UNehemiya 12 - iBhayibhili Elingcwele 1978

Abapristi lamaLevi abafika loZerubabeli

¹ Nampa abapristi lamaLevi ababuya loZerubabeli indodana kaSalatiyeli loJeshuwa; oSeraya loJeremiya loEzra

² loAmariya loMaluki loHathushi

³ loShekaniya loRehuma loMeremothi

⁴ loIdo loGinethoyi loAbija

⁵ loMijamini loMahadiya loBiliga

⁶ loShemaya loJoyaribi loJedaya

⁷ loSalu loAmoki loHilikiya loJedaya. Laba babeyizikhulu zabapristi lezezihlobo zabo ensukwini zikaJeshuwa.

⁸ AmaLevi ayengoJeshuwa loBinuwi loKadimiyeli loSherebiya loJuda, loMathaniya, yena labafowabo yibo ababekhokhela ekuhlabeleni ingoma zokubonga.

⁹ OBakibukiya loUno labafowabo babezophisana enkonzweni.

¹⁰ UJeshuwa wayenguyise kaJoyakimi, uJoyakimi enguyise kaEliyashibi, uEliyashibi enguyise kaJoyada,

¹¹ uJoyada enguyise kaJonathani, uJonathani enguyise kaJaduwa.

¹² Ensukwini zikaJoyakimi abapristi ababezinhloko zezindlu koSeraya kwakunguMeraya, koJeremiya kunguHananiya,

¹³ koEzra kunguMeshulamu, koAmariya kunguJehohanani,

¹⁴ koMaluki kunguJonathani, koShebaniya kunguJosefa,

¹⁵ koHarimi kunguAdina, koMerayothi kunguHelikayi,

¹⁶ koIdo kunguZekariya, koGinethoni kunguMeshulamu,

¹⁷ koAbija kunguZikiri, koMiniyamini kungu, — koMowadiya kunguPilitayi,

¹⁸ koBiliga kunguShamuwa, koShemaya kunguJehonathani,

¹⁹ koJoyaribi kunguMathenayi, koJedaya kunguUzi,

²⁰ koSalu kunguKalayi, koAmoki kunguEberi,

²¹ koHilikiya kunguHashabiya, koJedaya kunguNethaneli.

²² Ensukwini zikaEliyashibi loJoyada loJohanani loJaduwa inhloko zezindlu zamaLevi lezabapristi zazilotshiwe kwaze kwaba sensukwini zikaDariyu umPerisiya.

²³ KwabakoLevi inhloko zezindlu zazilotshiwe ogwalweni lwezindaba kwaze kwaba sensukwini zikaJohanani indodana kaEliyashibi.

²⁴ Inhloko zamaLevi zazingoHashabiya loSherebiya loJeshuwa loBinuwi loKadimiyeli, labafowabo ababesima maqondana labo ukudumisa lokubonga, njengomlayo kaDavida umuntu kaNkulunkulu, behlabela benikezelana.

²⁵ OMathaniya loBakibukiya loObadiya loMeshulamu loTalimoni loAkubi babengabalindi bamasango belinda iziphala ezisemasangweni.

²⁶ Labo babekhona ensukwini zikaJoyakimi indodana kaJeshuwa kaJozadaki, lasensukwini zikaNehemiya umbusi loEzra umpristi lombhali.

Inkonzo yokubongela ukwakhiwa komduli

²⁷ Enkonzweni yokubongela ukwakhiwa komduli weJerusalema badinga amaLevi ezindaweni zawo wonke ukuba eze eJerusalema enkonzweni yokubonga, abonge ngokuthokoza, adumise ngokuhlabela ngezigubhu langamachacho langemihubhe.

²⁸ Abahlabeleli, amaLevi, babuthana bevela endaweni zonke ezizingelezele iJerusalema lemizini yabaseNetofa,

²⁹ laseBeti‐Giligali laselizweni laseGeba laseAzimavethi, ngoba abahlabeleli babezakhele imizi emmangweni waseJerusalema.

