UmTshumayeli 10 - iBhayibhili Elingcwele 1978

¹ Impukane ezifileyo zenza amagcobo omthaki ukuba anuke kubi; ngokunjalo ubuthutha obuncinyane nje bungachitha ukuhlakanipha lodumo.

² Inhliziyo yohlakaniphileyo imdonsela kokulungileyo, kodwa inhliziyo yesithutha isidonsela kokubi.

³ Lapho isithutha sihamba emgwaqweni kasilangqondo, sitshengisa bonke ukuthi siyisithutha.

⁴ Uba umbusi ekuthukuthelela, ungasuki endaweni yakho, ukuthobeka kuyalungisa iziphambeko ezinkulu.

⁵ Bukhona ububi esengibubonile ngaphansi kwelanga, iphutha elenziwa kanengi ngababusi;

⁶ ngibonile ubuphukuphuku buphakanyiswa, lonothileyo ehlaliswa endaweni ephansi;

⁷ ngibonile lezigqili zigade amabhiza, izikhulu zihamba ngenyawo njengezigqili.

⁸ Lowo omba umgodi uzawela kuwo; lodiliza umthangala uzalunywa yinyoka.

⁹ Omba amatshe ayamlimaza; lobanda izigodo usengozini yazo.

¹⁰ Uba ihloka libuthundu lingalolwa, umuntu uyavinyelela ngamandla; kodwa ukuhlakanipha kuyamsiza umuntu ukuba aphumelele.

¹¹ Uba inyoka iluma ingakalunjwa, umlumbi kasasizi lutho.

¹² Amazwi omuntu ohlakaniphileyo amenzela umusa, kodwa ulimi lwesithutha luyasichitha.

¹³ Siqala ngokukhuluma ubuthutha, siyecina ngokukhuluma ububi.

¹⁴ Isithutha siyaphophotha nje, kanti kakulamuntu owaziyo lokho okuzakuba khona lalokho okuzakuza emva kwakhe; ngubani ongamtshela khona na?

¹⁵ Ukutshikatshika kwesithutha kuyasidinisa ukuze singayazi lendlela eya emzini waso.

¹⁶ Maye kuwe, wena lizwe, onkosi yakho ingumntwana lezikhulu zakho ziba ledili ekuseni!

¹⁷ Ubusisiwe, wena lizwe, onkosi yakho iyindodana yezikhulu, lezikhulu zakho ziba ledili ngesikhathi esifaneleyo, ukuba zizuze amandla, zingadakwa.

¹⁸ Ngobuvila uphahla luyatshona, langokungananzi indlu iyanetha.

¹⁹ Ukudla kwenzelwe ukuhleka, lewayini lithokozisa ukusila; ngemali umuntu angazuza konke.

²⁰ Lasemicabangweni yakho ungayithuki inkosi, lasendlini yakho yokulala ungamthuki onothileyo; ngoba inyoni yaphezulu izathwala ilizwi lakho, lento ephaphayo ibike indaba.