U-Eksodasi 7 - iBhayibhili Elingcwele 1978

¹ INkosi yathi kuMose: Ngikwenze waba njengonkulunkulu kuFaro; uAroni umfowenu uzakuba ngumkhulumeli wakho.

² Khuluma konke engikulaya khona; uAroni umfowenu uzakhuluma loFaro ukuba avumele abakoIsrayeli ukuba baphume elizweni lakhe.

³ Mina ngizakuyenza inhliziyo kaFaro ibe lukhuni, ngandise izibonakaliso lezimangaliso zami elizweni laseGibithe.

⁴ Kodwa uFaro kayikukulalela; ngakho ngizakwelula isandla sami phezu kweGibithe, ngikhuphe eGibithe izimpi zami, abantu bami abakoIsrayeli, ngezenzo ezinkulu.

⁵ AmaGibithe azakwazi ukuthi ngiyiNkosi, mhla ngelula isandla sami phezu kweGibithe, ngikhuphe abakoIsrayeli phakathi kwawo.

⁶ UMose loAroni benza njengokutsho kweNkosi.

⁷ UMose wayeleminyaka engamatshumi aficaminwembili, uAroni wayeleminyaka engamatshumi aficaminwembili lantathu mhla bekhuluma loFaro.

Isimangaliso esenziwa ngentonga kaAroni

⁸ INkosi yakhuluma kuboMose loAroni,

⁹ yathi: Nxa uFaro ekhuluma lani esithi: Zifakazeleni lina ngokwenza isimangaliso; uzakutsho kuAroni uthi: Thatha intonga yakho, uyiphosele phansi phambi kukaFaro ukuze ibe yinyoka.

¹⁰ UMose loAroni baya kuFaro, benza njengokulaya kweNkosi; uAroni waphosela phansi intonga yakhe phambi kukaFaro laphambi kwenceku zakhe, yaphenduka yaba yinyoka.

¹¹ UFaro wasebiza izazi lezangoma, abalumbi baseGibithe, labo benza njalo ngamalumbo abo.

¹² Bonke baphosela phansi intonga zabo, zaba zinyoka; kodwa intonga kaAroni yaginya izintonga zabo.

¹³ Kodwa inhliziyo kaFaro yajinga iba lukhuni, kazabalalela, njengokutsho kweNkosi.

Inhlupheko yokuqala: Amanzi aphenduka aba ligazi

¹⁴ INkosi yathi kuMose: Inhliziyo kaFaro ilukhuni, uyala ukuvumela abantu ukuba bahambe.

¹⁵ Uboya kuFaro ekuseni; lapho ephuma ukuya emanzini, ume ngasokhunjini lomfula ukuba umhlangabeze, uphethe esandleni sakho intonga eyaphenduka yaba yinyoka.

¹⁶ Uzakuthi kuye: INkosi uNkulunkulu wamaHeberu ingithume kuwe ithi: Vumela abantu bami ukuba bahambe, baye enkangala ukungikhonza; kodwa kuze kube khathesi kawulalelanga.

¹⁷ INkosi ithi: Ngalokhu uzakwazi ukuthi ngiyiNkosi; ngizatshaya amanzi omfula ngentonga esesandleni sami, aphenduke abe ligazi.

¹⁸ Inhlanzi ezisemfuleni zizakufa, lomfula unuke; amaGibithe azakwenyanya ukunatha amanzi asemfuleni.

¹⁹ INkosi yathi kuMose: Tshono kuAroni uthi: Thatha intonga yakho, welule isandla sakho phezu kwamanzi aseGibithe, phezu kwemifula lezifula lamachibi leziziba zonke ukuba kuphenduke kube ligazi. Kuzakuba khona igazi kulo lonke ilizwe laseGibithe, emiganwini yesihlahla lasezitsheni zamatshe.

²⁰ UMose loAroni benza njengokutsho kweNkosi; waphakamisa intonga, watshaya amanzi asemfuleni phambi kukaFaro laphambi kwenceku zakhe; wonke amanzi asemfuleni aphenduka aba ligazi.

²¹ Inhlanzi ezisemfuleni zafa; umfula wanuka, amaGibithe ahluleka ukuwanatha amanzi asemfuleni; kwakukhona igazi elizweni lonke laseGibithe.

²² Lezangoma zaseGibithe zenza njalo ngamalumbo azo; inhliziyo kaFaro yajinga iba lukhuni, kazabalalela, njengokutsho kweNkosi.

²³ UFaro wasesuka esiyangena endlini yakhe engakunanzi lokho enhliziyweni yakhe.

²⁴ AmaGibithe wonke emba inxa zonke zomfula ukuba athole amanzi okunatha, ngoba amanzi asemfuleni ayengasanatheki.

²⁵ Kwedlula insuku eziyisikhombisa kusukela ekutshayweni komfula yiNkosi.