UmTshumayeli 5 - iBhayibhili Elingcwele 1978

Ukungagcwalisi izifungo kuyibuthutha

¹ Qaphelisa nxa usiya endlini kaNkulunkulu; ukusondela ukuba uzwe kungcono kulokunikela imihlatshelo yezithutha, ngoba zona kazazi ukuba zenza okubi.

² Ungabi lamawala ngomlomo wakho, ungaphangisi ukwenza izithembiso phambi kukaNkulunkulu; ngoba yena usezulwini, wena usemhlabeni, ngakho amazwi akho kawabe yingcosana.

³ Ukuphupha kuvela ekukhathazekeni okunengi, lokukhuluma kobuthutha kuvela emazwini amanengi.

⁴ Lapho usenza isifungo kuNkulunkulu ungaphuzi ukusigcwalisa, ngoba kathokozi ngezithutha; gcwalisa isifungo sakho.

⁵ Kungcono ukuba ungafungi kulokufunga isifungo ungasigcwalisi.

⁶ Ungavumeli ulimi lwakho lukungenise esonweni, ubususithi phambi kukaNkulunkulu bekuyisiphosiso; uNkulunkulu angakuthukuthelela ngamazwi akho, achithe lemisebenzi yakho yonke.

⁷ Lanxa uphupha amaphupho amanengi, wenze okulize, ulawule, kumele umesabe uNkulunkulu.

Konke kulize

⁸ Uba ubona elizweni ukucindezelwa kwabayanga lokusweleka kokulunga lokwahlulela, kungakumangalisi okwenziwayo, ngoba zonke induna zibekelwe abakhulu ukuzikhangela, lomkhulu kulabo bonke uyabakhangela bonke.

⁹ Into engasiza ilizwe yinkosi enanzelela ukulima okuhle.

¹⁰ Lowo othanda imali kayikwaneliswa yimali, laye othanda inotho kayikwaneliswa yinotho; lokho lakho kulize.

¹¹ Nxa inotho isanda, bayanda labayidlayo; lomnikazi wayo kumsizani ngaphandle kokuyibuka kuphela na?

¹² Isisebenzi silala ubuthongo obumnandi loba sisidla okulutshwana loba okunengi; kodwa onothileyo olokunengi kakhulu ahluleke ukulala.

¹³ Kukhona ububi obudanisayo esengibubonile ngaphansi kwelanga; ngibonile umuntu ezizuzela inotho ezakumlimaza,

¹⁴ leyonotho ichitheke ngonyanya omubi, azale umntwana engaselalutho.

¹⁵ Njengokuphuma kwakhe esiswini sikanina uzabuyela khona eze enjengokuphuma kwakhe; konke ukutshikatshika kwakhe kakuyikumvezela ulutho angabuyela lalo.

¹⁶ Lokho lakho kuyibubi obudanisayo ukuthi uzabuyela enjengokuzalwa kwakhe. Uzakuzuzani nxa umsebenzi wakhe wonke ungoweze,

¹⁷ echitha zonke insuku zakhe emnyameni lasosizini, ekukhathazekeni lasemkhuhlaneni lasekuthukutheleni na?

¹⁸ Engikubonileyo mina ukuthi kuhle kuyikuba umuntu adle anathe azithokozise ekutshikatshikeni kwakhe konke atshikatshika kukho ngaphansi kwelanga ensukwini zakhe zonke ezilutshwana uNkulunkulu amnike zona zibe yisabelo sakhe.

¹⁹ Kuyisiphiwo sikaNkulunkulu ukuba amnike inotho lempahla lamandla azithokozise ngakho, amukele isabelo sakhe, azithokozise ngomsebenzi wakhe.

²⁰ Kayikukhumbula kakhulu insuku zokuphila kwakhe, ngoba uNkulunkulu emnikile ukuthokoza enhliziyweni yakhe.