UNehemiya 4 - iBhayibhili Elingcwele 1978

Izitha zibahlupha abakhayo

¹ Kwathi uSanibalati esezwile ukuthi siyawakha umduli, wathukuthela kakhulu, wabahleka ulunya abaJuda.

² Wathi phambi kwabakibo laphambi kwempi yaseSamariya: LababaJudanyana bathi benzani na? Bathi bazayilungisa indawo na? Bathi bazanikela umnikelo, bawuqede umsebenzi ngasuku lunye na? Bangenza amatshe yini ngezinqwaba zengcekeza, layo ingetshileyo na?

³ UTobiya umAmoni wayelaye, yena wathi: Yebo, lalokho abakwakhayo, uba ikhanka likhwela phezu komduli wakho wamatshe lingakudilizela phansi.

⁴ Ngasengikhuleka ngisithi: Akuzwe, Nkulunkulu wethu, ukweyiswa kwethu okungaka! Buyisela ukukloloda kwabo emakhanda abo, ubenze baphangwe, bathunjelwe kwelinye ilizwe.

⁵ Ungaligubuzeli icala labo, lesono sabo ungasicimi emehlweni abo, ngoba basithukuthelisile thina esingabakhi.

⁶ Sawakhake umduli, yaze yahlangana yonke ingxenye yokuphakama kwawo, ngoba abantu babezimisele ukusebenza.

⁷ Kodwa kwathi oSanibalati loTobiya lamaArabiya lamaAmoni labaseAshidodi sebezwile ukuthi ukwakhiwa kwemiduli yaseJerusalema kuyaqhubekela phambili lokuthi izikhala seziqala ukuvaleka, bathukuthela kakhulu;

⁸ basebesenza icebo bonke lokuba bahlangane balwe leJerusalema, badunge phakathi kwalo.

⁹ Sakhuleka kuNkulunkulu wethu, sabeka abalindi ukuba basivikele emini lebusuku.

¹⁰ Kodwa abakoJuda bathi: Amandla abathwali asephelile, kanti izibi zisenengi; sesisahluleka ukusebenza emdulini.

¹¹ Lezitha zethu zathi: Bengakazi, bengakaboni lutho, sizatheleka kibo sibabulale, siwumise umsebenzi.

¹² Kwathi abaJuda ababehlala lazo befika emzini basixwayisa kanenginengi ukuthi bazakusihlasela bevela endaweni zonke.

¹³ Ngasengimisa abantu ngezindlu zabo behlomile ngemihedla lemikhonto lemitshoko, ngaphansi endaweni ezisobala ngemva komduli.

¹⁴ Sengibonile ukuthi bayesaba, ngathi kuzo izikhulu lezinduneni lakwabanye abantu: Lingabesabi. Khumbulani iNkosi enkulu leyesabekayo, lilwele abafowenu lamadodana enu lamadodakazi enu labomkenu lemizi yenu.

¹⁵ Kwathi izitha zethu sezizwile ukuthi sesikwazi konke lokuthi uNkulunkulu ufilisile icebo labo, sabuyela sonke emsebenzini wethu wokwakha umduli.

¹⁶ Kusukela mhlalokho ingxenye yabantu bami yasebenza ekwakheni, lengxenye yaphatha imikhonto lezihlangu lemitshoko, igqoke amabhatshi ensimbi. Izinduna zakhangela abakoJuda

¹⁷ ababesakha umduli. Ababethwala imithwalo bayithwala ngesinye isandla, baphatha izikhali ngakwesinye.

¹⁸ Bonke abakhi babehlomile imihedla yabo ngasenhlangothini zabo ekwakheni kwabo. Umuntu wokukhalisa impondo wema eceleni lami.

¹⁹ Ngathi kuzo izikhulu lezinduneni lakwabanye abantu: Umsebenzi mkhulu, futhi ubanzi; lathi sixekelene emdulini, omunye ukhatshana lomunye.

²⁰ Lapho lisizwa kukhala uphondo, gijimelani ngakithi; uNkunlunkulu wethu uzasilwela.

²¹ Ngakho saqhubeka emsebenzini; ingxenye yaphatha izikhali kusukela emadabukakusa kwaze kwaphuma izinkanyezi.

²² Ngathi futhi ebantwini ngalesosikhathi: Bonke abantu lezinceku zabo kabalale phakathi kweJerusalema ukuba sivikelwe ebusuku, sisebenze emini.

²³ Ngakhoke mina, lezihlobo zami, lalabo ababephethwe yimi, labangilindayo, kasizanga sikhumule izigqoko zethu, sahlala sihlomile izikhali zethu.