UmTshumayeli 1 - iBhayibhili Elingcwele 1978

Umtshumayeli uthi konke kulize

¹ Nanka amazwi omtshumayeli indodana kaDavida, inkosi yaseJerusalema.

² Ize leze, kutsho umtshumayeli, ize leze, konke kulize.

³ Kumbuyiselani umuntu konke ukusebenza kwakhe akusebenza ngaphansi kwelanga na?

⁴ Isizukulwana siyadlula kufike esinye, kodwa umhlaba uma kuze kube nininini.

⁵ Ilanga liyaphuma libuye litshone, liphangise ukubuyela endaweni lapho liphuma khona.

⁶ Umoya uyaphephethela eningizimu, uphephethele enyakatho, ubhodabhode uze ubuye futhi.

⁷ Yonke imifula ingenisa olwandle, kodwa ulwandle kalugcwali; endaweni lapho igelezele khona imifula ibuya iyegeleza futhi.

⁸ Zonke izinto ziyadinisa; ukudinisa kwazo kungeze kwalandiswa. Ilihlo kalaneliswa yikubona, lendlebe yikuzwa.

⁹ Okwake kwaba khona kuzabuya kube khona, lokwake kwenziwa kuzabuya kwenziwe; kakukho okutsha ngaphansi kwelanga.

¹⁰ Mhlawumbe kungaba khona okungathiwa ngakho: Khangelani, lokhu kutsha! Atshi, lalokho kwakukhona endulo ngaphambi kwethu.

¹¹ Okudlulileyo kakusakhunjulwa, futhi lokuzayo kakuyikukhunjulwa ngabeza emva kwakho.

Konke okwakusenziwa ngumtshumayeli kwakulize

¹² Mina mtshumayeli ngangiyinkosi koIsrayeli eJerusalema;

¹³ nganikela ingqondo yami ukudinga lokuhlolisisa ngokuhlakanipha konke okwenziwayo ngaphansi kwelanga; kungumsebenzi onzima uNkulunkulu awunike abantu ukuwusebenza.

¹⁴ Ngikubonile konke okwenziwayo ngaphansi kwelanga; konke kulize lamaya.

¹⁵ Okugobileyo kakulakwelulwa; lokungekho kakulakubalwa.

¹⁶ Ngasengisithi: Ngizuzile ukuhlakanipha okukhulu ukwedlula bonke ababebusa iJerusalema ngaphambi kwami; sengejwayele ukuhlakanipha lokwazi.

¹⁷ Nganginikela ingqondo yami ukwazi ukuhlakanipha, lokwazi ukuhlanya lobuthutha, ngabona ukuthi lokhu lakho kungamaya.

¹⁸ Ngoba ekuhlakanipheni okunengi kulokukhathazeka okunengi, lowandisa ulwazi wandisa usizi.