UZefaniya 2 - iBhayibhili Elingcwele 1978

Ukwahlulelwa kwezizwe

¹ Buthana, yebo buthana, wena sizwe esingelanhloni,

² ungakadudulwa njengamakhoba aphephukayo, ungakehlelwa yintukuthelo eyesabekayo yeNkosi, ungakafikelwa lusuku lolaka lweNkosi.

³ Dingani iNkosi, lina lonke abathobekileyo bomhlaba abenza imilayo yayo, dingani ukulunga, lidinge ukuthobeka; mhlawumbe lingavikelwa ngosuku lolaka lweNkosi.

⁴ Ngoba iGaza lizakutshiywa, leAshikeloni lizaba lunxiwa, labantu baseAshidodi bazaxotshwa emini, leEkroni lidilizwe.

⁵ Maye kwabakhileyo ngaseduze lolwandle, lina sizwe samaKerethi! Ilizwi leNkosi lingawe, Kanani, lizwe lamaFilistiya; ngizalichitha kuze kungabi khona ohlala khona.

⁶ Wena lizwe elingasolwandle, uzakuba ngamadlelo, ube yizihotsha zabelusi lezibaya zezimvu.

⁷ Ilizwe elingasolwandle lizakuba ngelabaseleyo endlini kaJuda belusele kilo, ezindlini zeAshikeloni bazalala khona kusihlwa. Ngoba iNkosi uNkulunkulu wabo izakubakhumbula, ibenzele inhlanhla.

⁸ Ngizwile ukukloloda kwamaMowabi lokuthuka kwamaAmoni, ukuba babaklolodela kanjani abantu bami, bezincoma ngelizwe labo.

⁹ Ngifunga ukuphila kwami, kutsho iNkosi yamabandla, uNkulunkulu kaIsrayeli, ngithi: UMowabi uzakuba njengeSodoma, lamaAmoni abe njengeGomora, ilizwe lezimbabazane lemigodi yetshwayi elachitheka kokuphela. Abaseleyo ebantwini bami bazakubaphanga, labasilileyo esizweni sami babathumbe.

¹⁰ Lokhu kuzakuba ngumvuzo wokuziphakamisa kwabo, ngoba bakloloda, bazikhukhumeza ngabantu beNkosi yamabandla.

¹¹ INkosi izakwenza okwesabekayo kibo; ngoba izabaqeda bonke onkulunkulu bomhlaba, akhuleke kuyo wonke amazwe ezizwe, wonke umuntuesendaweni yakibo.

¹² Lani futhi, maEtiyopiya, lizakubulawa ngomkhonto weNkosi.

¹³ Izakuphakamisela isandla sayo ngasenyakatho, ichithe iAsiriya, yenze iNineve ukuba ibe lunxiwa, lome njengenkangala.

¹⁴ Imihlambi izakulala phakathi kwalo, lazo zonke inyamazana zeganga, ingabuzane lodwayi kulale ebusuku ezinsikeni zalo, kukhale isikhova ewindini, lewabayi likhale ngasemnyango.

¹⁵ Yiwo lumuzi owajabula, owawulondolozekile, owawusithi: Mina ngikhona; kakho futhi omunye. Yeka ukuchitheka kwawo! Usuyindawo yokubuthanela inyamazana; bonke abadlula kiwo bayancifa, bawukhombe ngengqindi.