UNehemiya 10 - iBhayibhili Elingcwele 1978

¹ Labo abafaka uphawu lwabo kulesisivumelwano babengoNehemiya umbusi indodana kaHakaliya loZedekiya

² loSeraya loAzariya loJeremiya

³ loPashuri loAmariya loMalikiya

⁴ loHathushi loShebaniya loMaluki

⁵ loHarimi loMeremothi loObadiya

⁶ loDaniyeli loGinethoni loBaruki

⁷ loMeshulamu loAbija loMijamini

⁸ loMahaziya loBiligayi loShemaya; yilabo abapristi.

⁹ AmaLevi ayengoJeshuwa indodana kaAzaniya, loBinuwi wakoHenadabi, loKadimiyeli,

¹⁰ labafowabo bengoShebaniya loHodiya loKelita loPelaya loHanani

¹¹ loMika loRehobi loHashabiya

¹² loZakuri loSherebiya loShebaniya

¹³ loHodiya loBani loBeninu.

¹⁴ Induna zabantu zazingoParoshi loPahathi‐Mowabi loElamu loZathu loBani

¹⁵ loBuni loAzigadi loBebayi

¹⁶ loAdonija loBigivayi loAdini

¹⁷ loAteri loHezekiya loAzuri

¹⁸ loHodiya loHashuma loBezayi

¹⁹ loHarafi loAnathothi loNebayi

²⁰ loMagipiyashi loMeshulamu loHeziri

²¹ loMeshezabeli loZadoki loJaduwa

²² loPelatiya loHanani loAnaya

²³ loHosheya loHananiya loHashubi

²⁴ loHaloheshi loPiliha loShobeki

²⁵ loRehuma loHashabina loMahaseya

²⁶ loAhiya loHanani loAnani

²⁷ loMaluki loHarimi loBahana.

²⁸ Abantu abaseleyo abangabapristi lamaLevi labalindi bamasango labahlabeleli lezinceku zasethempelini labo bonke abazahlukanisayo ebantwini bezizwe ukuba bagcine umlayo kaNkulunkulu, labomkabo lamadodana abo lamadodakazi abo, labo bonke abantwana abaqedisisayo,

²⁹ bazihlanganisa labakibo, izikhulu zabo, bazibopha ngesifungo sokuhamba ngomlayo kaNkulunkulu owanikwa ngoMose inceku kaNkulunkulu, lokuyigcina bayenze yonke imilayezelo yeNkosi yethu lemithetho yayo lezimiso zayo.

³⁰ Kasiyikwendisela abantu balelilizwe amadodakazi ethu loba sithathele amadodana ethu amadodakazi abo.

³¹ Uba abantu balelilizwe beletha impahla loba amabele ukukuthengisa ngeSabatha, kasiyikuthenga kibo ngeSabatha langosuku olungcwele. Sizayekela ukulima ngomnyaka wesikhombisa, siyekele lemilandu yonke.

³² Futhi siyazimisela ukukhupha iminyaka yonke ingxenye yesithathu yeshekeli ibe ngeyomsebenzi wendlu kaNkulunkulu wethu,

³³ leyesinkwa esahlukaniselwe uNkulunkulu, leyomnikelo wempuphu wensuku zonke, leyomnikelo wokutshiswa wensuku zonke, leyamaSabatha, leyokuthwasa kwenyanga, leyemikhosi emisiweyo, leyeziphiwo ezingcwele, leyeminikelo yesono ukwenzela uIsrayeli ukubuyisana, leyawo wonke umsebenzi wendlu kaNkulunkulu.

³⁴ Thina abapristi lamaLevi labantu senzile inkatho mayelana lenkuni zeminikelo ukuba zilethwe endlini kaNkulunkulu wethu yizindlu zonke ngokuzophisana, ngezikhathi ezimisiweyo iminyaka ngeminyaka, zibaswe phezu kwealtare likaNkulunkulu wethu njengokulotshiweyo emlayweni.

³⁵ Siyazimisela ukuletha izithelo zokuqala zomhlaba wethu lezithelo zokuqala zezihlahla zonke ethempelini iminyaka ngeminyaka;

³⁶ lokuletha kubapristi abasebenzayo kulo amadodana ethu angamazibulo lamazibulo ezifuyo zethu, njengoba kulotshiwe emlayweni, lamazibulo emihlambi yethu, awezinkomo lezimvu;

³⁷ silethe lenhlama yethu yokuqala, lezithelo zezihlahla zonke, lewayini lamafutha kubapristi eziphaleni zendlu kaNkulunkulu wethu; silethe lakumaLevi okwetshumi okuvela emasimini ethu, ngoba yiwo amaLevi aqoqa okwetshumi emizini yethu yonke esemaphandleni.

³⁸ Umpristi wozalo lukaAroni uzakuba lamaLevi lapho esamukela okwetshumi. AmaLevi azakungenisa okwetshumi kwalokho endlini kaNkulunkulu wethu eziphaleni zayo.

³⁹ AbakoIsrayeli lamaLevi bazakuletha umnikelo wamabele lewayini lamafutha ezindlini lapho kulondolozwa khona izitsha zethempeli, lalapho abapristi abaphatha umsebenzi labalindi bamasango labahlabeleli bahlala khona. Kasiyikuyivilaphela indlu kaNkulunkulu wethu.