UmTshumayeli 9 - iBhayibhili Elingcwele 1978

¹ Konke lokhu ngakudinga ngengqondo yami, ngakuhlolisisa ukuba abalungileyo labahlakaniphileyo lezenzo zabo kusesandleni sikaNkulunkulu; loba kuluthando ingabe inzondo umuntu kakwazi. Konke okuphambi kwabo kulize,

² ngoba ukuphela kwabo kunye, kolungileyo lomubi, komuhle longalunganga, kohlambulukileyo longahlambulukanga, konikela imihlatshelo longayinikeliyo. Umuntu olungileyo uyafanana lesoni, lofungayo uyafanana longathandi ukufunga.

³ Yilobu ububi obukukho konke okwenziwa ngaphansi kwelanga ukuba ukuphela kwabo bonke kunye, futhi lenhliziyo zabantu zigcwele ububi, lobuhlanya busenhliziyweni zabo besaphila, ngemva kwalokhu baya kwabaphansi.

⁴ Kodwa emuntwini osaphilayo uselalo ithemba, ngoba inja ephilayo ingcono kulesilwane esifileyo.

⁵ Ngoba abaphilayo bayazi ukuthi bazakufa, kodwa abafileyo kabazi lutho, kabaselawo umvuzo, kabasakhunjulwa.

⁶ Uthando lwabo lenzondo yabo lomona wabo sekubhubhile, kabasayikuba khona kulokho okwenziwayo ngaphansi kwelanga.

⁷ Hamba uyekudla ukudla kwakho ngokuthokoza, unathe lewayini lakho ngenhliziyo emhlophe, ngoba uNkulunkulu usekuvumile lokho okwenzayo.

⁸ Izigqoko zakho kazibe ngezimhlophe ngesikhathi sonke, ungayekeli ukugcoba ikhanda lakho.

⁹ Thokoza lomkakho omthandayo kuzo zonke insuku zokuphila kwakho okulize okunikiweyo ngaphansi kwelanga, ngoba leso yiso isabelo sakho ekuphileni, lesokutshikatshika kwakho ngaphansi kwelanga.

¹⁰ Lokho okwenzayo ukwenze kuhle, ngoba kawukho umsebenzi lomcabango lolwazi lokuhlakanipha endaweni yabafileyo lapho uya khona.

¹¹ Ngabuya ngabona ngaphansi kwelanga ukuthi umuntu olejubane kaphumeleli insuku zonke emjahweni, lamaqhawe alemandla kawanqobi empini insuku zonke; futhi ukudla kakusikho okwabahlakaniphileyo kokuphela, lenotho kayisiyo eyabalolwazi kokuphela, lokuphumelela kakusikho okwengcitshi kokuphela, ngoba isikhathi lethuba kubusa konke.

¹² Futhi kakulamuntu okwaziyo ukuthi isikhathi sakhe sizakufika nini; njengenhlanzi ezibanjwa limbule lanjengezinyoni ezibanjwa ngumjibila, labantu bayabanjwa lapho isikhathi esibi sibajuma.

¹³ Ngabona futhi ukuhlakanipha ngalindlela ngaphansi kwelanga, kwaba kukhulu kimi.

¹⁴ Kwakukhona umuzi omncinyane owawulabantu abalutshwana; inkosi elamandla yawuhlasela, yawuvimbezela, yawakhela amadundulu amakhulu okuvimbezela.

¹⁵ Kwatholakala phakathi kwawo umuntu ohlakaniphileyo ongumyanga, yena ngokuhlakanipha kwakhe wawakhulula lowomuzi. Kanti kakho owake wamkhumbula lowomuntu ongumyanga.

¹⁶ Mina ngithi ukuhlakanipha kungcono kulamandla lanxa ukuhlakanipha komyanga kuseyiswa lamazwi akhe engalalelwa.

¹⁷ Amazwi apholileyo omuntu ohlakaniphileyo azwiwa ngcono kulokumemeza kombusi phakathi kwezithutha.

¹⁸ Ukuhlakanipha kungcono kulezikhali zokulwa, kodwa isiphosiso esisodwa silamandla okuchitha ubuhle obunengi.