U-Eksodasi 1 - iBhayibhili Elingcwele 1978

Ukuhlupheka kwabakoIsrayeli eGibithe

¹ La ngamabizo amadodana kaIsrayeli afika eGibithe; yileyo laleyo yafika lomuzi wayo,

² ayengoRubeni loSimeyoni loLevi loJuda

³ loIsakari loZebuluni loBenjamini

⁴ loDani loNafitali loGadi loAsheri.

⁵ Bonke abazalwa nguJakobe babengamatshumi ayisikhombisa. UJosefa wayeseseGibithe.

⁶ UJosefa wafa labo bonke abafowabo, laso sonke lesosizukulwana.

⁷ Abantu bakoIsrayeli bazalana, banda kakhulu baze baba banengi, baba lamandla; ilizwe lagcwala bona.

⁸ Kwasekuvela inkosi entsha eGibithe eyayingamazi uJosefa.

⁹ Yathi ebantwini bayo: Khangelani, abantu bakoIsrayeli banengi kakhulu, futhi balamandla kulathi.

¹⁰ Asibahlakanipheleni funa bande kakhulu, kuze kuthi lapho sihlaselwa yimpi, bahlangane lezitha zethu, balwe lathi, babaleke elizweni.

¹¹ Ngakhoke basebebabekela izinduna zokubasebenzisa ezabahlupha ngemithwalo enzima. Bamakhela uFaro imizi leziphala, iPithoma leRamesesi.

¹² Kodwa kwathi ekubahlupheni kwabo kwang’khona besanda ngamandla, basabalala, bagcwala indawo zonke. AmaGibithe abesaba abakoIsrayeli;

¹³ abasebenzisa nzima ekusebenzeni kwabo,

¹⁴ akwenza ukuphila kwabo kwaba buhlungu ngomsebenzi onzima wokwenza udaka lezitina, langemisebenzi yonke yasemasimini; abahlupha kakhulu, abasebenzisa nzima.

¹⁵ Inkosi yaseGibithe yakhuluma lababelethisi bamaHeberu, ibizo lomunye wabo linguShifira, elomunye linguPuwa,

¹⁶ yathi: Nxa libelethisa amaHeberu, lapho libona ebeletha indodana, liyibulale; kodwa uba kuyindodakazi, lingayibulali.

¹⁷ Kodwa ababelethisi babemesaba uNkulunkulu, kabenzanga njengokutsho kwenkosi yaseGibithe, kodwa babayekela abafana, baphila.

¹⁸ Inkosi yaseGibithe yasibiza ababelethisi, yathi kubo: Likwenzeleni lokhu ukuba liyekele abafana baphile na?

¹⁹ Ababelethisi bathi kuFaro: Kungoba amaHeberu engenjengamaGibithe; wona alamandla, abeletha engakafiki kuwo umbelethisi.

²⁰ Ngalokhu uNkulunkulu wenzela ababelethisi okuhle, abantu banda, baba lamandla.

²¹ Ngenxa yokuthi ababelethisi babemesaba uNkulunkulu, wabanika abantwana.

²² UFaro wabalaya bonke abantu bakhe wathi: Wonke amadodana azalwayo koIsrayeli alibowaphosela emfuleni, kodwa wonke amadodakazi alibowayekela aphile.