UmTshumayeli 4 - iBhayibhili Elingcwele 1978

¹ Ngasengibuya ngibone ukucindezela okwenziwa ngaphansi kwelanga; abacindezelwayo babekhala inyembezi, kodwa kungekho obaduduzayo. Kwakungekho abaduduzayo, ngoba abacindezeli babe lamandla.

² Ngathi bayadela abafileyo, ngoba sebefile, bangcono kakhulu kulabaphilayo abasekhona.

³ Kodwa ongcono kulabo bonke yilowo ongazanga abe khona ongabubonanga ububi obenziwayo ngaphansi kwelanga.

⁴ Ngasengibona ukuthi ukusebenza lakho konke ukuphumelela kuvela ekuncintanisaneni kwabantu. Lokho lakho kulize lamaya.

⁵ Abantu bathi: Isiphukuphuku sigoqa izandla zaso sidle inqweqwe zomlomo.

⁶ Kodwake kungcono isandla esisodwa esigcweleyo kanye lokuthula kulezandla ezimbili ezigcwele ukutshikatshika kanye lamaya.

⁷ Ngabuya ngabona ize ngaphansi kwelanga;

⁸ ngabona umuntu ongelabani indodana kumbe umfowabo etshikatshika njalonjalo enganeliswa yinotho yakhe engazibuzi ukuthi: Ngitshikatshikela bani, ngidele ukuzithokozisa na? Lokho lakho kulize lomsebenzi omubi.

⁹ Ababili bangcono kuloyedwa, ngoba bayazuza umvuzo omuhle ngokutshikatshika kwabo.

¹⁰ Ngoba uba omunye esiwa umnakwabo uzamvusa; kodwa maye kulowo owayo eyedwa kungekho ongamvusa.

¹¹ Futhi uba ababili belele ndawonye bayakhudumezana; oyedwa angakhudumala kanjani na?

¹² Umuntu angamahlula oyedwa, kodwa ababili bangamelana laye; intambo elemicu emithathu kayiqamuki masinyane.

¹³ Umfana ongumyanga ohlakaniphileyo ungcono kulenkosi endala eyisithutha engasavumi ukwelulekwa,

¹⁴ ngoba angaphuma entolongweni abe yinkosi lanxa wayezelwe engumyanga elizweni asezakulibusa.

¹⁵ Kodwa ngihlolisisile bonke abantu abakhona ngaphansi kwelanga, ngabona ukuthi umfana angathathelwa isikhundla sakhe

¹⁶ ozabusa abantu abanengi abangelakubalwa; laye kayikuthandeka kulabo abeza emva kwakhe. Lokho lakho kulize lamaya.