UNehemiya 2 - iBhayibhili Elingcwele 1978

UNehemiya uvunyelwa ukuya eJerusalema

¹ Ngenyanga kaNisani, ngomnyaka wamatshumi amabili wokubusa kwenkosi uAtakisekisi, iwayini laliphambi kwenkosi, ngalithatha ngayinika. Ngema phambi kwayo ngangidanile kakhulu.

² Yathi kimi: Kungani ukhangeleka udanile na? Kawuguli; kodwa udanile nje. Ngangisesaba kakhulu,

³ ngathi enkosini: Bayethe, nkosi! Ngizayekelelani ukudana nxa umuzi wakithi, indawo yamangcwaba abokhokho, usulunxiwa, lamasango awo asatshiswa ngomlilo na?

⁴ Inkosi yasisithi kimi: Ukhala ngani na? Ngasengikhuleka kuNkulunkulu ophezulu.

⁵ Ngathi enkosini: Uba kuyithokozisa inkosi, lenceku yakho isifumene umusa emehlweni akho, ngithumela koJuda emzini wamangcwaba abokhokho ukuba ngiwakhe futhi.

⁶ Inkosi yathi kimi, lenkosikazi ihlezi phansi kwayo: Uzahamba okwesikhathi esingakanani, ubuye nini na? Yavuma inkosi ukuba ngihambe, ngayitshela ukuba ngizahamba okwesikhathi esinganani.

⁷ Ngasengisithi enkosini: Uba kulungile enkosini kayinginike izincwadi eziya kubabusi belizwe elingaphetsheya komfula iYufrathi ukuze bangivumele ukudlula, ngiyefika koJuda,

⁸ lencwadi eya kuAsafi, umphathi wegusu lenkosi, ukuba anginike izigodo zokwenza insika zamasango enqaba ehlangene lethempeli, lezokwenza umduli womuzi, lezendlu engizahlala kiyo. Inkosi yanginika engikucelayo, ngoba uNkulunkulu wami wayelami.

⁹ Ngasengifika kubabusi belizwe elingaphetsheya kweYufrathi, ngabanika incwadi zenkosi. Inkosi yayithumele lami induna zempi labagadi bamabhiza.

¹⁰ Kodwa kwathi lapho uSanibalati waseHoroni loTobiya inceku, umAmoni, besizwa lokhu, kwabacunula kakhulu ukuba kukhona ofikileyo ukubenzela okuhle abakoIsrayeli.

UNehemiya ukhuthaza abaseJerusalema ukwakha imiduli yomuzi

¹¹ Ngafikake eJerusalema, ngahlala khona insuku ezintathu.

¹² Ngavuka ebusuku kanye lamadoda athile ayingcosana; kangitshelanga muntu ngalokho uNkulunkulu wami ayekufake enhliziyweni yami ukuba ngikwenzele iJerusalema. Ngangingelanyamazana ngaphandle kwaleyo engangiyigadile.

¹³ Ngaphuma ebusuku ngeSango leSigodi, ngaqonda eMthonjeni woMgobho ngaseSangweni loMquba, ngahlola imiduli yaseJerusalema eyayidilikile lamasango ayetshiswe ngomlilo.

¹⁴ Ngasengidlulela eSangweni loMthombo lasechibini lenkosi; kodwa kwakungelandawo yokudlula inyamazana engangiyigadile.

¹⁵ Ngasengihamba esigodini ebusuku ngihlola umduli; ngabuyela emuva, ngangena ngeSango leSigodi.

¹⁶ Izinduna zazingazi ukuba bengingaphi lokuba bengisenzani. Ngangingakabatsheli abaJuda labapristi lezikhulu lezinduna kanye labanye ababezakuphatha umsebenzi.

¹⁷ Ngasengisithi kibo: Liyabona inhlupheko esikiyo ukuthi iJerusalema lidilikile lamasango alo atshile. Wozani sakhe umduli waseJerusalema ukuba singabi lahlazo.

¹⁸ Ngabatshela ngomusa uNkulunkulu wami angenzela wona langamazwi inkosi eyayiwakhulume kimi. Basebesithi: Asisukeni, sakhe. Bakhuthala ukwenza kuhle umsebenzi.

¹⁹ Kodwa kwathi lapho uSanibalati waseHoroni loTobiya inceku, umAmoni, loGeshema umArabiya bekuzwa lokhu basihleka ulunya, baseyisa besithi: Kambe kuyini lokhu elikwenzayo na? Liyayivukela inkosi na?

²⁰ Mina ngathi kibo: UNkulunkulu ophezulu uzasiphumelelisa; lathi esiyizinceku zakhe sizasuka sakhe; kodwa lina kalilasabelo lelungelo lesikhumbuzo eJerusalema.