UNehemiya 13 - iBhayibhili Elingcwele 1978

Eminye imisebenzi kaNehemiya

¹ Ngalolosuku bababalela abantu ugwalo lukaMose; kwafunyaniswa kulotshiwe kulo ukuthi abaseAmoni labaseMowabi kabasoze bangene ebandleni likaNkulunkulu,

² ngoba bengahlangabezanga abakoIsrayeli ngokudla lamanzi, kodwa bathenga uBalami ukuba abaqalekise; kodwa uNkulunkulu wethu waphendula ukuqalekisa kwaba yisibusiso.

³ Kwathi abantu sebewuzwile umlayo babakhupha koIsrayeli bonke labo abadabuka ezizweni.

⁴ Ngaphambi kwalokho uEliyashibi umpristi owayemiswe ukuphatha izindlu zethempeli likaNkulunkulu wethu, owayeyisihlobo sikaTobiya,

⁵ walungisela uTobiya indlu enkulu lapho ababekade befake khona umnikelo wempuphu lempepha lezitsha zethempeli lokwetshumi kwamabele lokwewayini lokwamafutha, okwakumiswe ngomlayo ukuba kunikwe amaLevi labahlabeleli labalindi bamasango leziphiwo zabapristi.

⁶ Ngaso sonke lesosikhathi ngangingekho eJerusalema, ngoba ngomnyaka wamatshumi amathathu lambili okubusa kukaAtakisekisi inkosi yaseBabiloni ngaya enkosini. Ngemva kwesikhathi ngacela enkosini uAtakisekisi

⁷ ukubuyela eJerusalema, ngafumanisa okubi okwakwenziwe nguEliyashibi ekwenzela uTobiya ngokumnika indlu emagumeni endlu kaNkulunkulu.

⁸ Ngathukuthela kakhulu, ngazikhuphela phandle zonke impahla zikaTobiya.

⁹ Ngasengilaya ukuba kuhlanjululwe leyondlu; ngabuyisela phakathi izitsha zendlu kaNkulunkulu kanye lomnikelo wempuphu lempepha.

¹⁰ Ngafumanisa futhi ukuthi amaLevi ayengasazinikwa izabelo zawo, lokuthi amaLevi labahlabeleli ababefanele ukusebenza bonke basebezibuyelele emasimini abo.

¹¹ Ngazisola izinduna ngathi: Kungani kungaselamuntu endlini kaNkulunkulu na? Ngasengibuthanisa amaLevi, ngawabuyisela emisebenzini yawo.

¹² Bonke abakoJuda basebeletha okwetshumi kwamabele lokwewayini lokwamafutha eziphaleni.

¹³ Ngasengibeka oShelemiya umpristi, loZadoki umbhali, loPedaya wakumaLevi, ukuba ngabagcini beziphala, ngabeka loHanani indodana kaZakuri loMathaniya ukuba abasize, ngoba babethembekile; umsebenzi wabo wawuyikwabela abafowabo.

¹⁴ Nkulunkulu wami, akungikhumbule mayelana lalokho, ungayicimi imisebenzi yami emihle engiyenzele indlu kaNkulunkulu wami lenkonzo yakhona.

¹⁵ Ngalezonsuku ngabona abantu bakoJuda benyathela izikhamelo zewayini ngeSabatha, bethatha lamabele amanengi, bewathwalisa obabhemi, lewayini, lezithelo zezivini lezomkhiwa, lazo zonke inhlobo zemithwalo abazingenisa eJerusalema ngeSabatha. Ngabaxwayisa mhla bethengisa ukudla.

¹⁶ Abantu baseTire labo ababehlala phakathi komuzi baletha inhlanzi lenhlobo zonke zempahla, bazithengisa ngeSabatha kwabakoJuda laseJerusalema.

¹⁷ Ngazisola izikhulu zakoJuda, ngathi kuzo: Buyini lobobubi elibenzayo ngokungcolisa usuku lweSabatha na?

¹⁸ Kabenzanga nje okhokho benu, loNkulunkulu wethu kehliselanga kithi lakulumuzi bonke lobububi na? Kanti lina ng’khona lisandisa ulaka kuIsrayeli ngokungcolisa iSabatha.

¹⁹ Kwathi lapho sekuqala ukuba mnyama emasangweni aseJerusalema lingakafiki iSabatha, ngathi iminyango kayivalwe, ingavulwa kuze kwedlule iSabatha. Ngabeka ezinye inceku zami emasangweni ukuba kungangeniswa mthwalo ngosuku lweSabatha.

²⁰ Abathengi labathengisi benhlobo zonke zempahla balala ngaphandle kweJerusalema kanye loba kabili.

²¹ Ngabaxwayisa ngathi kibo: Lilalelani eduzane lomduli na? Uba liphinda futhi, ngizalibopha. Kusukela kulesosikhathi kabasezanga futhi ngeSabatha.

²² Ngasengitshela amaLevi ukuba bazihlambulule, beze ukulinda amasango ukuze usuku lweSabatha lulondolozwe lube ngcwele. Nkulunkulu wami, ukukhumbule lalokho, ungihawukele ngenxa yomusa wakho omkhulu.

²³ Langalezonsuku ngafumana abaJuda ababethethe abafazi baseAshidodi labaseAmoni labaseMowabi;

²⁴ ingxenye yabantwana babo babekhuluma ulimi lwaseAshidodi labanye olwezinye izizwe, kodwa bengalwazi olwabakoJuda.

²⁵ Ngaphikisana labo, ngabaqalekisa, ngatshaya abanye babo, ngangcothula inwele zabo; ngabafungisa ngebizo likaNkulunkulu ukuba bathi: Kasisayikwendisela amadodakazi ethu amadodana abo, loba sithathele amadodana ethu amadodakazi abo, ingabe sizithathele thina.

²⁶ Ngathi: USolomoni inkosi yakoIsrayeli konanga yini ngenxa yabafazi abanje? Ezizweni ezinengi kwakungekho inkosi enjengaye, wayethandeka kuNkulunkulu wakhe, uNkulunkulu wamenza inkosi yakoIsrayeli wonke; kantike abafazi bezizweni bamenza laye ukuba one.

²⁷ Kasithandi ukuphinda sizwe ukuthi lenza lobobubi, lone kuNkulunkulu wethu ngokuthatha abafazi bezizweni.

²⁸ Enye yamadodana kaJehoyada, indodana kaEliyashibi umpristi omkhulu, yayingumkhwenyana kaSanibalati waseHoroni, ngayixotsha.

²⁹ Nkulunkulu wami, ubakhumbule, ngoba bangcolisile ubupristi lesivumelwano sabapristi lamaLevi.

³⁰ Ngabahlambulula ngokunjalo kukho konke okwezizweni, ngamisa imisebenzi yabapristi lamaLevi, ngabanika bonke imisebenzi yabo;

³¹ ngenza imithetho yokulethwa kwenkuni zeminikelo ngesikhathi esimisiweyo, leyezithelo zokuqala. Nkulunkulu wami, ungikhumbule ngokuhle.