U-Eksodasi 8 - iBhayibhili Elingcwele 1978

Inhlupheko yesibili: Amaxoxo

¹ INkosi yasisithi kuMose: Yana kuFaro uthi kuye: INkosi ithi: Vumela abantu bami ukuba bayengikhonza.

² Uba ungabavumeli bahambe, ngizakuhlupha ilizwe lakho lonke ngamaxoxo;

³ umfula uzakugcwala amaxoxo, aphume, angene endlini yakho, lasendaweni yakho yokulala, lasembhedeni wakho, lezindlini zenceku zakho, laphezu kwabantu bakho, lasemaziko akho, lasemiganwini yakho yokuxovela izinkwa;

⁴ azakuba phezu kwakho, laphezu kwabantu bakho lezinceku zakho zonke.

⁵ INkosi yathi kuMose: Tshono kuAroni uthi: Yelula isandla sakho lentonga yakho phezu kwemifula lezifula leziziba, ukhuphele amaxoxo elizweni laseGibithe.

⁶ UAroni waselula isandla sakhe phezu kwamanzi aseGibithe; amaxoxo aphuma, agcwala ilizwe laseGibithe.

⁷ Lezangoma zenza njalo ngamalumbo azo, zakhuphela amaxoxo elizweni laseGibithe.

⁸ UFaro wasebabiza oMose loAroni wathi: Ncengani iNkosi ukuba isuse amaxoxo kimi lasebantwini bami; ngizabavumela abantu ukuba bayehlabela iNkosi.

⁹ UMose wathi kuFaro: Ngitshela ukuba ngizakukukhulekela ngasiphi isikhathi wena lenceku zakho, labantu bakho, ukuba amaxoxo asuswe kuwe lasezindlini zakho, asale emfuleni kuphela.

¹⁰ Wathi: Kusasa. UMose wathi: Kakube njengelizwi lakho ukuze wazi ukuthi kakho onjengeNkosi uNkulunkulu wethu.

¹¹ Amaxoxo azakusuka kuwe, ezindlini zakho lasencekwini zakho lasebantwini bakho, asale emfuleni kuphela.

¹² UMose loAroni baphuma kuFaro. UMose wakhala eNkosini ngamaxoxo eyayiwalethe kuFaro.

¹³ INkosi yenza njengelizwi likaMose; amaxoxo afa ezindlini lasemagumeni lasemasimini.

¹⁴ Bawabuthelela izinqwaba; ilizwe lanuka.

¹⁵ Kodwa uFaro esebonile ukuthi kukhona ukuthula, wayenza yaba lukhuni inhliziyo yakhe, kazabalalela, njengokutsho kweNkosi.

Inhlupheko yesithathu: Imiyane

¹⁶ INkosi yasisithi kuMose: Tshono kuAroni uthi: Yelula intonga yakho, utshaye phansi ubange uthuli ukuba luphenduke lube yimiyane kulo lonke ilizwe laseGibithe.

¹⁷ Benza njalo; uAroni welula isandla sakhe lentonga yakhe, watshaya phansi wabanga uthuli; imiyane yaba khona ebantwini lasezifuyweni; lonke uthuli lwaphenduka lwaba yimiyane kulo lonke ilizwe laseGibithe.

¹⁸ Lezangoma zazama ukuveza imiyane ngamalumbo azo, kodwa zahluleka. Kwaba khona imiyane ebantwini lasezifuyweni.

¹⁹ Izangoma zasezisithi kuFaro: Lokhu kungumunwe kaNkulunkulu. Kodwa inhliziyo kaFaro yajinga iba lukhuni, kazabalalela, njengokutsho kweNkosi.

Inhlupheko yesine: Izibawu

²⁰ INkosi yathi kuMose: Vuka ekuseni, umlindele uFaro; lapho ephuma esiya emanzini, uthi kuye: INkosi ithi: Vumela abantu bami ukuba bahambe ukuyangikhonza.

²¹ Uba ungabavumeli ukuba bahambe, ngizathumela kuwe izibawu lasencekwini zakho lasebantwini bakho lasezindlini zakho; izindlu zamaGibithe zizagcwala izibawu kanye lomhlabathi ezikuwo.

²² Kodwa ngalesosikhathi ngizakwahlukanisa ilizwe laseGosheni abahlala kulo abantu bami, ukuba kungabi khona lapho izibawu, ukuze wazi ukuthi ngiyiNkosi emhlabeni.

²³ Ngalokhu ngizakwahlukanisa abantu bami labantu bakho; kusasa kuzakubonakala isibonakaliso lesi.

²⁴ INkosi yenza njalo; kwangena endlini kaFaro izibawu ezinengi lasezindlini zenceku zakhe; lonke ilizwe laseGibithe lachitheka ngenxa yezibawu.

²⁵ UFaro wasebabiza oMose loAroni, wathi: Hambani, liyehlabela uNkulunkulu wenu kulelilizwe.

²⁶ Kodwa uMose wathi: Kakulunganga ukwenza njalo, ngoba sizakuyihlabela iNkosi uNkulunkulu wethu lokho okunengekayo kuwo amaGibithe; uba sihlaba lokho okunengekayo emehlweni awo, kawayikusikhanda ngamatshe na?

²⁷ Sizahamba ummango wensuku ezintathu siye enkangala, siyihlabele iNkosi uNkulunkulu wethu njengokusilaya kwayo.

²⁸ UFaro wathi: Ngizalivumela ukuba liye enkangala ukuyihlabela iNkosi uNkulunkulu wenu; kodwa lingayi khatshana; futhi kalibongikhulekela.

²⁹ UMose wathi: Ngiyasuka kuwe, ngizakuyincenga iNkosi ukuba izibawu zisuke kusasa kuFaro lasencekwini zakhe lasebantwini bakhe; kodwa uFaro angaphindi akhohlise ngokungavumeli abantu bahambe, bayihlabele iNkosi.

³⁰ UMose wasephuma kuFaro, wayayincenga iNkosi.

³¹ INkosi yenza njengelizwi likaMose; yazisusa izibawu kuFaro lasencekwini zakhe lasebantwini bakhe; kakusalanga lesisodwa.

³² Kodwa uFaro wabuya wayenza yaba lukhuni inhliziyo yakhe, kabavumelanga abantu ukuba bahambe.