UNehemiya 11 - iBhayibhili Elingcwele 1978

Abahlala beJerusalema

¹ Izinduna zabantu zahlala eJerusalema; abantu abaseleyo benza inkatho ukuba balethe oyedwa ebantwini bonke abalitshumi ukuhlala eJerusalema umuzi ongcwele, kuthi abaficamunwemunye etshumini bahlale kweminye imizi.

² Abantu bababonga abazinikela ukuyahlala eJerusalema.

³ Nanzi izinduna zelizwe ezahlala eJerusalema. Abanye abakoIsrayeli, abapristi lamaLevi lezinceku zasethempelini lenzalo yezinceku zikaSolomoni bahlala endaweni zabo emizini yakoJuda.

⁴ Abanye bezizwe zakoJuda lakoBenjamini bahlala eJerusalema. KwabakoJuda kwakungoAthaya indodana kaUziya kaZekariya kaAmariya kaShefathiya kaMahalaleli, owendlu kaPerezi,

⁵ loMahaseya indodana kaBaruki kaKolihoze kaHazaya kaAdaya kaJoyaribi kaZekariya owendlu yomShiloni.

⁶ Wonke amadodana kaPerezi ayehlala eJerusalema engamakhulu amane lamatshumi ayisithupha lesificaminwembili ayengamaqhawe.

⁷ Nanka amadodana kaBenjamini; uSalu indodana kaMeshulamu kaJowedi kaPedaya kaKolaya kaMahaseya kaIthiyeli kaJeshaya,

⁸ lezihlobo zakhe oGabayi loSalayi, abantu abangamakhulu aficamunwemunye lamatshumi amabili lesificaminwembili.

⁹ UJoweli indodana kaZikiri wayengumphathi wabo, loJuda indodana kaHasenuwa engumsizi wakhe phakathi komuzi.

¹⁰ Kubapristi kwakungoJedaya indodana kaJoyaribi, loJakini,

¹¹ loSeraya indodana kaHilikiya kaMeshulamu kaZadoki kaMerayothi kaAhitubi, umphathi wendlu kaNkulunkulu,

¹² kanye labafowabo ababekhonza endlini yeNkosi, bengamakhulu aficaminwembili lamatshumi amabili lambili; loAdaya indodana kaJerohamu kaPelaliya kaAmzi kaZekariya kaPashuri kaMalikiya,

¹³ labafowabo, inhloko zezindlu, bengamakhulu amabili lamatshumi amane lambili; loAmashayi indodana kaAzareli kaAhizayi kaMeshilemothi kaImeri,

¹⁴ labafowabo, amadoda ayengamaqhawe alikhulu lamatshumi amabili lesificaminwembili; umphathi wabo wayenguZabidiyeli indodana kaHagedolimi.

¹⁵ KumaLevi kwakunguShemaya indodana kaHashubi kaAzirikamu kaHashabiya kaBuni;

¹⁶ loShabethayi loJozabadi, izikhulu zamaLevi ezaziphethe umsebenzi wangaphandle kwendlu kaNkulunkulu;

¹⁷ loMathaniya indodana kaMika kaZabidi kaAsafi owayenguye owayeqalisa imikhuleko yokubonga; loBakibukiya owesibili phakathi kwabafowabo; loAbida indodana kaShamuwa kaGalali kaJeduthuni.

¹⁸ Wonke amaLevi ayesemzini ongcwele ayengamakhulu amabili lamatshumi aficaminwembili lane.

¹⁹ Abalindi bamasango babengoAkubi loTalimoni labafowabo ababelinda amasango babe likhulu lamatshumi ayisikhombisa lambili.

²⁰ AbakoIsrayeli abaseleyo babesemizini yonke yakoJuda, bonke besezindaweni zabo.

²¹ Inceku zasethempelini zazihlala eOfeli ziphathwa nguZiha loGishipa.

²² Umphathi wamaLevi eJerusalema wayenguUzi indodana kaBani kaHashabiya kaMathaniya kaMika owendlu kaAsafi abahlabeleli ababephatha umsebenzi wokuhlabela endlini kaNkulunkulu.

²³ Ngoba babengaphansi komthetho wenkosi belomsebenzi abawenzayo insuku zonke.

²⁴ UPethahiya indodana kaMeshezabeli, owendlu kaZera indodana kaJuda, wayengumeluleki wenkosi kuzo zonke indaba ezimayelana labantu.

Abahlala kweminye imizi

²⁵ Mayelana lemizana lamasimu ayo, abanye abakoJuda babehlala eKiriyathi‐Arba lemizaneni yakhona, laseDiboni lemizaneni yakhona, laseJekabizeli lemizaneni yakhona,

²⁶ laseJeshuwa laseMolada laseBeti‐Peleti

²⁷ laseHazar‐Ishuwali laseBerisheba lemizaneni yakhona,

²⁸ laseZiklagi laseMekona lemizaneni yakhona,

²⁹ laseEni‐Rimoni laseZora laseJarimuthi

³⁰ laseZanowa laseAdulamu lemizaneni yakhona, eLakishi lemimangweni yakhona, laseAzeka lemizaneni yakhona. Bahlala kusukela eBerisheba kusiya esihotsheni saseHinomu.

³¹ LabakoBenjamini bahlala kusukela eGeba kusiya eMikimashi laseAyija laseBetheli lemizaneni yakhona,

³² laseAnathothi laseNobi laseAnaniya

³³ laseHazori laseRama laseGithayimi

³⁴ laseHadidi laseZeboyimi laseNebalati

³⁵ laseLodi laseOno, laleSigodini sezingcitshi.

³⁶ Izigaba ezithile zamaLevi zazihlala koJuda lakoBenjamini.