U-Eksodasi 6 - iBhayibhili Elingcwele 1978

¹ Kodwa iNkosi yathi kuMose: Khathesi uzakubona lokho engizakukwenza kuFaro; ngenxa yesandla esilamandla uzakubayekela ukuba bahambe, abaxotshe elizweni lakhe ngesandla esiqinileyo.

UMose ubizwa ngokwesibili

² UNkulunkulu wakhuluma kuMose wathi: NgiyiNkosi;

³ ngabonakala kuAbrahama lakuIsaka lakuJakobe njengoNkulunkulu uSomandla; kodwa ngebizo lami lokuthi iNkosi ngangingaziwa kubo.

⁴ Ngamisa isivumelwano sami labo sokuba ngibaphe ilizwe laseKanani, ilizwe ababehlala kulo njengabezizwe.

⁵ Futhi ngizwile ukububula kwabakoIsrayeli abenziwe baba yizigqili ngamaGibithe; njalo ngikhumbula isivumelwano sami.

⁶ Ngakhoke tshono kwabakoIsrayeli ukuthi: NgiyiNkosi; ngizalikhupha ekucindezelweni kwenu ngamaGibithe; ngilikhulule ebugqilini benu, ngilihlenge ngengalo elamandla langezenzo ezinkulu zokwahlulela.

⁷ Ngizalithatha libe ngabantu bami, mina ngibe nguNkulunkulu wenu; lizakwazi ukuthi ngiyiNkosi uNkulunkulu wenu olikhupha ekucindezelweni kwenu ngamaGibithe;

⁸ ngizalingenisa elizweni engalithembisa lona ngesifungo ukulinika uAbrahama loIsaka loJakobe, ngilinike lona libe ngelenu; ngiyiNkosi.

⁹ UMose wasekhuluma ngokunjalo labakoIsrayeli; kodwa kabamlalelanga ngenxa yokudabuka kwenhliziyo zabo langenxa yobugqili babo obunzima.

¹⁰ INkosi yakhuluma kuMose,

¹¹ yathi: Yana kuFaro, inkosi yaseGibithe, ukhulume layo ukuba ivumele abakoIsrayeli ukuba baphume elizweni lakhe.

¹² Kodwa uMose wakhuluma phambi kweNkosi wathi: Khangela, abakoIsrayeli kabangilalelanga; phoke uFaro angangizwa kanjani mina engigagasayo na?

¹³ INkosi yakhuluma kuboMose loAroni ukuba babatshele abakoIsrayeli loFaro inkosi yaseGibithe ukuthi ibalayile ukukhupha abakoIsrayeli elizweni laseGibithe.

Inzalo kaMose lenzalo kaAroni

¹⁴ Laba bazinhloko zezindlu zaboyise; amadodana kaRubeni, izibulo likaIsrayeli, ayengoHanoki loPalu loHezironi loKarimi; laba balusendo lukaRubeni.

¹⁵ Amadodana kaSimeyoni ayengoJemuweli loJamini loOhadi loJakini loZohari loShawuli indodana yowesifazana waseKanani; laba balusendo lukaSimeyoni.

¹⁶ La ngamabizo amadodana kaLevi ngezizukulwana zawo; ayengoGerishoni loKohathi loMerari; iminyaka yokuhamba kukaLevi yayilikhulu lamatshumi amathathu lesikhombisa.

¹⁷ Amadodana kaGerishoni ayengoLibini loShimeyi ngosendo lwawo.

¹⁸ Amadodana kaKohathi ayengoAmramu loIzihari loHebroni loUziyeli; iminyaka yokuhamba kukaKohathi yayilikhulu lamatshumi amathathu lantathu.

¹⁹ Amadodana kaMerari ayengoMahli loMushi. Yilo lolusendo lwamaLevi ngezizukulwana zalo.

²⁰ UAmramu wathatha uJokebedi udadewaboyise, waba ngumkakhe. Wazala uAroni loMose. Iminyaka yokuhamba kukaAmramu yayilikhulu lamatshumi amathathu lesikhombisa.

²¹ Amadodana kaIzihari ayengoKora loNefegi loZikiri.

²² Amadodana kaUziyeli ayengoMishayeli loElizafani loSithiri.

²³ UAroni wathatha uElisheba indodakazi kaAminadaba, udadewabo kaNashoni, waba ngumkakhe. Wazala uNadabi loAbihu loEleyazare loIthamari.

²⁴ Amadodana kaKora ayengoAsiri loElkana loAbiyasafa: yilo lolusendo lwabakoKora.

²⁵ UEleyazare indodana kaAroni wathatha enye yamadodakazi kaPutiyeli, yaba ngumkakhe. Yazala uFiniyasi. Yizo lezi inhloko zezindlu zamaLevi ngosendo lwazo.

²⁶ Yibo labo oAroni loMose iNkosi eyathi kubo: Khuphani abakoIsrayeli elizweni laseGibithe ngezimpi zabo.

²⁷ Yibo labo ababekhuluma loFaro inkosi yaseGibithe ukuba akhuphe abakoIsrayeli eGibithe, yibo oMose loAroni.

INkosi iyabalaya oMose loAroni

²⁸ Kwathi mhla iNkosi ikhuluma kuMose elizweni laseGibithe,

²⁹ yathi kuye: Mina ngiyiNkosi; tshono kuFaro inkosi yaseGibithe konke engikutsho kuwe.

³⁰ Kodwa yena wathi eNkosini: Khangela, mina ngiyagagasa; uFaro angangizwa kanjani na?