UmTshumayeli 2 - iBhayibhili Elingcwele 1978

¹ Ngasengisithi: Kulungile, ngizazama ukuzithokozisa, ngibone ukuthi kunjani. Lakho lokhu kwakulize futhi.

² Ngathi mayelana lokuhleka: Kuyikuhlanya! Ngathi langokuzithokozisa: Kusizani na?

³ Ngadinga ukuzithokozisa ngewayini, kodwa ingqondo yami iqondiswa yikuhlakanipha; ngadinga ukwenza ubuthutha ukuba ngibone okubathokozisayo abantu, labakwenzayo ngaphansi kwelanga ekuphileni kwabo okufitshane.

⁴ Ngazenzela imisebenzi emikhulu; ngazakhela izindlu, ngazihlanyelela izivini,

⁵ ngazenzela amasimu lezivande, ngahlanyela kukho zonke inhlobo zezihlahla ezithelayo.

⁶ Ngazenzela iziziba zokuthelela ngazo izihlahla ezikhulayo.

⁷ Ngathenga izigqili zesilisa lezisifazana, ngaba lezigqili ezizalelwe emzini wami; ngaba lemihlambi eminengi yenkomo lezimvu ukwedlula bonke ababekhona eJerusalema ngaphambi kwami;

⁸ ngazibuthela isiliva legolide okwakuvela enothweni yamakhosi leyamazwe; ngazidingela abahlabeleli abesilisa labesifazana, labafazi abanengi abangafiswa ngumuntu.

⁹ Ngaba mkhulu ukwedlula bonke ababekhona eJerusalema ngaphambi kwami, lokuhlakanipha kwami kwangisiza.

¹⁰ Konke amehlo ami akufisayo kangiwancitshanga khona, lenhliziyo yami kangiyincitshanga ukuthokoza; ngoba ngafumanisa ukuthokoza ekutshikatshikeni kwami konke, lokho kwaba ngumvuzo wami ngawo wonke umsebenzi wami.

¹¹ Ngasengihlolisisa konke okwenziwe yizandla zami, kanye lokutshikatshika kwami; konke kwakulize lamaya, kwakungekho nzuzo ngaphansi kwelanga.

¹² Ngasengizimisela ukuba ngihlole ukuhlakanipha lokuhlanya lobuthutha. Ngoba angenzani umuntu othatha isikhundla senkosi na? Angenza kuphela lokho osekwenziwe.

¹³ Ngasengibona ukuthi ukuhlakanipha kwedlula ubuthutha njengokukhanya kusedlula umnyama.

¹⁴ Ohlakaniphileyo uyabona lapho aya khona, kodwa isithutha sihamba emnyameni; kanti ngabona ukuthi isiphetho sabo bonke abantu sinye.

¹⁵ Ngasengisithi: Lokho okwehlela isithutha kuzangehlela lami; pho, kuzangisizani ukudinga ukuhlakanipha okungaka na? Ngasengisithi: Lalokho lakho kulize.

¹⁶ Ukukhunjulwa komuntu ohlakaniphileyo lokwesithutha kakuhlali kokuphela; ensukwini ezizayo bobabili bazabe sebekhohlakele. Ohlakaniphileyo loyisithutha bayafa.

¹⁷ Ngasengikuzonda ukuphila ngoba lokho okwenziwa ngaphansi kwelanga kubuhlungu kimi; konke kulize lamaya.

¹⁸ Ngawuzonda wonke umsebenzi wami engangiwenze ngaphansi kwelanga, ngoba ngizawutshiyela lowo ozathatha isikhundla sami.

¹⁹ Ngubani owaziyo ukuba uzakuba ngumuntu ohlakaniphileyo kumbe oyisithutha na? Kanti uzakubusa konke lokho engakusebenzelayo ngisebenzisa ukuhlakanipha kwami ngaphansi kwelanga. Lalokho lakho kulize.

²⁰ Ngasengiphelelwa lithemba ngomsebenzi wami wonke langokutshikatshika kwami ngaphansi kwelanga,

²¹ ngoba lowo otshikatshike ngokuhlakanipha langolwazi langobungcitshi konke angakutshiyela umuntu ongazanga akusebenzele. Lalokho lakho kulize, lobubi obukhulu.

²² Umuntu uzuzani ngokutshikatshika langobuhlungu asebenza ngakho ngaphansi kwelanga na?

²³ Ngoba insuku zakhe zonke zigcwele ubuhlungu, lomsebenzi wakhe uyikukhathazeka; lasebusuku ingqondo yakhe kayiphumuli. Lalokho lakho kulize.

²⁴ Kakukho okungcono emuntwini okwedlula ukudla lokunatha lokuzuza intokozo emsebenzini wakhe; kodwa ngabona ukuthi lalokho kuvela kuNkulunkulu;

²⁵ ngoba ngaphandle kwakhe ngubani ongadla loba abe lokuthokoza na?

²⁶ Ngoba uNkulunkulu uyamnika umuntu omthokozisayo ukuhlakanipha lolwazi lokuthokoza; kodwa isoni uyasinika umsebenzi wokubutha lokubuthelela ukuze sinike yena othokozisa uNkulunkulu. Lalokho lakho kulize lamaya.