UmTshumayeli 12 - iBhayibhili Elingcwele 1978

¹ Futhi khumbula uMenzi wakho ensukwini zobutsha bakho zingakafiki insuku ezimbi, ingakasondeli iminyaka, lapho uzakuthi: Kangithokozi ngayo.

² Mkhumbule kungakafiphali ilanga lenyanga lezinkanyezi lamayezi engakabuyi lezulu

³ lapho abagcini bendlu bezakuthuthumela, lamadoda alamandla akhokhobe, labacholayo bengasacholi ngoba sebebalutshwana, lalabo abalunguza ngamawindi bafiphale,

⁴ kuvalwe izivalo zomnyango, lapho umsindo wokuchola usuncipha, lokukhala kwentaka sekuncipha, lokuhlabela ingoma sekuphela,

⁵ lapho abantu sebesesaba ukukhwela umqanso, sebesesaba lokuhamba, lapho isihlahla sesilempoko ezimhlophe, lentothoviyane isitotoba, lenhliziyo isimnyama. Ngoba umuntu usesiya ekhaya lakhe elingapheliyo, labalilayo sebezulazula endleleni.

⁶ Umkhumbule kungakaqamuki intambo yesiliva, kungakafi isibane segolide, lembiza ingakaphahlazeki emthonjeni, lendirayo ingakephuki emgodini wamanzi,

⁷ lothuli lungakabuyeli emhlabathini lapho lwavela khona, lomoya ubuyela kuNkulunkulu owawunikayo.

⁸ Ize leze, kutsho umtshumayeli, konke kulize.

⁹ Ngokuhlakanipha umtshumayeli wabafundisa abantu ulwazi, esecabangile wafunda walungisa izaga ezinengi.

¹⁰ Umtshumayeli wazama ukugwala ngendlela ekholisayo, waloba imicabango eliqiniso ngendlela eqondileyo.

¹¹ Amazwi abahlakaniphileyo anjengencijo lanjengezipikili ezibethelwe zatshona; ayalikhokhela ibandla ngoba avela kumalusi munye.

¹² Nansi esinye isixwayiso, mntanami; ukwenziwa kwezingwalo kakupheli, lokufunda okunengi kuyadinisa.

¹³ Nanko ukuphela kwendaba. Usuyizwile yonke. Mesabe uNkulunkulu, ulalele imilayo yakhe; kakukho okwedlula lokho emuntwini.

¹⁴ Ngoba uNkulunkulu uzakwahlulela konke esikwenzayo layo yonke imfihlo, okuhle lokubi.