³⁰ Abapristi lamaLevi bazihlambulula, bahlambulula labantu lamasango lomduli.

³¹ Ngasengikhweza izikhulu zakoJuda emdulini, ngamisa amaxuku amakhulu amabili okuhlabela abekelela udwendwe; elinye lahamba phezu komduli lisiya eSangweni loMquba,

³² lalandelwa nguHoshaya lengxenye yezikhulu zakoJuda,

³³ loAzariya loEzra loMeshulamu

³⁴ loJuda loBenjamini loShemaya loJeremiya,

³⁵ labapristi abathile bephethe impondo zokukhaliswa, bengoZekariya indodana kaJonathani kaShemaya kaMathaniya kaMikaya kaZakuri kaAsafi,

³⁶ lezihlobo zakhe oShemaya loAzareli loMilalayi loGilalayi loMahayi loNethaneli loJuda loHanani bephethe izinto zokukhaliswa zikaDavida umuntu kaNkulunkulu; uEzra umbhali wayehamba phambi kwabo.

³⁷ Bedlula iSango loMthombo, baqhubekela phambili bekhwela izinyathelo zokuya emzini kaDavida eduze lomqanso womduli womuzi, badlula indlu kaDavida, baya eSangweni laManzi ngasempumalanga.

³⁸ Elinye ixuku lalabo abahlabelayo loqonda ngakwesokhohlo, ngalilandela kanye lengxenye yezikhulu, sahamba phezu komduli ngaphezu koMphotshongo weSithando somlilo saya eMdulini obanzi

³⁹ ngaphezu kweSango lakoEfrayimi, eduze leSango eLidala leduze leSango leNhlanzi loMphotshongo kaHananeli loMphotshongo weKhulu, saya eSangweni leZimvu; safika sema eSangweni laBalindi.

⁴⁰ Womabili amaxuku alabo abahlabelayo ema endlini kaNkulunkulu, mina lengxenye yezinduna ezazilami,

⁴¹ labapristi oEliyakimi loMahaseya loMiniyamini loMikaya loEliyowenayi loZekariya loHananiya bephethe impondo zokukhaliswa,

⁴² loMahaseya loShemaya loEleyazare loUzi loJehohanani loMalikiya loElamu loEzeri. Abahlabeleli bahlabela bekhokhelwa nguJezrahiya.

⁴³ Banikela imihlatshelo eminengi mhlalokho, bathokoza, ngoba uNkulunkulu wayebanike lokho okubathokozisayo kakhulu; abesifazana labantwana labo bathokoza; ukuthokoza kweJerusalema kwezwakala khatshana.

Izabelo zabapristi lezamaLevi

⁴⁴ Ngalolosuku kwamiswa abantu bokuphatha izindlu zokulondoloza iziphiwo lezithelo zokuqala lokwetshumi, lokuqoqa izabelo zabapristi lezamaLevi ezimiswe ngumlayo ngamasimu emizi. Bonke abakoJuda babethokoza kakhulu ngokukhonza kwabapristi lamaLevi,

⁴⁵ ngoba bayenza inkonzo kaNkulunkulu wabo lenkonzo yokuhlambulula. Abahlabeleli labalindi bamasango labo benza umsebenzi wabo, njengokumisa kukaDavida lendodana yakhe uSolomoni.

⁴⁶ Ngoba ensukwini zikaDavida uAsafi wabekwa waba yinduna yabahlabeleli bokudumisa lokubonga uNkulunkulu.

⁴⁷ Ensukwini zikaZerubabeli loNehemiya bonke abakoIsrayeli banika isabelo sensuku zonke esabahlabeleli lesabalindi bamasango; bahlukanisela amaLevi lokho okungokwawo, lamaLevi ahlukanisela abakoAroni lokho okungokwabo.