UMikha 3 - iBhayibhili Elingcwele 1978

Ukusolwa kwabakhokheli ababi

¹ Ngathi: Zwanini, lina zinhloko zakoJakobe, lani zikhulu zakoIsrayeli. Kakusikho okwenu yini ukwazi ukulunga na?

² lina elizonda okuhle, lithande okubi, elebula isikhumba sabantu bami, lihlubule inyama emathanjeni abo,

³ elibadla inyama abantu bami, lihlinze isikhumba sabo, lephule amathambo abo, libaqobe njengenyama esembizeni lanjengenyama esebhodweni.

⁴ Lizakhuleka eNkosini, kodwa kayiyikuliphendula; izakulifihlela ubuso bayo ngalesosikhathi, ngoba lenzile okubi.

⁵ INkosi ithi ngabaprofethi abaduhisa abantu bami, ababathembisa ukuthula lapho besazuza ukudla, kodwa lowo ongabaniki ukudla balwe laye:

⁶ Ngakho lizafikelwa yibusuku obungelambono, kube mnyama, lingabe lisavumisa; ilanga lizabatshonela abaprofethi, losuku lube mnyama tshu.

⁷ Ababoni bazayangeka, lezanuse zibe lenhloni, bambomboze imilomo yabo, ngoba kungaveli impendulo kuNkulunkulu.

⁸ Kodwa mina nginikwe amandla, lokulunga lesibindi, ukuba ngimtshele uJakobe iziphambeko zakhe loIsrayeli isono sakhe.

⁹ Zwanini lokhu, lina zinhloko zendlu kaJakobe, lani zikhulu zendlu kaIsrayeli, elinengwa yikulunga, lihlanekele bonke ubuqotho,

¹⁰ elakha iZiyone ngegazi, leJerusalema ngobubi.

¹¹ Inhloko zalo zahlulelela imali, abapristi balo bafundisela inkokhelo, abaprofethi balo bavumisela imali; kanti bathembela eNkosini besithi: INkosi kayikho phakathi kwethu na? Ngakhoke kasiyikwehlelwa ngokubi.

¹² Ngakhoke ngenxa yenu iZiyone lizalinywa njengensimu, leJerusalema libe lunxiwa oludilikileyo, lentaba yethempeli iphenduke ibe lihlathi.