U-Eksodasi 5 - iBhayibhili Elingcwele 1978

UMose loAroni baphambi kukaFaro

¹ Emva kwalokho uMose loAroni baya kuFaro bathi: INkosi uNkulunkulu wakoIsrayeli ithi: Bavumele abantu bami ukuba bahambe, bangenzele umkhosi enkangala.

² Kodwa uFaro wathi: INkosi ingubani ukuba ngilalele ilizwi layo, ngivumele abakoIsrayeli bahambe na? Kangiyazi iNkosi, futhi kangiyikubavumela abakoIsrayeli ukuba bahambe.

³ Basebesithi: UNkulunkulu wamaHeberu wahlangana lathi; ngakho ake usivumele ukuba sihambe ummango wezinsuku ezintathu siye enkangala, siyihlabele iNkosi uNkulunkulu wethu, funa isehlele ngesifo langempi.

⁴ Kodwa inkosi yaseGibithe yathi kubo: Lina Mose loAroni, libasuselani abantu emisebenzini yabo na? Sukani, liye emisebenzini yenu!

⁵ UFaro wathi: Khangelani, abantu belizwe sebebanengi, kanti lithanda ukubaphumuza emithwalweni yabo.

⁶ Ngalolosuku uFaro walaya ababonisi babantu lezinduna zabo wathi:

⁷ Lingabe lisabanika abantu utshani bokwenza izitina njengakuqala; kodwa kabahambe bayezibuthela utshani;

⁸ kodwa inani lezitina abakade bezenza bamiseleni lona, lingalinciphisi; ngoba bayavilapha; yikho lokhu bekhala besithi: Asihambeni siyehlabela uNkulunkulu wethu.

⁹ Banikeni umsebenzi onzima kakhulu ukuba bawenze, bangalaleli amazwi okukhohlisa.

¹⁰ Ababonisi lezinduna zabantu baphuma, batshela abantu bathi: UFaro uthi: Kangisayikulinika utshani;

¹¹ ngakho hambani lina, lizidingele utshani lapho lingabuthola khona; kodwa umsebenzi wenu kawuyikuncitshiswa ngalutho.

¹² Abantu basebehlakazeka kulo lonke ilizwe laseGibithe ukuba babuthe inhlanga zibe yibona utshani babo.

¹³ Ababonisi babaqhuba bathi: Qedani imisebenzi yenu yensuku ngensuku njengakuqala busekhona utshani.

¹⁴ Izinduna zabakoIsrayeli abazibekelwa ngababonisi bakaFaro zatshaywa, zabuzwa ukuthi: Kaliqedanga ngani umsebenzi wenu wokwenza izitina izolo lalamhla njengakuqala na?

¹⁵ Izinduna zabakoIsrayeli zasezisiya kuFaro, zakhala zathi: Wenzeleni okunje encekwini zakho na?

¹⁶ Inceku zakho kazinikwa utshani, kanti bathi kithi: Bumbani izitina. Futhi inceku zakho ziyatshaywa; kodwa yibo abantu bakho abonayo.

¹⁷ Kodwa yena wathi: Lina liyavilapha, yebo lingamavila; ngalokhu lithi: Asihambeni siyehlabela iNkosi.

¹⁸ Ngakho hambani, liyesebenza; ngoba kaliyikunikwa utshani, kanti lizakulenza lelonani lezitina.

¹⁹ Izinduna zabakoIsrayeli zasezibona ukuthi zazisekuhluphekeni nxa kuthiwa: Kaliyikunciphisa inani lezitina zenu lensuku ngensuku.

²⁰ Zahlangana loMose loAroni ababezilindele zisaphuma kuFaro;

²¹ zathi kubo: INkosi ilibone ilitshaye; ngoba lisenze sazondeka kuFaro lasencekwini zakhe; libeke umkhonto ezandleni zazo ukuba zisibulale.

²² UMose wabuyela eNkosini wathi: Nkosi, wenzeleni okubi kulababantu na? Ungithumeleni mina na?

²³ Selokhu ngaya kuFaro ukukhuluma ebizweni lakho, yena wenzile okubi kulababantu; futhi kawubakhululanga abantu bakho.