UMikha 6 - iBhayibhili Elingcwele 1978

INkosi iphikisana labakoIsrayeli

¹ Ake lizwe okutshiwo yiNkosi; Sukumani, lilandise indaba zenu ezintabeni, lamaqaqa alizwe ilizwi lenu.

² Zwanini ukuphikisa kweNkosi, lina zintaba, lani zisekelo zomhlaba ezingapheliyo; ngoba iNkosi iphikisana labantu bayo, izakumelana loIsrayeli.

³ Lina bantu bami, ngenzeni kini na? Kuyini engilikhathaze ngakho na? Ngiphendulani.

⁴ Ngoba ngalikhupha elizweni laseGibithe, ngalihlenga endaweni yobugqili; ngathumela oMose loAroni loMiriyamu ukuba balihole.

⁵ Bantu bami, ake likhumbule amacebo kaBalaki inkosi yaseMowabi, lokuthi uBalami indodana kaBeyori wamphendula kanjani, likhumbule lalokho okwenzakalayo kusukela eShitimi kwaze kwaba seGiligali. ukuze lazi izenzo ezilungileyo zeNkosi.

Lokho okubizwa yiNkosi emuntwini

⁶ Ngizakuza ngiphetheni eNkosini, ngikhothame phambi kukaNkulunkulu ophezulu na? Ngizakuza kuyo ngiphethe umnikelo wokutshiswa, ngilamathole alomnyaka owodwa na?

⁷ INkosi izakwaneliswa zinqama eziyinkulungwane, lezinkulungwane ezilitshumi zemifula yamafutha na? Ngizakunikela izibulo lami ngenxa yesiphambeko sami, inzalo yomzimba wami ngenxa yesono senhliziyo yami na?

⁸ Ikutshengisile okuhle, wena muntu, iNkosi ifunani kuwe na? Ifuna kuphela ukwenza ukulunga, lokuthanda okungapheliyo, lokuzithoba phambi kwayo.

⁹ Ilizwi leNkosi liyamemeza kuwo umuzi — kuyikuhlakanipha okuqotho ukwesaba ibizo lakho. Zwanini, lina bantu lomphakathi womuzi.

¹⁰ Ngingayikhohlwa inotho ezuzwa ngokubi esendlini yababi, lezilinganiso ezikhohlisayo na?

¹¹ Ngingamyekela umuntu olezikali ezimbi lesaka eligcwele izilinganiso ezikhohlisayo na?

¹² Abanothileyo benu bagcwele okubi, labakhileyo bakhuluma amanga, lolimi lwabo luyakhohlisa.

¹³ Ngakhoke sengizakulitshaya, ngilichithe ngenxa yezono zenu.

¹⁴ Lizakudla, kodwa lingasuthi, kube khona ukulamba ngaphakathi kwenu; lizakulondoloza, kodwa kungalondolozeki; lalokhu elikulondolozayo ngizakukunikela empini.

¹⁵ Lizahlanyela, kodwa lingavuni; likhame izithelo zamaoliva, kodwa lingagcobi ngamafutha awo; lizakhama izithelo zevini, kodwa linganathi iwayini lazo.

¹⁶ Ngoba ligcinile izimiso zikaOmri, lenzile yonke imisebenzi yendlu kaAhabi, lahamba ngamacebo abo, ngakho ngizalichitha, labakhileyo benu babe yinhlekisa; lizakweyiswa ngabantu.