uObadiya 1 - iBhayibhili Elingcwele 1978

Ukuthotshiswa kukaEdoma

¹ Lo ngumbono kaObadiya. INkosi uNkulunkulu ithi ngoEdoma: Sizwile imibiko evela eNkosini, kuthunywe isithunywa phakathi kwezizwe ukuba sithi: Vukani, simvukele silwe laye!

² Ngizakukwenza ube mncinyane phakathi kwezizwe, udeleleke kakhulu.

³ Ukuziqhenya kwenhliziyo yakho kukukhohlisile, wena ohlala ezimbalwini zamawa, olendawo ephakemeyo yokuhlala, othi enhliziyweni yakho: Ngubani ozangehlisela phansi na?

⁴ Loba uqonga njengokhozi, loba isidleke sakho sakhiwe phakathi kwezinkanyezi, ngizakukwethula khona, kutsho iNkosi.

⁵ Uba amasela efika kuwe labaphangi ebusuku, lanxa ukulahlekelwa kwakho kungaba kukhulu, bebengayikuthatha lokho abakufunayo na? Uba abavuna izithelo zevini befika kuwe, bebengayikutshiya ingcosana na?

⁶ Yeka ukuphangwa kukaEsawu! Yeka ukufunisiswa kwamagugu akhe!

⁷ Bonke abangane bakho besivumelwano bakukhohlisile, bakuxotshela emngceleni; ababehlalisene lawe ngokuthula bakwahlule, labangane bakho abathembekileyo bakuthiyile; kakho okuqedisisayo lokhu.

⁸ INkosi ithi: Ngalolosuku ngizachitha abahlakaniphileyo eEdoma, ngiqede lokuhlakanipha entabeni yakoEsawu.

⁹ Amaqhawe akho, Temani, azatshaywa luvalo, ukuze lowo lalowo abulawe entabeni kaEsawu.

¹⁰ Ngenxa yesihluku esenziwa kumfowenu uJakobe uzabanjwa zinhloni, uchithwe uphele nya.

¹¹ Ngosuku owema ngalo khatshana, ngosuku abezizweni abathumba ngalo impahla yakhe, bangena emasangweni akhe, benza inkatho ngeJerusalema lawe wawunjengomunye wabo.

¹² Kodwa wawungafanelanga ukuthokoza ngomfowenu osukwini lokuhlupheka kwakhe; wawungafanelanga ukuthokoza ngabantu bakoJuda osukwini lokuchitheka kwabo; wawungafanelanga ukukloloda osukwini losizi lwakhe.

¹³ Ngabe kawungenanga ngesango labantu bami osukwini lokuhlupheka kwabo; ngabe kawuthokozanga ngezinhlupheko zabo osukwini lokuhlupheka kwabo; ngabe kawuphanganga impahla yabo osukwini lokuhlupheka kwabo.

¹⁴ Wawungafanelanga ukuma emahlukanweni endlela ukumvimbela ekubalekeni kwakhe; wawungafanelanga ukunikela abaphunyukileyo bakhe osukwini losizi lwakhe.

¹⁵ Ngoba usuku lweNkosi lusondele ezizweni zonke. Njengokwenza kwakho kuzakwenziwa njalo lakuwe, Edoma, izenzo zakho zizakwehliselwa ekhanda lakho.

¹⁶ Njengokuba lina bakoIsrayeli linathile inkezo yolaka entabeni yami engcwele, zonke izizwe ezikhona inxa zonke zizanatha kuyo kakhulu zinyamalale.

Ukuphakanyiswa kukaIsrayeli

¹⁷ Kodwa entabeni yaseZiyone kuzakuba khona abaphunyukileyo, izakuba ngcwele; lendlu kaJakobe izakudla ilifa layo.

¹⁸ Indlu kaJakobe izakuba ngumlilo, lendlu kaJosefa ibe lilangabi, indlu kaEsawu ibe ngamabibi; bazakuwatshisa bawaqede; kakuyikuba khona oseleyo endlini kaEsawu; ngoba iNkosi isikhulumile.

¹⁹ AbakoIsrayeli abaseNegebi bazakuthumba intaba kaEsawu, abaseShefela bathumbe ilizwe lamaFilistiya, kanye lelizwe lakoEfrayimi lelizwe laseSamariya, loBenjamini athumbe iGileyadi.

²⁰ Abathunjiweyo bempi yakoIsrayeli bazakubuya bathumbe ilizwe lamaKanani, kuze kufike eZarefathi; labathunjiweyo baseJerusalema abaSerafadi bazakubuya bathumbe imizi yaseNegebi.

²¹ Abasilileyo bakhwele entabeni yaseZiyone ukubusa intaba kaEsawu; iNkosi yiyo ezakubusa.