URuthe 3 - iBhayibhili Elingcwele 1978

URuthe loBowasi baya esizeni

¹ UNawomi uninazala wathi kuye: Mntanami, ngingakudingeli umuntu yini ongakuthatha ukuba uhlale kuhle laye na?

² Nango uBowasi isihlobo sethu obusebenza lamantombazana akhe. Uyabhula ibhali lakhe ngalobubusuku esizeni sakhe.

³ Geza ugcobe, ucece ngezigqoko zakho ezinhle, uye khona esizeni; kodwa ungazivezi kuye aze aqede ukudla lokunatha.

⁴ Kodwa kuthi lapho eselala, uqaphelise indawo alala kiyo, ungene, ubususambula inyawo zakhe, ulale phansi, yena uzakukutshela ofanele ukwenze.

⁵ URuthe wasesithi: Konke okutshoyo ngizakukwenza.

⁶ Wasesiya khona esizeni, wenza njengokutshelwa kwakhe nguninazala.

⁷ Kwathi lapho uBowasi esedlile wanatha, waba lomdlozela, wasuka wayalala phansi ekucineni kwenqumbi yamabele. URuthe wasenyenya, wambula inyawo zakhe, walala phansi.

⁸ Phakathi kobusuku uBowasi wethuka, waphenduka, wabona owesifazana elele ngasenyaweni zakhe.

⁹ Wathi: Ungubani wena? Yena waphendula wathi: NginguRuthe incekukazi yakho; yembesa incekukazi yakho ngengubo yakho, ngoba wena uyisihlobo sethu esiseduze kithi, ufanele ukungilondoloza.

¹⁰ Yena wathi: INkosi ikubusise, mntanami, ngoba usuwenze lumusa wakho ube mkhulu kulowokuqala, kawuyanga ensizweni ezingabayanga loba ezinothileyo.

¹¹ Ngakho, mntanami, ungesabi, ngizakukwenzela okucelayo, ngoba bonke abantu bomuzi wakithi bayazi ukuthi ungowesifazana oqotho.

¹² Yebo, kuliqiniso ukuba ngiyisihlobo esiseduze, kanti kukhona isihlobo esiseduze kakhulu kulami.

¹³ Hlala lapha lobubusuku; kuzakuthi ekuseni uba yena ethanda ukungena esikhundleni sesihlobo esiseduze, kulungile; kodwa uba engathandi, ngizakukwenza lokho mina, ngifunga iNkosi. Lalake kuze kuse.

¹⁴ URuthe walala ngasezinyaweni zakhe kwaze kwasa, wavuka ekuseni abantu bengakabonani; uBowasi wathi: Kakungaziwa muntu ukuba owesifazana ufikile lapha esizeni.

¹⁵ Wasesithi: Letha ingubo leyo oyembetheyo, uyendlale. URuthe waseyendlala. Yena wasemthelela ibhali elingamagokoko amathathu, wasemethwesa yona; uRuthe wabuyela ekhaya.

¹⁶ Kwathi esefikile kuninazala, yena wathi: Uqhube njani, mntanami? URuthe wasemtshela konke lowomuntu ayemenzele khona,

¹⁷ wathi: UBowasi unginike lamagokoko amathathu ebhali, ngoba wathi: Ungabuyeli kunyokozala ungelalutho.

¹⁸ UNawomi waphendula wathi: Hlala, mntanami, uze wazi ukuba lindaba izaphetha ngani, ngoba lowomuntu kayikuphumula, engakayilungisi indaba lamhla.