UMikha 5 - iBhayibhili Elingcwele 1978

¹ Hlomisa amabutho akho, wena Jerusalema! izitha zikuvimbezele; zizakutshaya umbusi wakho, wena Israyeli, esihlathini ngenduku.

Umbusi ozayo wakoIsrayeli

² Kodwa wena, Betlehema Efratha, omncinyane ukuba ube phakathi kwezizwe zakoJuda, kuzavela kuwe othile ozakuba ngumbusi wakoIsrayeli, okudabuka kwakhe kusukela endulo.

³ Ngakhoke uzabanikela, aze abelethe ohelelwayo, besekubuya koIsrayeli abaseleyo kubafowabo.

⁴ Uzakuma aluse umhlambi wakhe ngamandla eNkosi, ngobukhosi bebizo leNkosi uNkulunkulu wakhe. Bazavikeleka, ngoba khathesi esemkhulu kuze kube semikhawulweni yomhlaba;

⁵ uzaletha ukuthula. Lapho umAsiriya engena elizweni lakithi, enyathela emhlabathini wethu, sizahlomisa abelusi abayisikhombisa lezikhulu zabantu ezificaminwembili;

⁶ bazabusa ilizwe laseAsiriya ngempi, lelizwe likaNimrodi, basophule kumaAsiriya lapho engena elizweni lakithi lalapho enyathela phakathi kwalo.

⁷ Abaseleyo bakoJakobe bephakathi kwabantu abanengi bazakuba njengamazolo avela eNkosini lanjengomkhizo phezu kotshani, okungalindeli muntu, okungahlaleli muntu.

⁸ Abaseleyo bakaJakobe phakathi kwezizwe, bephakathi kwabantu abanengi bazakuba njengesilwane esiphakathi kwenyamazana zeganga, lanjengesilwane esiphakathi komhlambi wezimvu, esithi lapho sidabula phakathi kwawo sibambe, sinyathele sidabule iziqa, kungabi khona osizayo.

⁹ Isandla sakho, Israyeli, sizaphakanyiswa phezu kwezitha zakho, zichithwe zonke izitha zakho.

¹⁰ Kuzakuthi ngalezonsuku, itsho iNkosi, ngiqede amabhiza akho phakathi kwakho, ngichithe inqola zakho zokulwa,

¹¹ ngichithe lemizi yelizwe lakini, ngidilizele phansi inqaba zakini.

¹² Ngizakuqeda abathakathi phakathi kwenu, kungabe kusaba khona lezangoma,

¹³ ngibulale izithombe zenu, ngaphule insika zenu zokukhonzela phakathi kwenu; kalisayikuphinda likhothamele umsebenzi wezandla zenu,

¹⁴ Ngizakusiphula elizweni insika zenu ezimiselwe unkulunkulukazi uAshera, ngichithe lemizi yenu,

¹⁵ ngiphindisele ngokuthukuthela langolaka ezizweni ezingalalelanga,