UNehemiya 1 - iBhayibhili Elingcwele 1978

Umkhuleko kaNehemiya ngabaseJerusalema

¹ Nansi indaba kaNehemiya indodana kaHakaliya. Kwathi ngenyanga kaKisilevi ngomnyaka wamatshumi amabili wokubusa kukaAtakisekisi, ngiseSusa emzini omkhulu,

² uHanani omunye wabafowethu wafika lamadoda athile evela koJuda. Ngababuza mayelana labaJuda ababebuyile ekuthunjweni, langeJerusalema.

³ Bathi kimi: Labo ababuyayo ekuthunjweni baphakathi kokuhlupheka okukhulu lehlazo, ngoba lomduli waseJerusalema sewadilika, lamasango alo atshiswa ngomlilo.

⁴ Kwathi ngisizwa lamazwi ngahlala phansi ngakhala, ngalila insuku ezinengi, ngizila ukudla, ngikhuleka kuNkulunkulu ophezulu.

⁵ Ngathi: Nkosi, Nkulunkulu ophezulu, Nkulunkulu omkhulu lowesabekayo, ogcina isivumelwano lolothando olungapheliyo kulabo abakuthandayo begcina imilayo yakho,

⁶ akubeke indlebe yakho, uvule lamehlo akho, ukuzwa umkhuleko wenceku yakho engiwukhuleka kuwe emini lebusuku ngabantu bakoIsrayeli, izinceku zakho, ngivuma izono zabo esizenzileyo kuwe. Yebo, mina lendlu kababa sonile.

⁷ Senza okubi kakhulu kuwe, kasigcinanga imilayo yakho lezimiso zakho lemithetho yakho owalaya ngayo inceku yakho uMose.

⁸ Khumbula ilizwi owalaya ngalo uMose inceku yakho usithi: Uba lingathembekanga, ngizalichithachithela ezizweni;

⁹ kodwa uba libuya kimi, lilondoloza imilayo yami liyenze, lanxa abachithiweyo benu besemaphethelweni omhlaba, ngizababutha lapho ngibabuyise endaweni engiyikhethele ukuba ibizo lami lidunyiselwe kiyo.

¹⁰ Nkosi, bona bazinceku zakho labantu bakho owabahlenga ngamandla akho amakhulu langesandla sakho esilamandla.

¹¹ Akubeke indlebe yakho encekwini yakho, uzwe lomkhuleko wezinceku zakho ezithanda ukuhlonipha ibizo lakho, uyiphumelelise inceku yakho lamhla, uyinike isihawu phambi kwenkosi. Ngangingumphathi wezitsha zenkosi ngalesosikhathi.