UmTshumayeli 11 - iBhayibhili Elingcwele 1978

¹ Thengisa amabele akho ngaphetsheya kolwandle ukuba ube lenzuzo ngemva kwesikhathi.

² Gcinisa impahla yakho emisebenzini eyisikhombisa loba eficaminwembili, ngoba kawukwazi okubi okuzakwenzeka emhlabeni.

³ Uba amayezi egcwele izulu, ayalinisela emhlabeni; uba isihlahla siwela ngaseningizimu ingabe ngasenyakatho, endaweni lapho siwela khona sizakulala khonapho.

⁴ Lowo onanzelela umoya kayikuhlanyela, lalowo okhangela amayezi kayikuvuna.

⁵ Njengoba ungazi ukuthi impilo iqalisa njani esiswini sowesifazana okhulelweyo, ngokunjalo kawazi ukuba uNkulunkulu owenza zonke izinto usebenza kanjani.

⁶ Hlanyela inhlanyelo yakho ekuseni, lantambama ungayekeli ukusebenza; ngoba kawazi ukuba yiphi ezaphumelela, le ingabe leyana, loba zombili zizaba zinhle.

Izeluleko kwabatsha

⁷ Ukukhanya kuhle; kuhle emehlweni ukubona ilanga.

⁸ Uba umuntu ehlala iminyaka eminengi, kathokoze ngayo yonke; kodwa kakhumbule insuku zomnyama zizakuba zinengi. Konke okuzayo kulize.

⁹ Thokoza, jaha, ebutsheni bakho, ikuthokozise lenhliziyo yakho ensukwini zobutsha bakho, ulandele indlela ezithandwa yinhliziyo yakho lezinto ezithandwa ngamehlo akho. Kodwa yazi ukuthi ngazo zonke lezizinto uNkulunkulu uzakukuthonisisa.

¹⁰ Susa ukusola engqondweni yakho, ukhuphe ukukhathazeka emzimbeni wakho, ngoba ubutsha lobujaha bulize.