UmTshumayeli 8 - iBhayibhili Elingcwele 1978

¹ Ngubani onjengomuntu ohlakaniphileyo na? Ngubani owazi ukuchasisa ulutho na? Ukuhlakanipha komuntu kuyakhanyisa ubuso bakhe, lobuso bakhe obesabekayo buphendulwe.

² Lalela umlayo wenkosi; ungaphangisi ukwenza isifungo kuNkulunkulu.

³ Suka phambi kwenkosi, ungaphuzi nxa indaba ingayithokozisi, ngoba yona yenza ekuthandayo.

⁴ Ngoba ilizwi layo lilamandla; ngubani ongathi kuyo: Wenzani na?

⁵ Yena olalela umlayo kayikwehlelwa yingozi, lengqondo yomuntu ohlakaniphileyo iyasazi isikhathi lendlela yokwenza.

⁶ Ngoba yonke into ilesikhathi sayo lendlela yokuyenza, lanxa inkathazo zomuntu zinzima kuye.

⁷ Ngoba kakwazi okuzakwenzeka, futhi ngubani ongamtshela ukuthi kuzakwenzeka kanjani?

⁸ Kakulamuntu olamandla phezu komoya, loba phezu kosuku lokufa. Kakho osalayo ukuya empini, lobubi kabuyekeli labo abasemandleni abo.

⁹ Konke lokhu ngakubona lapho ngihlolisisa ngengqondo yami konke okwenziwa ngaphansi kwelanga; ngabona abantu bephethene ngokulukhuni bezwisana ubuhlungu.

¹⁰ Ngasengibona abantu ababi bengcwatshwa, labantu abavela emangcwabeni bebabuka emzini lapha babesenza khona okubi. Lokho lakho kulize.

¹¹ Ngoba isigwebo ngesenzo esibi singenziwa masinyane, abantu balesibindi sokwenza okubi.

¹² Lanxa isoni sisenza okubi izikhathi ezilikhulu siphile isikhathi eside, kodwa ngiyazi ukuthi kuzabalungela labo abamesabayo uNkulunkulu, ngoba bayamesaba.

¹³ Kodwa ababi kakuyikubalungela; futhi kabayikuhlala insuku ezinengi; umuntu ongamesabiyo uNkulunkulu unjengesithunzi.

¹⁴ Kukhona okulize okwenzekayo emhlabeni ukuthi bakhona abalungileyo abazuza okwezenzo zabantu ababi, bakhona lababi abazuza okwezenzo zabantu abalungileyo. Ngathi lokho lakho kulize.

¹⁵ Ngakho ngibabaza ukuzithokozisa; ngoba umuntu kalalutho oluhle ngaphansi kwelanga kuphela ukudla lokunatha, azithokozise, ngoba lokhu kuzakuba laye ekutshikatshikeni kwakhe ensukwini zokuphila kwakhe uNkulunkulu amnike zona ngaphansi kwelanga.

¹⁶ Lapho ngidinga ngengqondo yami ukuba ngizuze ukuhlakanipha lokubona umsebenzi owenziwa emhlabeni, umuntu angalali ubuthongo emini lebusuku,

¹⁷ ngabona ukuba uNkulunkulu ukumisile ukuba umuntu angakuboni okwenzekayo ngaphansi kwelanga; lanxa umuntu ezama ngokungakanani, kayikukubona; ohlakaniphileyo angathi uyazi, kodwa kayikulazi iqiniso lakho.