egangeni.

²² INkosi yasisithi kuMose: Phakamisela isandla sakho phezulu ukuba kune isiqhotho kulo lonke ilizwe laseGibithe, sehlele ebantwini lasezinkomeni lasemibhideni yonke yeganga kulo lonke ilizwe laseGibithe.

²³ UMose waphakamisela intonga yakhe phezulu; iNkosi yathumela ukuduma lesiqhotho; lombane wehlela emhlabeni; iNkosi yanisa isiqhotho elizweni laseGibithe.

²⁴ Ngakhoke kwaba khona isiqhotho, lombane ubaneka njalonjalo phakathi kwesiqhotho; kwakuyisiqhotho esingazanga sibe khona elizweni laseGibithe selokhu laba yisizwe.

²⁵ Isiqhotho satshaya konke okusegangeni kulo lonke ilizwe laseGibithe, abantu lezinkomo; satshaya yonke imibhida yeganga, sephula zonke izihlahla zeganga.

²⁶ Kuselizweni laseGosheni kuphela lapho ababekhona abakoIsrayeli okwakungekho isiqhotho.

²⁷ UFaro wasethumela ilizwi ebiza oMose loAroni, wathi kubo: Khathesi ngonile; iNkosi ilungile, mina labantu bami sibabi.

²⁸ Incengeni iNkosi, ngoba kwanele ukuduma lokhu lesiqhotho lesi; ngizakuliyekela lihambe, lingabe lisahlala.

²⁹ UMose wathi kuye: Nxa sengiphumile phakathi komuzi, ngizaphakamisela izandla zami eNkosini; kuzakuphela ukuduma lesiqhotho, ukuba wazi ukuthi umhlaba ungoweNkosi.

³⁰ Kodwa wena lenceku zakho, ngiyazi ukuthi kalikayesabi iNkosi uNkulunkulu.

³¹ — Kwatshaywa isikusha lebhali; ibhali yayisikhahlele, lesikusha sasesivuthwa.

³² Kodwa amabele lophoko kakutshaywanga, ngoba kwakungakakhuli —

³³ UMose waphuma emzini evela kuFaro, waphakamisela izandla zakhe eNkosini; kwaphela ukuduma lesiqhotho, futhi lezulu kalabe lisana emhlabeni.

³⁴ Kodwa uFaro esebonile ukuthi kuphelile izulu lesiqhotho lokuduma, waphinda wona futhi, wayenza yaba lukhuni inhliziyo yakhe, yena lezinceku zakhe.

³⁵ Inhliziyo kaFaro yaba lukhuni, kazabavumela abakoIsrayeli ukuba bahambe, njengalokhu iNkosi yayitshilo ngoMose.