UmTshumayeli 3 - iBhayibhili Elingcwele 1978

Konke kulesikhathi sakho

¹ Konke kulesikhathi sakho, lakho konke okwenzakalayo kulesibanga sakho ngaphansi kwelanga.

² Kukhona isikhathi sokuzalwa, lesikhathi sokufa; isikhathi sokuhlanyela, lesikhathi sokusiphuna okuhlanyelweyo;

³ isikhathi sokubulala, lesikhathi sokuphilisa; isikhathi sokudiliza, lesikhathi sokwakha;

⁴ isikhathi sokukhala, lesikhathi sokuhleka; isikhathi sokulila, lesikhathi sokugida;

⁵ isikhathi sokuhlakaza amatshe, lesikhathi sokubuthelela amatshe; isikhathi sokugona, lesikhathi sokungagoni;

⁶ isikhathi sokudinga, lesikhathi sokulahlekelwa; isikhathi sokulondoloza, lesikhathi sokulahla;

⁷ isikhathi sokudabula, lesikhathi sokuthunga; isikhathi sokuthula, lesikhathi sokukhuluma;

⁸ isikhathi sokuthanda, lesikhathi sokuzonda; isikhathi sempi, lesikhathi sokuthula.

⁹ Uzuzani umuntu ngokusebenza kwakhe na?

¹⁰ Ngiwubonile umsebenzi uNkulunkulu awunike abantu ukuba bawenze.

¹¹ Ukwenzile konke ukuba kube kuhle ngesikhathi sakho; wamnika lomuntu ukwazi isikhathi esidlulileyo lesizayo; kodwa kalakho ukuqedisisa umsebenzi kaNkulunkulu kusukela ekuqaleni kuze kube sekucineni.

¹² Ngiyazi ukuthi kakukho okungcono kuye ukwedlula ukuthaba lokuzithokozisa esaphila,

¹³ lokuthi kuyisipho sikaNkulunkulu ebantwini ukuba bonke badle banathe bazithokozise ngomsebenzi wabo.

¹⁴ Ngiyazi ukuthi konke uNkulunkulu akwenzayo kuhlala kokuphela; kakukho okwengezelelwa kukho lokuphungulwa kukho; uNkulunkulu wakwenza kwaba njalo ukuze umuntu esabe phambi kwakhe.

¹⁵ Lokho okukhona yikho okwakukhona, lalokho okuzaba khona yikho okwakukhona; uNkulunkulu uyaphinda akubuyise futhi.

Ukwahlulela lokulunga kakukho emhlabeni

¹⁶ Futhi ngabona ngaphansi kwelanga ukuthi lapho kufanele kube khona ukwahlulela kwakukhona ububi, lalapho kufanele kube khona ukulunga kwakukhona ububi.

¹⁷ Ngasengisithi: UNkulunkulu uzathonisisa abalungileyo lababi ngoba kumisiwe isikhathi sakho konke okuqondiweyo lokwenziweyo.

¹⁸ Ngasengisithi mayelana labantu: UNkulunkulu uyabahlola ukuba abatshengise ukuthi bafanana lenyamazana.

¹⁹ Ngoba isiphelo sabantu lesiphelo sezinyamazana sinye; njengoba okunye kusifa, konke kuyafa. Konke kuphefumula moya munye, lomuntu kazedluli inyamazana; ngoba konke kulize.

²⁰ Konke kuya endaweninye, konke kuvela othulini, kubuyele futhi othulini.

²¹ Ngubani owaziyo ukuba umoya womuntu uya phezulu lokuba owenyamazana uya phansi na?

²² Ngasengibona ukuthi kakukho okungcono okwedlula ukuba umuntu azithokozise ngomsebenzi wakhe, ngoba lokhu kuyisabelo sakhe. Ngubani ongamenza abone lokho okuzakwenzeka engasekho na?