U-Eksodasi 2 - iBhayibhili Elingcwele 1978

Ukuzalwa kukaMose

¹ Kwasuka umuntu wendlu yakoLevi, wayathatha indodakazi yakoLevi.

² Owesifazana wathatha isisu, wazala indodana; esebonile ukuthi ingumntwana omuhle, wayifihla iyanga ezintathu.

³ Kwathi engaselakuyifihla wayenzela isitsha semizi, wasibhada ngengcino langodaka, wamfaka umntwana kuso, wasibeka emihlangeni ngasokhunjini lomfula.

⁴ Udadewabo walinda ekhatshana ukuba abone lokho okuzamehlela.

⁵ Kwasekusehla indodakazi kaFaro ukuzageza emfuleni; amantombazana ayo ahamba eceleni komfula. Isibonile isitsha emihlangeni, yathuma incekukazi yayo ukusithatha.

⁶ Yasivula, yambona umntwana ekhala. Yamhawukela yathi: Lo ngomunye wabantwana bamaHeberu.

⁷ Udadewabo wasesithi endodakazini kaFaro: Ngihambe ngiyekudingela umlizane kumaHeberu ukuze akumunyisele umntwana na?

⁸ Indodakazi kaFaro yathi: Hamba. Yahamba intombazana, yabiza unina womntwana.

⁹ Indodakazi kaFaro yathi kuye: Mthathe lumntwana, ungimunyisele yena; ngizakukunika isondlo. Owesifazana wamthatha umntwana, wammunyisa.

¹⁰ Umntwana esekhulile, wamusa endodakazini kaFaro, waba yindodana yayo. Yamutha ibizo yathi nguMose, ngoba yathi: Ngamkhupha emanzini.

Ukubaleka kukaMose

¹¹ Ngolunye usuku, uMose esekhulile, waphuma waya kubafowabo, wabona imithwalo yabo; futhi wabona umGibithe etshaya umHeberu, omunye wabafowabo.

¹² Wathalaza ngapha langapha; esebonile ukuthi kakulamuntu, wambulala umGibithe, wafihla isidumbu etshebetshebeni.

¹³ Waphuma langosuku olulandelayo, wabona amaHeberu amabili esilwa; wathi kowonileyo: Umtshayelani owakini na?

¹⁴ Yena wathi: Wena ubekwe ngubani ukuba ube yisikhulu lomahluleli wethu na? Uthi usufuna ukungibulala lami njengalokho ubulele umGibithe na? UMose wasetshaywa luvalo, wathi: Impela lindaba iyaziwa.

¹⁵ Kwathi uFaro esekuzwile lokhu, wazama ukumbulala uMose. Kodwa uMose wambalekela uFaro, waya elizweni laseMidiyani; wahlala phansi ngasemthonjeni.

¹⁶ Umpristi waseMidiyani wayelamadodakazi ayisikhombisa; afika ukukha amanzi, agcwalisa imitshokotsho ukunathisa izimvu zikayise.

¹⁷ Kwafika abelusi, bawaxotsha; kodwa uMose wasukuma, wawasiza ngokuzinathisa izimvu zawo.

¹⁸ Lapho efika kuRehuweli uyise, yena wathi: Kungani libuye masinyane lamhla na?

¹⁹ Athi: UmGibithe othile usilamulele kubo abelusi; futhi wasikhelela amanzi, wanathisa izimvu.

²⁰ Wathi emadodakazini akhe: Ungaphi? Limtshiyeleni na? Mbizeni, limnike ukudla.

²¹ UMose wazimisela ukuhlala lalowomuntu; yena wamnika uMose uZipora indodakazi yakhe.

²² Wazala indodana; wayitha ibizo wathi nguGereshoma, ngoba wathi: Ngangihlala elizweni elingesilo lakithi.

²³ Kwathi sekudlule insuku ezinengi, inkosi yaseGibithe yafa. AbakoIsrayeli babubula ngenxa yobugqili babo, bakhala; uNkulunkulu wezwa ukukhala kwabo ngobugqili babo.

²⁴ Esezwile ukububula kwabo, uNkulunkulu wakhumbula isivumelwano sakhe loAbrahama loIsaka loJakobe.

²⁵ UNkulunkulu wabona abakoIsrayeli, wabakhumbula.